Isaías 39 - Bible in Tzeltal Bachajón

Ezequías ya yic' ochel a'batetic talic ta Babilonia

¹ Ta hich ora te Merodac-baladán snich'an Baladán, te ajwalil yu'un Babilonia, la sticon bahel carta soc mahtaniletic ta stojol te Ezequías, como la ya'iy te ay ta chamel soc te lecube.

² Te Ezequías tse'el yo'tan yu'un, la ya'be yilic te snahul sc'ulejal, te plata, oro, bintic sumet yic', lequil aceite, spisil te snahul a'tejibaletic yu'un guerra soc spisil te bintic q'uejbil yu'une. Mayuc bin ma ba la ya'be yilic ta sna soc ta spisil ban c'alal scuentahinej.

³ Ha yu'un te jalwanej Isaías baht ta stojol te ajwalil Ezequías, hich la sjoc'obe: ¿Bin la yalic te winiquetic, soc banti talemic? xchi. La sjac' te Ezequías: Namal talemic, talemic ta Babilonia, xchi.

⁴ ¿Bin la yilic ta ana? xchi te Isaías. La sjac' te Ezequías: La yilic spisil te bintic ay ta jna. Mayuc bin ay ta snahul jc'ulejal te ma ba la jca'be yilic, xchi.

⁵ Ha yu'un te Isaías la yalbe te Ezequías: A'iya awa'iy te sc'op Jehová te scuentahinej spisil:

⁶ Ya me sta yorahil te spisil bintic ay ta ana, soc spisil bintic la stsob te ame'atat c'alal ora, ya x'ich'ot bahel ta Babilonia; mayuc bin ya xhil, xchi te Jehová.

⁷ Ay ats'umbal te ya x'ic'otic bahel, ya xpasotic ta eunuco-winic ta sna te ajwalil yu'un Babilonia, xchi.

⁸ Te Ezequías la yalbe te Isaías: Lec te sc'op Jehová te la awale, xchi. Yu'un hich la yal ta yo'tan: Ay me lamal q'uinal soc jun me co'tan te jayeb xan c'ahc'al cuxulone, xchi.