Isaías 34 - Bible in Tzeltal Bachajón

Te yilimba Jehová ta stojol te nacionetic

¹ ¡Nohpojanic tal, nacionetic, a'iya me awa'iyic; a'iya awa'iyic, ha'ex pueblohex! Ac'a ya'iy te lumq'uinal soc spisil bintic ay tey a, ac'a ya'iy te bahlumilal soc spisil te bintic ya xloc' tey a.

² Como te Jehová ilinem ta stojol spisil te nacionetic, ilinem ta stojol spisil te soldadohetic yu'unic; ya me slajinlan soc ya me yac'ticlan ta milel.

³ Te mach'atic lajemic yu'un ya me yich'ic ch'ojel bahel, te schamen baq'uetalic ya xhahchic ta tuhubel; te witsiltic ya xt'ux yu'un te sch'ich'elique.

⁴ Spisil te bintic ayic ta ch'ulchan ya xtup' bahel soc hich ya yich' balel te ch'ulchan te bin ut'il balbil hun; spisil te bintic ay tey a ya xluhbaj cohel hich te bin ut'il ya'binal ts'usub, hich te bin ut'il ya'binal higuera.

⁵ Como ya xyacub te espada cu'un ta ch'ulchan; ya xco tal ta yaq'uel castigo te Edom, te pueblo te jc'axel ac'bil ta lajel cu'un.

⁶ Te espada yu'un Jehová ya'tinej ch'ich' soc potsbil te sjuhp'el, ha te sch'ich'el tuminchijetic soc tentsunetic, te sjuhp'el sriñon te tat tentsunetique, como te Jehová ay milbil mahtanil yu'un ta Bosra, soc bayel miltamba ta sq'uinal Edom.

⁷ Pajal ya xyahlic soc te ha'mal wacaxetic, colel torohetic soc muc'ul torohetic. Te sq'uinalic ya xnoj ta ch'ich', te ts'ubilum ya xnoj ta sjuhp'el.

⁸ Como ha sc'ahc'alel yu'un Jehová te ya ya'be spacol, ha ha'bil yu'un ya'beyel stojol ta scuenta Sión.

⁹ Te uc'umetic yu'un Edom ya xc'atp'ujic ta xuch', te sts'ubilum ya xc'atp'uj ta azufre; te sq'uinal ya xc'atp'uj ta xuch' te stsacoj c'ahc'.

¹⁰ Ma ba ya xtup' c'ahc'al ahc'abal; spisil ora ya xmo bahel te sch'ahilele. Ta cajalcaj ts'umbalil jochol ya xhil, mayuquix mach'a ya xc'ax bahel tey a.

¹¹ Ha yawil ya xc'oht te xcuj soc te ch'ix-uch, te xoch' soc te joj ya xnahinic tey a. Te Jehová ya me st'im bahel ta sba Edom te schihal yu'un howiyel soc te sp'isel spamalil yu'un jochol ya xhil.

¹² Ya x'a'bot sbihilin te príncipaletic yu'un ha príncipaletic te mayuc bin ya scuentahinic, te xchihe; soc spisil mach'atic yu'un te ich'bilic ta muc' mayuc stuc ya xc'ohtic.

¹³ Ya xcol ch'ixetic ta muc'ul nahetic yu'un ajwalil, soc ta tulanil ts'ahquetic yu'un ya xcol chic-ch'ixetic soc petel ch'ixetic. Yawil ha'mal ts'i'etic ya xc'oht, soc banti ya xnahinic te yalatac avestruz-mutetic.

¹⁴ Te chambahlametic yu'un jochol taquin q'uinal ya me sjoquin sbahic soc ha'mal ts'i'etic, soc te tentsunetic ya me yawtay sbahic; ha nix hich tey ya xnahin a te xcujetic soc tey ya scux yo'tanic a.

¹⁵ Tey ya spas spechech a te muc'ul xcuj, soc ya xtonin, ya xtohc yalatac soc ya stsob ta ye'tal xic'; soc tey ya stsob sbahic a te aja'usetic, jujucoht soc yantsilel.

¹⁶ Ilawil ta libro yu'un Jehová, mayuc jcohtuc te ya spas falta, mayuc ya spas falta jcohtuc soc yantsilel. Como ha nix te Jehová te la yal mandar, soc ha nix te espíritu yu'un te la stsobticlan.

¹⁷ Ha la yac' seña ta na'el ta stojolic, ta sc'ab la sp'is bahel. Ha yu'unic ya xc'oht sbahtel q'uinal, tey ya xnahinic a ta cajalcaj ts'umbalil.