Isaías 32 - Bible in Tzeltal Bachajón

Te Ajwalil te toj yo'tan

¹ Ilawil, ay jtuhl ajwalil te toj ya xcuentahinwan soc príncipaletic te toj ya xchahpanwanic.

² Ta jujutuhl hich ya xc'oht te bin ut'il ahnibal yu'un te tulan ic' te ya smac te tulan yic'al ha'al; hich te bin ut'il be-ha'etic ta taquin q'uinal, hich te bin ut'il yaxinal muc'ul ton ta q'uixin q'uinal.

³ Hich ma ba ya xmahc sitic te mach'atic ya yilic, soc te mach'atic ay schiquinic ya me slahman sbahic ta ya'iyel.

⁴ Te mach'atic ma sna'ic q'uinal ya me sna'ic soc ya me xc'oht ta yo'tanic, soc te mach'atic xha'unaj ya xc'opojic, jamal ya xc'opojic.

⁵ Ma ba ya xhalbotix lec sc'oblal te mach'a ma sna' q'uinal, soc ma ba ya x'ich'ot ta cuenta te mach'a ma lecuc bin ya spas.

⁶ Como te mach'a ma sna' q'uinal ya yal te bin mayuc scuentahil, soc ya snop ta yo'tan spasel te bin chopol, yu'un ya spas te bin ma hichuc ya sc'an ta stojol Dios soc ya yal te bin ma meleluc sc'oblal te Jehová; mayuc bin ya ya'be te mach'a ay swi'nal, soc mayuc bin ya ya'be yuch' te mach'a ay ta taquinti'il.

⁷ Ha chopol te ya'tejib te jlo'loywanej, ha ya snop bin chopol yu'un ya sjin ta scuenta lot te pobrehetic, aunque toj bin yac sc'ambel te pobrehe.

⁸ Yan te mach'a lec sc'oblal ya snop te bin lec, soc ta scuenta te lec sc'oblal yu'un, jun yo'tan ya xhil.

Tsitsel ta stojol antsetic yu'un Jerusalén

⁹ ¡Ha'ex, antsetic, te mayuc bintic ay sc'oblal ta awo'tanic, hahchanic, a'iybon awa'iyic jc'op! ¡Ach'ixetic te jun awo'tan ayex, a'iya awa'iyic te bin ya cale!

¹⁰ C'axem jtebuc ta jun ha'bil ya me xiwex, antsetic te jun awo'tanic; como ma ba ya yac' sit te ts'usub soc ma ba ya yich' tsobel te site.

¹¹ ¡Nihcanic, ha'ex te mayuc bin ay sc'oblal ta awo'tanic; nihcuc awo'tanic, ha'ex te jun awo'tan ayex! ¡Loq'uesa ac'u' apaq'uic, watal me ya xhilex, chuca ach'uhtic soc ch'ixal pac'!

¹² Maja atahnic scaj mel-o'tan yu'un te t'ujbil q'uinaletic, yu'un te lequil ts'usubiltic.

¹³ Ta sq'uinal te pueblo cu'un ya xcol ch'ixileltic soc pehtel ch'ixetic; soc ta spisil nahetic te yutsil q'uinal ya ya'iyic te ayic ta pueblo te yutsil q'uinal ya ya'iy.

¹⁴ Como ya x'ihquitayot te sna ajwalil, jochol ya xhil te pueblo te bayel yajwal, te toyol ilo-q'uinaletic soc te joyob ts'ahquetic ya sutp'ijic ta ch'entiquil ta spisil ora, te banti jun yo'tan ya xnahinic te ha'mal burrohetic soc te ya sta swe'elic te chambahlametic,

¹⁵ ha to c'alal ya yich' malel cohel tal ta jtojoltic te espíritu ay ta toyol. Hich ya xc'atp'uj ta lequil lum te jochol taquin q'uinal, soc te lequil lum hich ya xc'oht te bin ut'il tohyem te'etic.

¹⁶ Te stojil chahpanel ya xnahin ta jochol taquin q'uinal soc te bin stojil ta pasel ya xnahin ta lequil q'uinal.

¹⁷ Te bin ya yac' te bin stojil ta pasele, ha te lamal q'uinal, soc te bin ya xloc' yu'un te ya'tel te bin stojil ta pasel, ha te c'ux-o'tanil soc te jun yo'tan spisil ora.

¹⁸ Te pueblo cu'un ya xnahin ta banti lamal q'uinal, ta nahetic te jun-o'tanil tey a soc ta lugaretic yu'un cux-o'tanil.

¹⁹ Aunque ya xtenot ta bat te tohyem te'etic soc jc'axel ya xjihn te pueblo,

²⁰ ¡bayel me awutsilic ha'ex te yac ats'unic ta spisil ti'ti'ha'etic soc te yac awac' te ya xcolic ta libre te j'a'tel-wacax soc te burrohe!