Isaías 30 - Bible in Tzeltal Bachajón

Tojol ya smuc'ulin yo'tanic te Egipto

¹ Hich ya yal te Jehová: ¡Obol sbahic te toyba al-nich'anetic, te ay bin ya schapic te ma cu'unuc; te ya schap sc'opic soc yantic, pero ma ha'uc ta scuenta te espíritu cu'un, te hich ya xp'ohl mulil yu'une!

² Ya xcohic bahel ta Egipto, pero ma ba la sjoc'obonic. Ya sc'anic te ya yich' yipic ta scuenta yip te faraón, ha ya smuc'ulin yo'tanic te canantayel yu'un Egipto.

³ Pero te yip te faraón ya sutp'ij ta aq'uexlal, te canantayel ta yaxinal Egipto, ha apehc'anel ya xc'oht.

⁴ Aunque ayic ta Zoán te príncipaletic soc te c'ohemiquix ta Hanes te mach'atic ticombilic yu'unique,

⁵ spisilic ya me xq'uexawic yu'un jun pueblo te mayuc stuc, te ma ba ya xcoltayotic yu'un soc mayuc bin ya stahic yu'un, ha nax ya stahic q'uexlal soc pehc'anel, xchi te Jehová.

⁶ Te sc'op jalwanej ta stojol te chambahlametic ayic ta Neguev: Ta lumq'uinal yu'un uts'inel soc wocol, ta banti ay chojetic soc me' chojetic, ti'awal chanetic soc chanetic te ya xwihlic, tey ya yich'ic bahel ta burrohetic te sc'ulejalic, te bintic tsobil yu'unic ya yich'ic bahel ta sc'ujulil spat camellohetic, ya yich'ic bahel ta jun pueblo te ma xtuhun yu'unique.

⁷ Como ma xtuhun soc tojol te coltayel yu'un Egipto, ha scuentahil te hich sbihil la jca'be: Rahab te mayuc bin ya spas, xchi.

⁸ Bahan, ts'ihbaya ta tabla te nahalsitil ini ta stojolic, ts'ihbaya ta hun, scuenta yu'un ta patil bahel ha testigo ya xc'oht sbahtel q'uinal.

⁹ Como ha toyba pueblo ini, jlotil al-nich'aniletic, ha al-nich'aniletic te ma ba la sc'an la ya'iyic te p'ijubtesel yu'un Jehová.

¹⁰ Hich ya yalbeyic te j'ilawetic: Ma me xawilic nahalsitil, xchihic, soc hich ya yalbeyic te jalwanejetic: Ma me xawalbotic te bin stojil ta pasel; halbotic ca'iytic t'ujbil c'opetic nax, halahic te bintic sjel ta lec;

¹¹ ihquitaya te be, loc'anic ta sbehlal, ma me xawalbotic xan sc'oblal te Ch'ul Dios yu'un Israel, xchihic.

¹² Ha yu'un hich ya yal te Ch'ul Dios yu'un Israel: Te bin ut'il la ap'ajic te c'op ini, te la awac' smuc'ulin awo'tanic te uts'inel soc te lo'loyel, soc tey la atahic coltayel yu'un a,

¹³ ha yu'un te mulil ini hich ya xc'oht awu'unic te bin ut'il toyol ts'ahc te jatem, te nopol ya xhemts'uj, te jts'ihn nax ya xch'ay cohel.

¹⁴ Hich ya xwuy te bin ut'il pac'bil oxom, hich jc'axel ya xbusq'uij te mayuquix xeht'elul ya xhil te ya xtuhun ta sloq'uesel ac'al ta yawil c'ahc', o ta sloq'uesel ha' ta pozo a, xchi te Diose.

¹⁵ Como hich ya yal te Jehová te Ch'ul Dios yu'un Israel: Ta scuenta suhtesel-o'tanil soc cux-o'tanil yac ata acolelic; ta scuenta lamal-o'tanil soc smuc'ul-o'tanil yac ata awipic, xchi; pero ma ba la ac'anic.

¹⁶ La awalic: Ma'uc, ya x'ahnotic bahel ta cawu, xchihex; ha yu'un ya me x'ahnex bahel. Soc la awalic: Ya xmohotic bahel ta cawuhetic te ahnimal ya xbehenic, xchihex; ha yu'un ahnimal ya me xbehenic bahel te mach'atic ya snutsex bahele.

¹⁷ Jmil ta tuhl ya x'ahnex bahel ta scuenta jtuhl nax te ya xiwteswan; ya x'ahnex bahel apisilic ta scuenta ho'tuhl te ya xiwteswanic, ha to c'alal hich ya xhilex te bin ut'il uhnen te' ta ba wits, hich te bin ut'il bandera ta ba tsehl.

Halbil te ya yich' c'uxultayel yu'un Dios te Israel

¹⁸ Pero te Jehová yac ta smahliyel te ya sc'uxultayex; tse'el yo'tan te ya ya'beyex awilic te sc'uxul yo'tan, como te Jehová ha Dios te toj ya xchahpanwan. ¡Bayel me yutsilic spisil mach'atic ha ya smahliyic!

¹⁹ Pueblo yu'un Sión te nahinemex ta Jerusalén, ma ba ya x'oc'atix. Te mach'a ya ya'iy c'uxultaywanej ya sna'bat yo'bolil aba soc ya sjac'bat te c'alal ya ya'iy te aw awu'une.

²⁰ Aunque te Cajwaltic ya ya'bat te we'elil scuenta mel-o'tan soc te ha' scuenta wocol, te jnohpteswanejic awu'un ma ba ya snaq'uix xan sba; ta asit nix ya me awilic.

²¹ Teme ya xbahat ta wa'el o ta q'uexam, ya me awa'iy c'op ta apat te hich ya yalbat: Ha te be ini, t'una me, xchi.

²² Ha bohlobtesbil sc'oblal ya xc'oht awu'unic te loc'ombahetic awu'unic te potsbilic ta plata, soc te awahcananic macalic ta oro. Yac ach'ojticlanic bahel hich te bin ut'il pac' te bohloben sc'oblale, hich yac awalic: ¡Loc'anic bahel! xchihex.

²³ Te Cajwaltic ya yac' tal ha'al ta awawal-ts'unub c'alal yac ats'unic, soc te we'elil ya ya'bat te q'uinal ha bayel soc buhts'an. Ta hich ora te wacaxetic awu'un ya me sta swe'elic ta jamal q'uinal.

²⁴ Te j'a'tel-wacaxetic soc te burrohetic te ya stop'ic lum ya swe'ic lequil ac te ya yich' loq'uesel tal ta pala soc ta stsacojibal ha'mal.

²⁵ Ta sc'ahc'alel bayel miltamba soc te bin ora ya xjihn cohel toyol ilo-q'uinaletic ay me muc'ul ha'etic soc be-ha'etic te ya x'oquinic bahel ta spisil toyol witsetic soc ta toyol tsehletic.

²⁶ Te sc'ahc'al te u hich ya xc'oht te bin ut'il sc'ahc'al te c'ahc'ale, soc te sc'ahc'al te c'ahc'al huqueb buelta ya xtohy xan yip, hich te bin ut'il sc'ahc'al huqueb c'ahc'al, te bin ora te Jehová ya spoxtaybe yehchen te pueblo yu'un soc te ya spoxtaybe te sc'a'el te a'botic yu'une.

Castigo yu'un Jehová ta stojol Asiria

²⁷ ¡Ilawil, ya xtal ta namal te sbihil te Jehová! tihlem yilimba soc pim sch'ahilel; nojel yilimba ta ye, soc te yac' hich ay te bin ut'il c'ahc' te ya xlajinwan.

²⁸ Te ic' ya xloc' ta ye hich c'ohem te bin ut'il be-ha' yac ta malel loq'uel, te ya xc'oht c'alal ta snuc'. Ha ya xtal stij te nacionetic ta schihchinojibal yu'un jinel; soc ya yotses freno ta ye te pueblohetic, yu'un ya showiytes a.

²⁹ Yan te ha'exe ya me xc'ayojinex hich te bin ut'il ta ahc'abal te ya yich' pasel te q'uin Pascua; soc hich stse'elil awo'tanic te bin ut'il mach'a ya xbehen ta scuenta sc'op amay, te ya xbaht ta wits yu'un Jehová, ta Muc'ul Ton yu'un Israel.

³⁰ Te Jehová ya me yac' ta a'iyel te tulan sc'op soc ya me yac' ta ilel bin ut'il ya xco te sc'ab soc tulan yilimba soc c'ahc' te ya xlajinwan, soc sutu-ic', ic'al ha'al soc bat.

³¹ Te sc'op Jehová ya me swuy te Asiria, ya smaj ta sbastón.

³² Te juju-yahlel majel ya yac' te Jehová ta xul yu'un castigo ya yich' tijel panderohetic soc arpahetic yu'un; ya slihlin sc'ab yu'un ya'beyel guerra.

³³ Como ayix c'ahc'al chapal te Tofet, chapalix yu'un te ajwalile. Jamal soc c'ubul la yich' pasel te yawil c'ahc' yu'un, soc bayel c'ahc' soc si'. Te yic'al Jehová ya schic' te si' hich te bin ut'il bayel azufre te ya xmal bahel.