Isaías 29 - Bible in Tzeltal Bachajón

Ariel soc scontratac

¹ ¡Ay me awocol, Ariel, Ariel, ha te pueblo banti la spas campamento te David! Ac'a c'axuc xan ha'biletic, ac'a spasulanic te q'uinetic ta yorahil.

² Ya ca'be swocol te Ariel, ya me smel yo'tan soc ya me x'ahcanaj; hich ya xc'oht cu'un te bin ut'il ariel.

³ Ya joytayat ta contrahinel; ya joytayat ta mohibal ts'ahc soc ya jach mohibal te' ta acontra.

⁴ Hich peq'uel ya xc'ohat, ya xc'opojat c'alal ta lum. Ya xloc' tal ta ts'ubilum te ac'ope, ya xchicnaj ac'op ta lum hich te bin ut'il yesomba, sajson ya xloc' ac'op ta lum.

⁵ Pero te bayel acontratac hich ya xc'ohtic te bin ut'il ts'u'lum, te bayel j'uts'inwanejetic hich ya xc'ohtic te bin ut'il suhlil trigo te ya xlichot ta ic'. Ora nax ya xc'oht ta pasel, jts'ihn nax.

⁶ Te Jehová te scuentahinej spisil ya xtal scontrahinat ta chahwuc, ta nihquel soc tulan xjuyet, ta sutu-ic' soc ic'al ha'al, soc ta yat c'ahc' te ya xlajinwan.

⁷ Te tsobol ants-winiquetic yu'un spisil nacionetic te ya ya'beyic guerra te Ariel hich ya xc'oht te bin ut'il wayichil ta ahc'abal, spisil te mach'atic ya ya'beyic guerra soc te sjoyob sts'ahcul, soc te ya xtenawanic ta uts'inwanej.

⁸ Hich ya xc'ohtic te bin ut'il mach'a ay ta wi'nal te ya swayichtay te yac ta we'el, pero c'alal ya scux yo'tan, ay swi'nal; o hich te bin ut'il mach'a taquin yo'tan te ya swayichtay te yac ta uch'el, pero c'alal ya scux yo'tan, ay ta taquinti'il. Hich ya xc'oht te tsobol ants-winiquetic yu'un spisil te nacionetic te ya ya'beyic guerra te wits Sión.

Ts'o'sit soc cheb yo'tan te Israel

⁹ ¡Coma abahic, xchamuc awo'tanic, mahcuc asitic, ts'o'situc ya xhilex! ¡Yacubenic, pero ma yu'unuc vino, xhanlajanuquex, pero ma yu'unuc tulan uch'balil!

¹⁰ Como te Jehová la smal ta atojolic espíritu yu'un c'ubul wayel; la smacbe sit te jalwanejetic awu'unic soc la smacbe sjol te mach'atic ya x'ilawanic.

¹¹ Spisil te nahalsitil ini hich ya xc'oht awu'unic te bin ut'il c'opetic ta balbil hun te yich'oj sello. Teme ay yac awa'be yil te mach'a ya sna' yilel hun, te hich yac awalbe: Ilawil ini, teme xchihate, hich ya sjac': Ma xhu' cu'un, como yich'oj sello, xchi.

¹² O teme yac awa'be te mach'a ma sna' yilel hun, te hich yac awalbe: Ilawil ini, teme xchihate, hich ya sjac': Ma jna' yilel hun, xchi.

¹³ Hich la yal te Jehová: Te pueblo ini ya xnohpojic tal ta jtojol soc sc'opic soc ya yich'onic ta muc' ta sti'il nax yehic, pero namal ay ta jtojol te yo'tanic soc te ya yich'onic ta muc', ha nax smandar winic te nohptesbilic a.

¹⁴ Ha yu'un yan xan buelta ya cac' ch'ayuc yo'tanic te pueblo ini ta scuenta jchahp a'teliletic; ya xch'ay te p'ijil-o'tanil yu'un te mach'atic p'ij yo'tanic, ya xtup' bahel te bin sna'oj te mach'atic ay bin ya sna'ic, xchi.

¹⁵ Ay me swocolic te mach'atic ya snac' ta stojol Jehová te bin schapoj ta yo'tanic, te ya spas ya'telic ta yihc'al q'uinal, soc te hich ya yalic: ¿Mach'a ya yilotic, soc mach'a ya sna' jbahtic? te xchihique.

¹⁶ Yan c'ohem awu'unic, te jpac'ojom ¿pajal bal soc te ahch'al? Te bin pasbil ¿hich bal ya yalbe te jpaswanej yu'un: Ma ha'ucat la apason, xchi bal? Te yawil ha' ¿hich bal ya yalbe te mach'a chahpanot yu'une: Mayuc bin yac ana', xchi bal?

Scolel Israel

¹⁷ Ta jts'ihn bahel ¿ma bal yacuc xc'atp'uj ta lequil q'uinal te Líbano, soc te lequil q'uinal hich yilel ya xc'oht te bin ut'il tohyem te'etic?

¹⁸ Ta hich ora te cohquetic ya ya'iyic bin ya yal ta balbil hun, soc te jts'o'sitetic ya x'ilawanic ta yohlil te yihc'al q'uinal soc ta ahc'abal.

¹⁹ Te mach'atic peq'uel yo'tanic ya me xcha'tal stse'elil yo'tanic ta stojol Jehová; te mach'atic jc'axel mayuc bin ay yu'unic ay me yutsil yo'tanic ta stojol te Ch'ul Dios yu'un Israel.

²⁰ Como ya me xlaj te j'uts'inwanej, soc ya xch'ay bahel te jlabanwanej; ya xlajic spisil mach'atic ma xwayic yu'un spasel te bin chopole,

²¹ te mach'atic ta scuenta jp'ahl nax c'op ya yalbeyic ay smul te winique, te mach'atic ya schahpambeyic syacol te mach'a ya xchahpanwan ta ochibal, soc ta scuenta lotil c'op ya yac' te ma tojuc ya yich' chahpanel te mach'a mayuc smule.

²² Ha yu'un te Jehová te la scoltay loq'uel te Abraham, hich ya yalbe te sna Jacob: Ma ba ya stahix q'uexlal te Jacob, ma ba ya xch'ay sch'ich'el yelaw.

²³ Como te c'alal ya yil te snich'nab, ha te ya'tel jc'ab ta yohlilic, ya me sch'ultesbonic te jbihile. Ya me sch'ultesic te Ch'ul Dios yu'un Jacob, ya me yich'ic ta muc' te Ch'ul Dios yu'un Israel.

²⁴ Te mach'atic howiyem yo'tanic ya snopic te bin ay ta na'el, te mach'atic muquen ya xc'opojic ya snopic te bin ay ta nopele, xchi te Jehová.