Isaías 22 - Bible in Tzeltal Bachajón

Sc'op jalwanej ta stojol spamlej yu'un nahalsitil

¹ Ha te sc'op jalwanej ta stojol te spamlej yu'un nahalsitil: ¿Bin ut'il ay a te apisilic mohemex ta ba nahetic?

² Ha'at te bayel ayat ta c'op, ha'at pueblohat te xjuyet soc yutsil q'uinal yac awa'iy; te mach'atic chamic awu'un ma ba lajic ta espada soc ma ba lajic ta guerra.

³ Spisil te príncipaletic awu'un junax loq'uic bahel ta ahnimal ta stojol te t'ihmalte', la yich'ic chuquel; spisil te mach'atic tahbilic ta awohlil pajal la yich'ic tsaquel, aunque namal loq'uic bahel ta ahnel.

⁴ Ha yu'un hich la jcal: Ihquitayawon, ac'awon ta tulan oq'uel; ma me xamuc'ubtesbon q'uinal ca'iy yu'un te jihnem te pueblo cu'un, xchihon.

⁵ Como ha sc'ahc'alel xjuyetic, wocol soc bayel xiwel te chapal yu'un te Cajwaltic Jehová te scuentahinej spisil ta spamlej yu'un nahalsitil, ha sc'ahc'alel sjinel ts'ahquetic soc yawtayel te witsiltique.

⁶ Te Elam yich'oj te snahul ya'tejibalul t'ihmalte' soc mohem ta carretahetic yu'un guerra soc ta cawu; soc te Kir la sloq'ues te mahquilal.

⁷ Te t'ujbil spamlejetic awu'un noj ta carretahetic, soc te jmoheletic ta cawu lamalic ta yochibal te pueblo.

⁸ Yahlix cohel te smahquil Judá, soc ta hich ora la awilic bahel ta sna te a'tejibaletic yu'un guerra te ay ta Na yu'un Tohyem Te'etic.

⁹ La awilic te ay bayel jamajtic te sts'ahcul te Pueblo yu'un David; soc la atsobic ha' ta yawil ta ahlan.

¹⁰ La awahtay te nahetic ta Jerusalén, la ajinticlan cohel nahetic yu'un ya yich' xan yip a te sts'ahque.

¹¹ Ta yohlil schebal te ts'ahquetic la apas yawil ha' ta banti ya x'och te ya'al te antiguo yawil ha'; pero ma ba la awich'ic ta cuenta te mach'a la spas, ma ba la ana'ic te mach'a namey la schahpan.

¹² Ha yu'un te Jehová te scuentahinej spisil, ta hich ora la yiq'uex yu'un ya x'oq'uex soc yac amel awo'tanic, yu'un yac aloq'uesic stsotsel ajolic soc yac alapic ch'ixal pac'.

¹³ Pero ay tse'el-o'tanil soc yutsil-o'tanil, smilel wacaxetic soc tuminchijetic, swe'el ti'bal soc yuch'el vino, hich la awalic: ¡We' uch'ucotic, yu'un pajel ya xchamotic! xchihex.

¹⁴ Te Jehová te scuentahinej spisil, hich la yalbon ca'iy: Ma ba ya xpasbotex perdón yu'un te mulil ini, ha to c'alal ya xchamex, xchi te Jehová te scuentahinej spisil.

Sebna, ha sjelol Eliaquim

¹⁵ Hich ya yal te Jehová te scuentahinej spisil: Bahan ta stojol te Sebna, te jcuentahinwanej yu'un te sna ajwalil, hich me xawalbe:

¹⁶ ¿Bin ay awu'un li'i, o mach'a ay awu'un li'i, te yac apas amuquenal li'i, te yac apas amuquenal ta toyol, te yac ahot ochel ta ton te banti yac acux awo'tan?

¹⁷ Ilawil, te Jehová namal ya sch'ojat bahel; ya me smacbat asit awelaw.

¹⁸ Ya stselat bahel hich te bin ut'il pelota, ya sch'ojat bahel ta muc'ul q'uinal; tey ya xchamat a, soc tey ya xhil a te carretahetic te ha awutsilal, ¡ha'at te yac awac' ta q'uexlal te sna te awajwale!

¹⁹ Ya jloq'uesat ta awa'tel, ya jtenat loq'uel ta banti ayat ta a'tel.

²⁰ Ta hich ora ya quic' tal te ca'bat Eliaquim snich'an Hilcías.

²¹ Ya ca'be slap te ac'u'e ya jchucbe sch'uht ta schuhquil ach'uht, soc ya ca'be ta sc'ab te awa'tele. Ha tatil ya xc'oht yu'un te mach'atic ya xnahinic ta Jerusalén soc te mach'atic yu'un te sna Judá.

²² Ya jcajambe ta snehquel te llave yu'un te sna David; ha ya sjam, mayuc mach'a ya xhu' ya smac, soc ya smac, mayuc mach'a ya xhu' ya sjam.

²³ Ya jts'ap hich te bin ut'il clavo ta tulan yawil, soc ha huctajibal te ay ta ich'el ta muc' ya xc'oht yu'un te sna te state.

²⁴ Tey ya x'ipaj a spisil te yutsilal te sna te stat: ha te snich'nab soc smamatac, spisil te vasohetic te mayuc lec sc'oblalic, te tazahetic c'alal ta spisil ta chahp q'uibetic.

²⁵ Ta hich ora, xchi te Jehová te scuentahinej spisil, te ts'apbil clavo te ay ta tulan yawil ya me yich' loq'uesel; ya xwac' soc ya xch'ay cohel. Soc te ihcatsil te tey jipil a ya xch'ay cohel; hich yaloj te Jehová, xchi.