Isaías 21 - Bible in Tzeltal Bachajón

Sc'op-jalwanej ta stojol Babilonia

¹ Ha te sc'op jalwanej ta stojol te jochol taquin q'uinal ta stojol mar: Hich te bin ut'il sutu-ic' te ya xc'ax ta Negev, hich ya xloc' tal ta jochol taquin q'uinal, ta q'uinal te xiweltic sba.

² La ya'bon quil tulan nahalsit: Te j'ac'aw ta c'abal ya x'ac'awan ta c'abal, te jlajinwanej ya xlajinwan. ¡Mohan, Elam! ¡Joytaya, Media! Ya cac' lahmajuc spisil ahcan.

³ Ha yu'un te bayel sc'uxul te jbaq'uetal, la stsacon te swocol te sc'uxul, hich te bin ut'il swocol te ya x'ayin yal te antse. Te mel-o'tan ma xya'bon ca'iy c'op, noj te co'tan ta xiwel te c'alal la jquile.

⁴ Sicubon ya ca'iy yu'un, ya xnihcon yu'un te xiwele; te yihc'ubal q'uinal te bayel la jmulan sutp'ijem ta xiwel.

⁵ Ya schahpanic mesa, ya slimbeyic spac'al, ya xwe' x'uch'ic. ¡Hahchanic, príncipaletic, a'beyahic aceite te amahquilic!

⁶ Como hich la yalbon te Jehová: Bahan, tehc'ana j'il-q'uinal te ya yac' ta na'el te bin ya yil, xchi.

⁷ La yil winiquetic te mohemic ta cawu, cha'cha'tuhlic te scholoj sbahic, cajajtic ta burrohetic, cajajtic ta camellohetic. Ha yu'un la yil xan ta lec,

⁸ hahch ta aw hich te bin ut'il choj: ¡Cajwal, jujun c'ahc'al teq'uelon ta ilo-q'uinal; sjunal ahc'abal yacon ta yilel q'uinal ta scanantayel!

⁹ ¡Ilawil, yac ta talel winiquetic cajajtic, cha'cha'tuhlic scholoj sbahic! xchi. Patil hich la yal: ¡Yahlix, yahlix te Babilonia! Te loc'ombahetic yu'un te diosetic yu'un wuyiquix ta lum, xchi.

¹⁰ Pueblo cu'un, te ts'o'bil ta teq'uel hich te bin ut'il trigo, la jcalbeyex te bin la yalbon te Jehová te scuentahinej spisil, te Dios yu'un Israel.

Sc'op jalwanej ta stojol Duma

¹¹ Ha te sc'op jalwanej ta stojol Duma: Ay mach'a la yawtayon c'alal ta Seir: J'il-q'uinal, ¿jayeb ora yihc'ubel q'uinal? J'il-q'uinal, ¿jayeb ora yihc'ubel q'uinal? xchi.

¹² La sjac' te j'il-q'uinale: Yaquix ta sacubel q'uinal, patil ya x'ihc'ub q'uinal. Teme yac ac'an yac ajoc'oyic, joc'oyahic; suhtanic tal yan buelta ta sjoc'oyel, xchi.

Sc'op jalwanej ta stojol Arabia

¹³ Ha te sc'op jalwanej ta stojol Arabia: Ha'ex jchombajeletic yu'un Dedán, te ya xc'ax ahc'abal awu'unic ta ha'maletic yu'un Arabia,

¹⁴ loc'anic ta stahel te mach'a taquin yo'tan; a'beyahic yuch' ha', ha'ex te nahinemex ta Tema, a'beyahic swe'el te mach'a yac ta ahnel.

¹⁵ Como ya xloq'uic ta ahnel ta stojol te espada, ta stojol te espada te loq'uesbil ta sna, ta stojol te t'ihmalte' te t'imbile, soc ta stojol te tulan guerra.

¹⁶ Hich la yalbon te Jehová: Li' ta jun ha'bil, te pajal soc te ha'bil yu'un j'a'tel-winic, ya xlaj sc'oblal spisil te yutsilal te Cedar.

¹⁷ Mayuc tsobol te cuxul ya xhil yu'un te mach'atic ay yipic te ya yaq'uic t'ihmalte', te talemic ta Cedar, yu'un hich yaloj te Jehová te Dios yu'un Israel, xchi.