Isaías 2 - Bible in Tzeltal Bachajón

Te cuentahinel yu'un Jehová ta swohlol bahlumilal

¹ Ha te bin la yil te Isaías snich'an Amoz sc'oblal Judá soc Jerusalén:

² Ta nopol slajibal c'ahc'al ha jolal ya xc'oht yu'un spisil witsetic te wits yu'un te sna Jehová; ha toyol ya xc'oht yu'un te tsehletic, soc spisil te nacionetic ya me xtal syom sbahic ta stojol.

³ Ya xtalic bayel pueblohetic soc hich me ya yalic: La'ic, mohucotic ta wits yu'un Jehová, ta sna te Dios yu'un Jacob. Ha ya ya'botic jnoptic te behetic yu'un, hich ya xbehenotic ta tut behetic yu'un, xchihic. Como ya xloc' tal ta Sión te Ley, ta Jerusalén ya xloc' tal te sc'op te Jehová.

⁴ Ha ya schahpambe te c'op hahchem yu'un te nacionetic soc ya me stsitsticlan tsobol pueblohetic. Ya sc'atp'unic ta arado te espada yu'unic, soc te slanzahic ya sc'atp'unic ta hoz. Mayuc nación ya shach espada ta scontrahinel yan nación, soc ma ba ya schahpanix sbahic ta yaq'uel guerra.

⁵ Conic, sna Jacob, behenucotic ta sacal q'uinal yu'un Jehová.

Castigo yu'un Jehová ta stojol jtoybahetic

⁶ Jehová, awihquitayej te pueblo awu'un, ha te sna Jacob, como nojel ta stalelic te talemic ta stojol banti ya xloc' tal c'ahc'al, nojel ta jna'ojeletic, hich te bin ut'il te filisteohetic; soc ya schap sc'opic soc jyanlumetic.

⁷ Te sq'uinalic nojel ta plata soc oro, mayuc slajibal te sc'ulejalique. Te sq'uinalic nojel ta cawuhetic soc ma ahtaybaj te scarretahic yu'un guerra.

⁸ Ha nix hich nojel ta loc'ombahetic te sq'uinalique, ya squejan sbahic ta stojol te ya'tel te sc'abic, te bin spasojic ta yal sc'abic.

⁹ Hich pehc'anot te ants-winic, hich peq'uel c'oht te winique; ma me xapasticlambe perdón.

¹⁰ ¡Ochan bahel ta ch'en, nac'a aba ta lumq'uinal ta stojol te Jehová te xiweltic sba, ta stojol te sts'anabul te smuc'ul yutsilale!

¹¹ Ya xpehc'anot te stoybahil te sit te ants-winic, te stoybahil te ants-winic ya me yich' pehc'anel. Ha nax ya xtoybot sc'oblal te Jehová ta hich ora.

¹² Como te Jehová te scuentahinej spisil ay sc'ahc'alel te ya xtal scontrahin spisil jtoybahetic soc te muc' yac'oj sbahic, spisil mach'atic stoyoj sc'oblalic, ya me yich'ic pehc'anel;

¹³ spisil te cedrohetic ta Líbano te toyol ayic soc te stoyoj sbahic, soc spisil te jihte' ta Basán;

¹⁴ spisil te toyol witsetic soc spisil toyol tsehletic;

¹⁵ spisil toyol ts'ahquetic soc spisil ts'ahquetic ay yipic;

¹⁶ spisil barcohetic yu'un Tarsis soc spisil t'ujbil barcohetic.

¹⁷ Te stoybahil te ants-winic ya yich' pehc'anel, ya xpehc'anot te muc' scuyoj sbahic; ha nax stuquel te Jehová te ya xtohybot sc'oblal ta hich ora.

¹⁸ Soc jc'axel ya xch'ay bahel spisil te loc'ombahetique.

¹⁹ Te ants-winiquetic ya me x'ochic bahel ta ch'entiquil soc ta banti jamajtic te lumq'uinal, ta scuenta te xi'el te Jehová soc te sts'anabul te smuc'ul yutsilal, te c'alal ya xhahch ya'be castigo te lumq'uinale.

²⁰ Ta hich ora te ants-winiquetic ya me sch'ojic bahel ta stojol te ch'ohetic soc sots'etic, te loc'ombahetic yu'unic te pasbilic ta plata soc ta oro, te la spasic yu'un ya sch'uhuntayic.

²¹ Ya x'ochic ta ch'entiquil soc ta banti jamajtic tontiquil ta scuenta te xi'el te Jehová soc te sts'anabul te smuc'ul yutsilal, te c'alal ya xhahch ya'be castigo te lumq'uinale.

²² ¡Ihquitayahic hilel te ants-winic, te ta ic' nax ay scuxlejalic! como ¿binti ya xtuhun a?