Isaías 18 - Bible in Tzeltal Bachajón

Sc'op-jalwanej ta stojol Etiopía

¹ ¡Ay me swocol te q'uinal yu'un xju'et xiq'uic te ay ta jehch muc'ul ha'etic yu'un Etiopía,

² te ya sticon bahel jal-c'opetic ta mar ta barcohetic pasbilic ta jalal! Bahanic, jal-c'opetic te tulan ya xbahex, bahanic ta nación yu'un nahtil winiquetic te xch'ulet snuhculelic, ta pueblo te xi'bilic ta bayuc, ta nación te ay yip soc te ya ya'iy tsalaw, te stsaloj sq'uinalic ta muc'ul-ha'etic.

³ Ha'ex ta apisilic te ayex ta bahlumilal, ha'ex te nahinemex ta q'uinal, te c'alal ya yich' tohytesel mohel bandera ta wits, ila me awilic; soc te c'alal ya yich' tijel corneta, a'iya me awa'iyi.

⁴ Como hich la yalbon te Jehová: Lamal q'uinal ya ca'iy a ya quil bahel c'alal ta banti nahinemon, hich te bin ut'il sq'uixinal te sjahts' c'ahc'al te c'alal c'axix a te ha'ale, hich te bin ut'il sts'ujulel tocal te c'alal c'ux c'ahc'al ta yorahil stsobel sit te awal-ts'unubile.

⁵ Como te c'alal ma to yorahiluc ta stsobel a te sit awal-ts'unubil, c'alal luhbajix a te snich soc yac ta c'anubel a te ts'usube, ya sc'abay soc cuchillo te stut c'abc'ab, ya sbojbe loq'uel te sc'abc'abe.

⁶ Spisil ya yich' ihquitayel hilel yu'un te mutetic yu'un witsiltic soc te ha'mal chambahlametic. Te mutetic tey ya xc'ax yu'unic a ta yorahil q'uixin q'uinal, soc te chambahlametic tey ya xc'ax yu'unic a ta yorahil sic, xchi te Jehová.

⁷ Ta hich ora ya yich' aq'uel mahtaniletic ta stojol te Jehová te scuentahinej spisil, yu'un te nahtil winiquetic te xch'ulet snuhculelic, ta pueblo te xi'bilic ta bayuc, ta nación te ay yip soc te ya ya'iy tsalaw, te stsaloj sq'uinalic ta muc'ul-ha'etic. Ya yich'ic talel ta wits Sión, ta banti ay te sbihil te Jehová te scuentahinej spisil.