Isaías 17 - Bible in Tzeltal Bachajón

Sc'op-jalwanej ta stojol Damasco

¹ Ha te bin halbot sc'oblal te Damasco: Ilawil, te Damasco ma pueblohuc ya xc'oht; ha busul jihnem ts'ahquetic ya xhil.

² Te pueblohetic yu'un Aroer ch'aybil ya xhilic; ya sutp'ij ta ha'maltic yu'un chambahlametic, ya xwayic tey a, mayuc mach'a ya xiwtesotic yu'un.

³ Ya xch'ay bahel ta Efraín te pueblo joytaybil ta ts'ahc soc te cuentahinel yu'un Damasco; te mach'atic cuxul ya xhilic yu'un Siria hich ya xc'ohtic te bin ut'il te yutsilal te snich'nab Israel, xchi te Jehová te scuentahinej spisil.

Castigo ta stojol Israel

⁴ Ta hich ora ya xtup' te yutsilal Jacob, soc ya xjayub sjuhp'el te sbaq'uetal.

⁵ Hich ya xc'oht te bin ut'il c'alal ya yich' tsobel sit awal-ts'unubil, ya stsacticlan ta sc'ab jujutohm; hich ya xc'oht te bin ut'il c'alal ya yich' tsobel te sit trigo ta spamlej yu'un Refaim.

⁶ Ay to ya xhil tey a, hich te bin ut'il c'alal ya xyuc'ot te olivo; ay cheb oxeb sit ya xhil ta sc'abc'ab, chaneb o ho'eb ya xhil ta sc'abc'ab te bayel ya yac' sit, xchi te Jehová te Dios yu'un Israel.

⁷ Ta hich ora te ants-winiquetic ya me yac' sitic ta stojol te Jpaswanej yu'unic, t'ojol sitic ta stojol te Ch'ul Dios yu'un Israel.

⁸ Ma ba yaq'uix sitic ta stojol te scajtajib milbil mahtaniletic te la spasic ta sc'abic, soc ma ba yaq'uix sitic ta stojol te bintic pasbilic ta sc'abic, soc te loc'ombahetic yu'un Aser soc te loc'ombahetic yu'un te c'ahc'ale.

⁹ Ta hich ora te pueblohetic awu'unic te joybilic ta sts'ahc, ihquitaybil hilel ya xc'ohtic, hich te bin ut'il te pueblohetic yu'un te heveohetic soc amorreohtic c'alal loq'uic ta ahnel ta stojol te israeletic; ay me bayel jinel.

¹⁰ Como la ach'ay ta awo'tan te Dios te la scoltayat, ma ba la ana' te Muc'ul Ton yu'un ahnibal awu'un. Ha yu'un aunque yac ats'un t'ujbil ts'unubiletic soc yac ats'un ts'unubiletic te talemic ta yan q'uinal,

¹¹ soc te bin c'ahc'alil yac ats'un, yac awac' coluc, yac awac' te ya xchicnaj loq'uel spuhl ta sab, te sit ya yich' tsobel, busul ya xhil ta sc'ahc'alel chamel soc tulan sc'uxul.

¹² ¡Ay, te xjuyet bayel pueblohetic ini, hich sc'opic te bin ut'il xju'et mar! ¡Ay, te xjuyet nacionetic ini, hich sc'opic te bin ut'il xnilet bayel ha'etic!

¹³ Te pueblohetic hich ay yawic te bin ut'il xnilet ha'etic, pero Dios tulan me ya yutic, hich namal ya xloq'uic ta ahnel; ya xlichotic ta ic' hich te bin ut'il suhlil trigo ta witsiltic, hich te bin ut'il ts'u'lum ta stojol sutu-ic'.

¹⁴ Ta xmahl c'ahc'al, ay bayel xiwel; pero c'alal ma to ba sacuben q'uinal a, mayuquix te jcontra. Hich ya xc'oht ta stojol te mach'atic ya yelc'anotic, hich ya xc'oht ta stojol te mach'atic ya spojbotic jbiluctic.