Isaías 15 - Bible in Tzeltal Bachajón

Sc'op-jalwanej ta stojol Moab

¹ Ha te bin halbot sc'oblal te Moab. ¡Ta junax ahc'abal la yich' jinel te Ar ta Moab! ¡La yich' jinel te pueblo Kir ta Moab ta junax ahc'abal!

² Te mach'atic yu'un Dibón mo bahel ta templo, ta toyol awilaletic yu'un ya x'oq'uic tey a; te Moab ya yoq'uetay te Nebo soc Medeba. Spisilic ya yich'ic loq'uesbeyel stsotsel sjolic soc ya yich'ic loq'uesbeyel spisil yisimic.

³ Ya slapic ch'ixal-pac' ta callehetic; spisilic ya x'ahcanajic ta sba te nahetic soc ta plazahetic, ya smil sbahic ta oq'uel.

⁴ Te Hesbón soc Eleale ya x'awonic, ya x'a'iybot sc'opic c'alal ta Jahaza. Ha yu'un te ya x'oq'uic te soldadohetic yu'un Moab, ya xnihc yo'tanic.

⁵ Ya x'awon co'tan ta scuenta Moab; te mach'atic yu'un te loq'uic ta ahnel, ya xbahtic c'alal ta Zoar, c'alal ta Eglat-selisiya. Ta mohel q'uinal yu'un Luhit ya xmohic bahel ta oq'uel; ta sbehlal bahel Horonaim ya x'awonic yu'un te jinele.

⁶ Ya xlajic te ha'etic yu'un Nimrim, ya xtaquij te aquiltic, ya sayub te spuhl te'etic, ya xlaj spisil bintic yax.

⁷ Ha yu'un te c'ulejalil tahbil yu'unic soc te c'ulejalil q'uejbil yu'unic, ya yich'ic bahel ta sjehchelul te uc'um yu'un sauce-te'etic.

⁸ Te oq'uel ay ta sjoyobal sti'il te Moab; chicnaj yahcan c'alal ta Eglaim, chicnaj yaw c'alal ta Beer-elim.

⁹ Te ha'etic yu'un Dimón noj ta ch'ich', yu'un ya cac' talel muc' xan wocoletic ta stojol Dimón: ha tsajal chojetic ta stojol mach'atic ya xloq'uic tal ta ahnel ta Moab, soc te mach'atic cuxulic hilel ta lumq'uinal.