Isaías 13 - Bible in Tzeltal Bachajón

Sc'op-jalwanej ta stojol Babilonia

¹ Ha te bin halbil sc'oblal te Babilonia te a'bot sna' te Isaías snich'an Amoz:

² Tehc'anahic bandera ta t'axal wits, awonanic ta stojolic; hacha ac'abic scuenta yu'un ya x'ochic bahel ta puertahetic yu'un mach'atic muc' sc'oblalic.

³ La jpas ta mandar te mach'atic cu'un te ch'uhltesbilic, la jquiq'uix te mach'atic ay yipic yu'un ya sc'ohtes ta pasel te bin ya sc'an te quilimba, ha te mach'atic tse'el yo'tanic yu'un te cutsilal.

⁴ Ay xjuyet ta witsiltic, hich te bin ut'il c'ax bayel winiquetic; xjuyet yu'un nacionetic, ha nacionetic te yac ta stsobel sbahic. Te Jehová te scuentahinej spisil yac ta yilel te soldadohetic te chapalic yu'un guerra.

⁵ Talemic ta namal q'uinal, c'alal ta sti'il ch'ulchan, ha te Jehová soc te a'tejibaletic yu'un yilimba, yu'un ya slajin spisil te q'uinale.

⁶ ¡Ahcanajanic, yu'un nopol ya xc'ohtix te sc'ahc'alel yu'un Jehová! ¡Ya xtal hich te bin ut'il te lajinel ya xtal ta stojol te Mach'a spisil ya xhu' yu'un!

⁷ Ha yu'un ya xlaj yip sc'ab spisilic, ya xlaj yip yo'tanic spisil ants-winiquetic.

⁸ Bayel me ya xiwic, ya xcuentahinotic yu'un wocol soc sc'uxul; hich sc'uxul te bin ut'il ya x'ayin yal te antse. Xcham yo'tanic jujutuhl te c'alal te ya yil sbahic, stsacoj c'ahc' te sit yelawic.

⁹ Ilawil, ya xtal te sc'ahc'alel yu'un Jehová, ha sc'ahc'alel te xiweltic sba, sc'ahc'al yo'tan soc yilimba, yu'un ya sc'atp'un ta jochol taquin q'uinal te lumq'uinal soc ya slajin te jmulawiletic te ayic tey a.

¹⁰ Te eq'uetic soc te xana-eq'uetic ta ch'ulchan ma ba ya yac' sc'ahc'al; ya x'ihc'ub te c'ahc'al te c'alal ya xloc' tal, soc te u ma ba ya yac' sts'anabul.

¹¹ Ya ca'be castigo te bahlumilal yu'un te schopolil, te mach'atic chopolic ta scaj smulic. Ya jlajimbe sc'oblal te stoybahil te jtoybahetic soc ya jpehc'ambe stoybahil te j'uts'inwanejetic.

¹² Ya cac' te c'ax hich jteb nax winiquetic te bin ut'il lequil oro, te c'ax hich jteb nax ants-winiquetic te bin ut'il oro yu'un Ofir.

¹³ Yu'un ya cac' ya xnihc te ch'ulchan, soc te bahlumilal ya me xyanij yawil ta scuenta yilimba te Jehová te scuentahinej spisil ta yorahil te sc'ahc'al yilimba.

¹⁴ Hich te bin ut'il gacela-chij te nutsbil, hich te bin ut'il tuminchijetic te mayuc jcanan yu'un, jujutuhl ya suht bahel ta pueblo yu'unic, jujutuhl ya x'ahn bahel ta slumal.

¹⁵ Mach'ayuc ya xtahot, ya xlowot; mach'ayuc ya xtsacot, ya xlaj ta espada.

¹⁶ Te alaletic yu'unic tulan ya yich' majbeyel ta lum ta stojol sitic; ya yich' pojbeyel sbiluc ta snahic soc ya yich'ic tsacbeyel te antsetic yu'unique.

¹⁷ Ilawil, ya jtijbe yo'tanic te medohetic yu'un ya scontrahinic, ha te mach'atic te mayuc sc'oblal yu'unic te plata soc ma xbic'taj yo'tanic yu'un oro.

¹⁸ Ta ya'tejibalul st'ihmalte'ic ya slajinic te queremetic; ma ba ya sna'beyic yo'bolil sbahic te mach'atic ayinelic to, soc ma ba ya sc'uxultay te alaletique.

¹⁹ Te Babilonia, te t'ujbil perla yu'un te nacionetic, te yutsilal soc stoybahil te caldeohetic, hich ya xc'ohtic te bin ut'il Sodoma soc Gomorra te jinotic yu'un Dios.

²⁰ Mayuquix bin ora ya xnahinic xan tey a, ta cajalcaj ts'umbalil mayuc mach'a ya xnahin tey a; te árabehetic ma ba ya spas snahilpac' tey a, mayuc jcanan-tuminchijetic te ya yaq'uic stuminchijic tey a,

²¹ ha ya xwayic tey a te chambahlametic yu'un jochol q'uinal soc ya xnoj ta xcuj-mutetic te nahetic; tey ya xnahinic avestruz-mutetic a, soc tey ya xwihlic a te ha'mal tentsunetique.

²² Ya x'awonic ta muc'ul nahetic te hiena-ts'i'etic soc chacal-ts'i'etic ta t'ujbil nahetic. Nopol ya xc'oht yorahil, ma ba ya xhalajix sc'ahc'alel, xchi te Jehová.