Isaías 11 - Bible in Tzeltal Bachajón

Te stojil cuentahinel yu'un Mesías

¹ Ya xloc' tal spuhl ta schumante'el Isaí; ta slohp' ya xt'ohm loq'uel tal spuhl te ya yac' sit.

² Te espíritu yu'un Jehová ya xhul ta stojol: ha te espíritu yu'un p'ijil-o'tanil soc sna'beyel scuentahil, te espíritu yu'un j'ac'-o'tanil soc yu'el, te espíritu yu'un bin ay ta na'el soc xi'el te Jehová;

³ soc ha lec yo'tan yu'un te yich'el ta muc' te Jehová. Ma ha'uc ya schahpan yu'un te bin ya yil ta sit, ma ha'uc ya schahpan yu'un te bin ya ya'iy ta schiquin;

⁴ ha toj ya schahpan te pobrehetic, stojil ya schahpan te mach'atic peq'uel ayic ta bahlumilal. Ya me yehchentes te q'uinal ta xul te ay ta ye; te ic' te ya shu'xiy loq'uel ta ye ya yac' lajuc a te mach'a chopol yo'tan.

⁵ Ha schuhquil sch'uht ya xc'oht te bin stojil ta pasel, te jun-o'tanil ha schuhquil sch'uht ya xc'oht.

⁶ Te ha'mal ts'i' jun yo'tan ya yac' sba soc te tuminchij, te choj pajal ya smehtsan sba soc te tentsun, junax ayic te tut wacax, te tsajal choj soc te alaq'uil chambahlam, soc ya xtojobtesotic bahel yu'un alal.

⁷ Te me' wacax soc te me' oso ya sjoquin sbahic ta we'el, te yalatac junax ya smehtsan sbahic; soc te tsajal choj ya me swe' ac hich te bin ut'il te j'a'tel-wacaxe.

⁸ Te chu'alal ya me ya'iy ixta' ta sti'il sna te jti'awal chan, te alal te hilix schu' ya me yotses sc'ab ta sna te jti'awal chan.

⁹ Ma ba ya x'uts'inwan soc ma ba ya xlajinwan ta spisil te ch'ul wits cu'un, como hich te bin ut'il nojel ta ha' te mar, hich ya xna'bot sba te Jehová ta spahmal q'uinal.

¹⁰ Ta hich ora, te slohp' te Isaí ha bandera ya xc'oht yu'un te pueblohetic; ya xlehot yu'un te ants-winiquetic, soc bayel me yutsil te banti ya xnahine.

¹¹ Soc ta hich ora te Jehová ya scha'hach sc'ab ta stsobel tal te pueblo yu'un te ayic ta Asiria, Egipto, Patros, Etiopía, Elam, Sinar, Hamat soc ta ti'ti'mar.

¹² Ya me stehc'an hahchel bandera ta stojol te nacionetic, yu'un ya stsob talel mach'atic loq'uesbilic yu'un Israel; ya stsob tal ta schanxuhcul te q'uinal te mach'atic yu'un Judá te puhquemique.

¹³ Ya me xlaj bahel te xut'et yo'tan te Efraín, ya me yich'ic lajinel te scontratac Judá. Te Efraín mayuquix xut'et yo'tan ta stojol Judá, te Judá ma ba ya yuts'inix te Efraín,

¹⁴ ya x'anumajic bahel ta scontrahinel te filisteohetic ta smahlib c'ahc'al, soc ya spojbeyic sbiluquic te mach'atic ayic ta stojol sloq'uib c'ahc'al. Te Edom soc Moab ya me yac' sbahic ta a'batinel yu'unic, soc ya me xch'uhumbot sc'op yu'un te sts'umbal Amón.

¹⁵ Te Jehová ya me staquijtes te mar te ochem bahel ta nopol Egipto, soc ya me stij sc'ab ta stojol te muc'ul-ha' Éufrates, ya yac' bahel te q'uixin ic' yu'un, ya yac' te huqueb ya xjetin a, hich ya xhu' ya xc'axic bahel soc stepic a.

¹⁶ Ay me muc'ul be yu'un te pueblo yu'un te hilemic ta Asiria, hich te bin ut'il ay yu'un Israel c'alal loq'uic tal ta sq'uinal Egipto.