Isaías 1 - Bible in Tzeltal Bachajón

Jmulawil nación

¹ Ha snahalsit Isaías snich'an Amoz banti la yilbe sc'oblal Judá soc Jerusalén ta yorahil Uzías, Jotam, Acaz soc Ezequías, ajwaliletic yu'un Judá.

² A'iya awa'iy, ch'ulchan, a'iya awa'iy, bahlumilal; como hich ya yal te Jehová: La jcoltes jnich'nab, la jmuc'ubtes, pero la stoy sbahic ta jtojol.

³ Te j'a'tel-wacax ya sna'be sba te yajwal, te burro ya sna'be sba te yawil swe'el yu'un te yajwal, yan te Israel ma sna', mayuc snopojibal yu'un te pueblo cu'une, xchi.

⁴ ¡Obol aba, jmulawil nación, ha pueblo te bayel smul, ha jcaj ts'umbalil yu'un mach'atic chopol ya'telic, bohl al-nich'anex! ¡La yihquitayic te Jehová, la sp'ajic te Ch'ul Dios yu'un Israel, suht ta spatic ta stojol!

⁵ ¿Bin yu'un te yac ac'an yac awich'ic xan castigo? ¿Ya to bal atoy abahic? Ay ta chamel swohlol ajol, ay ta wocol spisil awo'tan.

⁶ C'alal ta stahn awoc c'alal ta yohlil ajol mayuc banti lec ay, ha ehchen, siht'em, c'a'em; ma ba poxtaybil, ma ba potsbil soc ma ba c'unubtesbil ta aceite.

⁷ Jihnemix te aq'uinal, lajic ta chiq'uel te pueblohetic awu'unic; ta asitic la swe'beyex te ts'unub awawalic te jyanlumetic, jihnem, hich te bin ya yich' jinel yu'un jyanlumetic.

⁸ Te yantsil-nich'an Sión hich hil te bin ut'il yaxna ta ts'usubil, hich te bin ut'il lehchel-patna ta banti ts'umbil melón, hich te bin ut'il pueblo te joytaybil yu'un scontra.

⁹ Te manchuc la yihquitaybotic jtut chahp te Jehová te scuentahinej spisil, hich c'ohotic te bin ut'il Sodoma, hich te bin ut'il Gomorra, te hichuque.

Tsitsel te yacuc suhtes yo'tanic ta smelelil

¹⁰ ¡Príncipaletic yu'un Sodoma, a'iybeya awa'iyic te sc'op Jehová! ¡Pueblo yu'un Gomorra, a'iybeya awa'iy te ley yu'un te Dios cu'untique!

¹¹ Hich ya yal te Jehová: ¿Bistuc cu'un te bayel milbil mahtaniletic awu'unic? C'axemix co'tan yu'un te scohtol chic'bil tat tuminchijetic soc te sjuhp'el chambahlametic; ma jc'an te sch'ich'el torohetic, tuminchijetic o tat tentsunetic.

¹² ¿Mach'a la sc'ambeyex ini te c'alal ya xtalex ta jtojol, yu'un yac ats'o'ic ta teq'uel te amaq'uetic yu'un te templo cu'une?

¹³ Ma me xawich'boniquix tal mahtanil te mayuc sc'oblal; ya quihlay te pom. Ma xcuhchix cu'un te yuhnenal u, te sc'ahc'alel cux-o'tan soc te tsoblejetic awu'unique.

¹⁴ Ya quihlay te q'uinetic yu'un yuhnenal u soc te tsoblejetic awu'unic; al c'ohem ya ca'iy, luhbenonix ta scuchel.

¹⁵ Te c'alal yac ahach ac'abic ta jtojol, ya jnac' jsit ta atojolic; aunque bayel yac ac'opononic, ma ba ya ca'iybeyex; yatinej ch'ich' te ac'abique.

¹⁶ Poca abahic, lecubtesa abahic, loq'uesa bahel ta jsit te chopol awa'telic; ihquitayahic hilel spasel te bin ma lecuc,

¹⁷ nopahic spasel te bin lec, lehahic te bin stojil ta pasel, coltayahic te mach'a ay ta tulan uts'inel, toj me xachahpanic te me'ba' alaletic, c'opojanic yu'un te me'ba' antsetique.

¹⁸ La'ic, xchi te Jehová, ya jchahpantic te c'op ini: aunque hich amulic te bin ut'il buen tsaj, buen sac ya xhilic hich te bin ut'il me'sic; aunque hich ayic te bin ut'il c'ax tsaj, hich sac ya xc'ohtic te bin ut'il sac stsotsel tuminchij.

¹⁹ Teme yac ac'anic soc teme yac ach'uhunique, ya me awe'ic te bintic lec ya xloc' ta q'uinal;

²⁰ yan teme ma xac'anic soc teme yac atoy abahique, ya me xlajex ta espada, xchi. Hich yaloj te Jehová.

Chahpanel soc coltayel yu'un Jerusalén

²¹ ¡Ilawil bin ut'il sutp'ij ta j'antsinel-ants te pueblo te jun yo'tan! Ta nahil nojel ta bin stojil ta pasel, nahinem tey a te bin toj ay, ¡pero ta ora ini nahinemic tey a te jmilawetique!

²² Te plata awu'un c'atp'ujem ta c'a'pal, capal ta ha' te vino awu'une.

²³ Te príncipaletic awu'un ha jtoybahetic soc smohlol j'eleq'uetic. Spisilic toyol yo'tanic ya schon sbahic soc ya st'unic bahel mahtaniletic; ma ba toj ya schahpanic te me'ba'etic, soc ma xc'oht ta stojolic te swocol te me'ba' antsetique.

²⁴ Ha yu'un hich ya yal te Cajwaltic, te Jehová te scuentahinej spisil, te Mach'a Tulan yu'un Israel: ¡Tiq'uix a! ¡Ya ca'be stoj te jcontratac, ya ca'be spacol te mach'atic ya scontrahinonic!

²⁵ Ya jach jc'ab ta acontra; ya jpocbat ta lejía te awabaquil soc ya jloq'uesbat spisil abohlil.

²⁶ Ya cac' te hich ya xc'oht te juecetic awu'un te bin ut'il ta nahil to, soc te j'ac'-o'taniletic awu'unic hich te bin ut'il ta shahchibal; ta patil hich ya x'a'botat abihilin: Pueblo yu'un tojil-o'tanil, Pueblo te jun yo'tan ta jtojol.

²⁷ Ya x'ac'ot ta libre te Sión ta scuenta toj-o'tanil, te mach'atic suhtem yo'tanic ya x'ac'otic ta libre ta scuenta bin toj ay ta pasel.

²⁸ Pero te jtoybahetic soc te jmulawiletic ya me xjihnic, soc te mach'atic ya yihquitayic te Jehová ya me xlajic.

²⁹ Ya xq'uexawex yu'un te jihte'etic te la amulanic; soc ya yaq'uex ta q'uexlal te ts'umbil q'uinal te tsahbil awu'unique.

³⁰ Hich ya xc'ohex te bin ut'il jihte' te taquijem ya'binal, hich te bin ut'il ts'umbil q'uinal te mayuc ya'lel.

³¹ Te mach'a ay yip hich ya xc'oht te bin ut'il taquin ac, soc te ya'tel hich te bin ut'il nich-c'ahc'; ta schebal pajal ya xchic'otic, soc mayuc mach'a ya stup', xchi te Jehová.