Hechos 6 - Bible in Tzeltal Bachajón

La yich' tsahel huctuhl diáconohetic

¹ Ta hich ora, te bin ut'il yac ta p'ohlel te jnopojeletic, hahchic wulajanel te griegohetic ta stojol te hebreohetic yu'un te me'ba' antsetic ma ba ts'acal yac yich'belic te bin ya yich' pucticlambeyel jujun c'ahc'al.

² Ha yu'un te lahchaytuhl jpuc-c'opetic la stsobic tal spisil te jnopojeletic, hich la yalbeyic: Ma snuhp'uc te ya jquehchancotic yalel sc'op Dios yu'un ya ca'telincotic mac'linwanej.

³ Ha yu'un quermanotac, lehahic huctuhl winiquetic ta awohlilic te lec sc'oblalic, te nojel ta yo'tanic te Ch'ul Espíritu soc te ay sp'ijil yo'tanic, ha me ya ca'betic scuentahinic te a'tel ini.

⁴ Te ho'otcotique ya ca'telincotic sc'oponel Dios soc yalel sc'op Dios, xchihic.

⁵ Lec la ya'iyic spisilic, hich la stsahic te Esteban, te ay sch'uhunel yo'tan ta lec soc te nojel ta yo'tan te Ch'ul Espíritu; soc te Felipe, Prócoro, Nicanor, Timón, Parmenas soc te Nicolás te talem ta Antioquía, te ma judíohuc pero te yac'oj sba ta judíohil.

⁶ La stehc'ambeyic ta stojol te jpuc-c'opetic, te ha la sc'opombeyic Dios soc la scajanlambe sc'abic ta sjolic.

⁷ Puhc xan ta lec te sc'op Dios soc bayel p'ohl te jnopojeletic ta Jerusalén; soc ay tsobol sacerdotehetic la yich'ic ta cuenta te bin ay ta ch'uhunel.

Tsacot Esteban

⁸ Te Esteban, bayel yutsil yo'tan soc bayel yip, la spas muc' jchahp a'teliletic soc señahiletic ta yohlil te ants-winiquetique.

⁹ Pero ay mach'atic ayic ta scuenta te sinagoga yu'un te mach'atic libre ayic sbihil, soc te mach'atic talemic ta Cirene, Alejandría, Cilicia soc ta Asia te hahch sten sbahic ta c'op soc te Esteban.

¹⁰ Pero ma ba hu' yu'unic stsalbeyel te sp'ijil yo'tan soc te Espíritu te ha c'opoj ta scuenta.

¹¹ Ha yu'un la stojic lotil testigohetic te yacuc yalic te la ya'iyic te yac ta sbohlc'optayel te Moisés soc te Diose.

¹² Hich la shachbeyic yo'tan te pueblo, te mamaletic soc escribanohetic; ochic ta banti ay te Esteban, la stsaquic loq'uel, la yiq'uic tal ta stojol te chahpajibal.

¹³ La stehc'anic lotil testigohetic te la yalic: Ha'i winic ini ma scom sba ta sbohlc'optayel ha'i ch'ul awilal ini soc te Ley.

¹⁴ La jca'iycotic te la yal te Jesús talem ta Nazaret ya me sjin ha'i ch'ul awilal ini soc ya me sjeltay te costumbrehetic la ya'botic hilel te Moisés, xchihic.

¹⁵ Spisil te mach'atic huhcajtic ta chahpajibal, c'alal la yilbeyic sit yelaw te Esteban, la yilic te sjel ta sit yelaw ch'ul a'bat.