Hechos 24 - Bible in Tzeltal Bachajón

C'opoj Pablo ta stojol gobernador Félix

¹ Ho'eb c'ahc'al ta patil co bahel ta Cesarea te muc'ul sacerdote Ananías soc cha'oxtuhl mamaletic soc Tértulo te ya xc'opoj ta lec; c'oht slehbeyic smul te Pablo ta stojol te gobernador.

² C'alal tal ta iq'uel te Pablo, te Tértulo hahch yalbe smul, hich la yal: Ha'at ta acuenta te ayix ora te lamal q'uinal ya ca'iycotic, soc ta scuenta sp'ijil awo'tan yaquix ta lecubel te jlumalcotique.

³ Ich'bilat ta muc' Félix, ta spisil ora soc ta bayuc ya calcotic wocol yu'un spisil ini.

⁴ Pero scuenta yu'un ma ba ya xhalajat cu'un, ya calbat wocol te ta scuenta yutsil awo'tan yac awa'iybotic cha'oxp'ahluc jc'opcotic.

⁵ La jtahcotic te winic ini te ya yac' wocol soc bayel ya shach c'op ta stojol spisil judíohetic ta swohlol bahlumilal, soc ha jolal yu'un te jchahp nazarenohetic.

⁶ Soc c'an sbohlobtesbe sc'oblal te Templo, ha yu'un la jtsaccotic yu'un c'an jchahpancotic ta scuenta te Ley cu'uncotique.

⁷ Pero te comandante Lisias, ta sc'ahc'al c'oht spojbotic loq'uel ta jc'abcotic,

⁸ soc la spas ta mandar te mach'atic yac slehbebelic smul te ya me xtalic ta atojol. Teme yac awich' ta c'op, ha'at nix ya xhu' yac ana' spisil te bintic yac jlehbebelcotic smul yu'une, xchi.

⁹ Ha nix hich te judíohetic la yalic te hich ay.

¹⁰ Te gobernador la ya'be seña yil te Pablo te ya xc'opoj. Hich la yal te Pablo: Jna'oj te ayix bayel ha'bil te ayat ta juez ta nación ini, ha yu'un jun co'tan ya jcoltay jba ta atojol.

¹¹ Ya xhu' yac ana' te ma to xloc' lahchayeb (12) c'ahc'al te c'ohon ta yich'el ta muc' Dios ta Jerusalén.

¹² Mayuc mach'a la stahon te yacon ta stijel ta c'op o te ya hach c'op ta stojol te ants-winiquetic, ta Templo, ta sinagogahetic o ta pueblo.

¹³ Soc ma xhu' ya yaq'uic ta ilel te ha smelelil te bin yac slehbeloniquix jmul a.

¹⁴ Pero ya calbat ta jamal te hich ya quich' ta muc' a te Dios yu'un te jme'jtat te bin ut'il ay ta ch'uhunel te Be, te ma ha'uc smelelil ta sc'opique. Jch'uhunej spisil te Ley soc te bintic ts'ihbabil hilel yu'un te jalwanejetic;

¹⁵ ha smuc'ulinej co'tan ta stojol Dios, hich te bin ut'il te mach'atic li' ayique, ha te ay cha'cuxajel yu'un te mach'atic chamenic, te mach'atic toj yo'tanic soc te mach'atic ma ba toj yo'tanic.

¹⁶ Ha scuentahil te spisil ora ya jc'an te lec co'tan ya ca'iy ta stojol Dios soc ta stojol ants-winiquetic.

¹⁷ C'alal c'axix ha'bil a, tal ca'be hilel smahtan te jlumal soc tal ca'be smahtan te Diose.

¹⁸ Lecubtesbilix jc'oblal a, hich yacon ta spasel c'alal la stahonic ta Templo cha'oxtuhl judíohetic talemic ta Asia, mayuc tsobol mach'atic tey ayic a soc mayuc la hach c'op tey a.

¹⁹ Ha nix ac'a tal stehc'an sbahic ta atojol ta yalel te bin jmulinej, teme ay bin ma lecuc la jpas la yilique.

²⁰ O ha nix ac'a yalic te mach'atic li' ayic teme ay bin chopol la stahbonic te c'alal tehc'anoton ta stojol te jchahpanwanejetic;

²¹ o teme ha nix yu'un te hich tulan la jcal ta yohlilic: Ha ta scuenta te cha'cuxajel yu'un te mach'atic chamenic te yac awich'belonic ta c'op yu'un ta ora ini, xchi te Pablo.

²² C'alal hich la ya'iy te Félix, te bin ut'il sna'oj ta lec bin ut'il ay te Be, la smac ta c'op, hich la yal: Te c'alal ya xtal te comandante Lisias, ya jlajin schahpanel te c'op awu'un, xchi.

²³ Hich la spas ta mandar te capitán-soldado te ya scanantay te Pablo, pero te ya xhil ta libre jtebuc, soc manchuc ya scom te mach'atic ay yu'un te ya xtal ta c'uxultayel yu'une.

²⁴ Cheb oxeb c'ahc'al ta patil, tal te Félix soc Drusila te yihnam, te ha judia-ants. La sticon ta iq'uel te Pablo, la ya'iybe sc'oblal bin ut'il ay ta ch'uhunel te Jesucristo.

²⁵ Pero te c'alal halbot yu'un te Pablo bin ut'il ay te toj-o'tanil, te bin ut'il ya scom sba, soc bin ut'il ay sc'oblal te ich'el ta c'op te ya xtale, xiw yo'tan yu'un te Félix, hich la yalbe: Bahanix, c'alal ay tiempo cu'un ya jticonat xan ta iq'uel, xchi.

²⁶ Soc yac ta smahliyel te ya x'a'bot taq'uin yu'un te Pablo scuenta yu'un ya scoltay bahel a. Ha scuentahil te bayel buelta la sticon ta iq'uel tal yu'un ya sc'opon.

²⁷ C'alal ts'acay cheb ha'bil, hil ta sjelol Félix te Porcio Festo. Pero te Félix la sc'an te lecuc yo'tanic ya xhilic yu'un te judíohetic, hich hil ta chuquel yu'un te Pablo.