Hechos 20 - Bible in Tzeltal Bachajón

Pablo baht ta Macedonia soc Grecia

¹ C'alal lahmaj te c'op, te Pablo la sticon ta iq'uel tal te jnopojeletic, la ya'be xan yip yo'tanic soc la spatbe hilel yo'tanic, hich loc' bahel, baht ta Macedonia.

² La yocliy bahel te q'uinal tey a, bayel bintic la yalbe ya'iyic ta ya'beyel yip yo'tanic, patil c'oht ta Grecia.

³ Oxeb u halaj tey a. Te judíohetic la schap sc'opic ta scontrahinel te c'alal nopol ya xloc' bahel ta barco ta Siria, hich la snop ta yo'tan te ya suht bahel ta Macedonia.

⁴ Joquinot bahel c'alal Asia yu'un te Sópater snich'an Pirro, te talem ta Berea, Aristarco soc Segundo te talemic ta Tesalónica, Gayo te talem ta Derbe, Timoteo, soc te Tíquico soc Trófimo te talemic ta Asia.

⁵ Ha nahilijemic bahel, la smahliyotcotic ta Troas.

⁶ C'alal c'axix a te Q'uin yu'un Pan te ma ba yich'oj levadura, loc'otcotic ta barco ta Filipos, ho'eb c'ahc'al ta patil la jtsohb jbahcotic soc te yantic ta Troas, te banti halajotcotic huqueb c'ahc'al.

Pablo c'ax yil te jnopojeletic ta Troas

⁷ Ta sba c'ahc'alil semana, c'alal jtsoboj jbahcotic ta xet'el te pan, la ya'iy p'ijubteswanej te Pablo, yu'un pajel xanix ya xbaht a. Halaj ta c'op c'alal la sta ohlil ahc'abal.

⁸ Ay tsobol tsunticlambil c'ahc' ta banti stsoboj sbahic ta tsahlul na.

⁹ Ay jtuhl querem, Eutico sbihil, hucul ta ventana, och swayel, como halaj ta c'op te Pablo. Tsalot yu'un swayel, hich ch'ay cohel ta yoxcajal na, chamenix a c'oht shachic ta lum.

¹⁰ Ha yu'un co bahel te Pablo, la spahcan sba ta sba te querem, la spet, hich la yal: Ma me xamel awo'tanic, cuxul, xchi.

¹¹ Hich mo xan bahel, la xet' te pan soc la swe'ic, soc halaj ta c'op ha to c'alal sacub q'uinal, hich baht.

¹² Cuxul la yiq'uic bahel te querem, tse'el yo'tanic yu'un ta spisilic.

Loc' ta Troas baht ta Mileto

¹³ Te ho'otcotic nahil bohotcotic ta barco ta Asón ta banti la jquic'cotic te Pablo, como yaloj te ya sc'an ya xbehen ta yoc.

¹⁴ C'alal la stahotcotic ta Asón, la jquic'cotic ochel ta barco, bohotcotic ta Mitilene.

¹⁵ Hahchotcotic bahel tey a, ta schebal c'ahc'al c'ohotcotic ta Quío. Ta yoxebal c'ahc'al c'ohotcotic ta Samos. Bohotcotic ta Trogilio, ta schanebal c'ahc'al c'ohotcotic ta Mileto.

¹⁶ Te Pablo snopoj te ma ba ya xc'ax ta Éfeso, yu'un ma ba la sc'an ya xhalaj xan ta Asia yu'un la suj sba te ayuquix ta Jerusalén ta yorahil te Q'uin Pentecostés, teme hu' yu'une.

Pablo la sc'opon hilel ancianohetic ta Mileto

¹⁷ Ta Mileto la sticonlan ta iq'uel te ancianohetic yu'un te iglesia ta Éfeso.

¹⁸ C'alal hulic tal ta stojol, hich la yalbe ya'iyic: Ana'ojic bin yilel jtalel te jayeb c'ahc'al ayon ta awohlilic c'alal ta shahchibal c'ahc'al te hulon tal ta Asia,

¹⁹ peq'uel la jcac' jba ta a'batinel yu'un te Cajwaltic, soc bayel ya'lel jsit soc bayel tsajel tal ta jtojol yu'un te judíohetique;

²⁰ soc mayuc bin ma ba la jcalbeyex te bin ya xtuhun awu'unic, la jca'beyex anopic ta comonsitil soc ta jujun na.

²¹ Jamal la jcalbe ya'iyic judíohetic soc jyanlumetic bin ut'il ya sc'an ya suhtes yo'tanic ta stojol Dios soc bin ut'il ya sc'an ya sch'uhunic te Cajwaltic Jesucristo.

²² Yo'tic, te bin ut'il sujbilon yu'un te Espíritu, ya xbohon ta Jerusalén, ma jna' bin ya xc'oht ta jcuenta tey a;

²³ ha nax jna'oj te ta jujun pueblo ya yal te Ch'ul Espíritu te yac smahliybelon chuquel soc wocol tey a.

²⁴ Pero mayuc sc'oblal ta co'tan te jcuxlejal, ha nax ay sc'oblal te yacuc xhu' cu'un slajinel soc yutsil co'tan te ahnimal soc te ca'tel quich'oj yu'un te Cajwaltic Jesús, ha te yalbeyel sc'oblal te lec yach'il c'op yu'un te yutsil yo'tan te Diose.

²⁵ Yo'tic jna'oj te mayuc bin ora yac awilbonic xan jsit ta apisilic, ha'ex te behenemon ta awohlilic ta yalbeyel sc'oblal te cuentahinel yu'un Dios.

²⁶ Ha yu'un ha'i c'ahc'al ini ya calbeyex ta jamal te mayuc ta jcuenta te sch'ich'el ta spisilic,

²⁷ como ma ba la jmuc ta co'tan te la jcalbeyex spisil bintic schapoj te Diose.

²⁸ Ha yu'un canantaya abahic soc canantayahic spisil te tuminchijetic te awich'oj awa'telic ta obispo ta scuenta te Ch'ul Espíritu, scuenta yu'un yac amac'linic te iglesia yu'un te Cajwaltic, te ha la sman ta scuenta sch'ich'el,

²⁹ yu'un jna'oj te c'alal ya xloc'on bahel ya me x'och tal ta awohlilic ti'awal chojetic te ya slajin te tuminchijetique.

³⁰ Soc ya me xchicnaj ta awohlilic winiquetic te ya yaq'uic ta nopel lotil c'opetic yu'un ya xt'unotic yu'un te jnopojeletique.

³¹ Ha yu'un tsahtaya me abahic, soc na'ahic me te oxeb ha'bil te c'ahc'al ahc'abal ma ba la jquehchan jtsitsbelex ta tuhlutuhl soc ya'lel jsit.

³² Yo'tic, quermanotac, ya caq'uex hilel ta stojol Dios soc te c'op yu'un te yutsil yo'tan, te ay yu'el te ya ya'beyex yip awo'tanic soc pajal ya ya'beyex awich'ic hilel soc te mach'atic ch'uhltesbilic te bin quechel yac awich'ique.

³³ Mayuc mach'a la jbic'sitaybe plata, oro, o sc'u' spac'.

³⁴ Ana'ojic te ho'on nix ta jc'ab la jle spisil bintic tuhun cu'un soc te mach'atic sjoquinejonic.

³⁵ Ta spisil ini la jca'beyex anopic, teme hich ya x'a'tejex, ya xhu' yac acoltayic te mach'atic mayuc bin ay yu'unic. Soc na'ahic me te bin la yal te Cajwaltic Jesús: Ha bayel xan yutsil te mach'a ay bin ya yac' te bin ut'il ay bin ya yich', te xchihe, xchi.

³⁶ C'alal laj yalbel a ini, la squejan sba, la sc'opon Dios soc te yantique.

³⁷ Bayel oq'uic soc spisilic la smech'ic te Pablo soc la yuhts'uyic.

³⁸ Bayel c'ux la ya'iyic yu'un te bin la yal te Pablo te ma ba ya yilbeyic xan sit. Patil la sjoquinic bahel c'alal ta barco.