Hechos 11 - Bible in Tzeltal Bachajón

Pedro la yal ta stojol iglesia bin la spas

¹ La ya'iyic te jpuc-c'opetic soc te yermanotac te ayic ta Judea te ha nix hich sch'uhunejic te sc'op Dios te jyanlumetique.

² Ha yu'un te c'alal mo bahel ta Jerusalén te Pedro, tijot ta c'op yu'un te mach'atic bayel sc'oblal yu'unic te circuncisión,

³ hich la yalic: ¿Bin yu'un ochat ta sna soc la ajoquin ta we'el te mach'atic ma ba yich'ojic circuncisión? la yutic.

⁴ Ha yu'un te Pedro xmelmon hahch yalbe ya'iyic spisil bintic c'ohem ta pasel, hich la yal:

⁵ Te c'alal ayon ta Jope, yacon ta sc'oponel Dios a yanij q'uinal la jca'iy, la jquil ta jnahalsit hich te bin ut'il muc'ul sábana licbil ta schanebal schiquin co tal ta ch'ulchan, hul ta jtojol.

⁶ C'alal la jquil ta lec, la jquil chambahlametic, ti'awal chambahlametic, chanetic soc ha'mal mutetic.

⁷ La jca'iy c'op te hich la yal: Hahchan, Pedro, mila ati', xchi.

⁸ Ma'uc, Cajwal, mayuc jwe'oj te bintic ma lecuc sc'oblal o te bohloben sc'oblale, xchihon.

⁹ La scha'c'oponon: Te bintic lecuben sc'oblal yu'un Dios, ma xawal te ma lecuc, xchi.

¹⁰ Oxeb buelta hich c'oht ta pasel, patil ich'ot mohel ta ch'ulchan te sábana.

¹¹ Ha yorahil a c'oht oxtuhl winiquetic ta na banti ayon, ticombilic tal ta Cesarea.

¹² Te Espíritu la yalbon te jun co'tan ya joquin bahel. Ha nix la sjoquinon bahel te wactuhl quermanotactic ini, ochotcotic ta sna jtuhl winic

¹³ te la yalbotcotic te la yil jtuhl ch'ul a'bat ta sna te teq'uel c'ohel ta stojol soc hich la yal: Ticona bahel winiquetic ta Jope, ic'a tal te Simón, te Pedro yan sbihil,

¹⁴ ha ya xtal yalbat awa'iy c'opetic te ya xcolat yu'un soc sjunal ana, xchi laj.

¹⁵ C'alal hahchon ta c'op, tal te Ch'ul Espíritu ta stojolic, hich te bin ut'il tal ta jtojoltic ta nahil to.

¹⁶ Hich la jna' te bin la yal te Cajwaltic: Te Juan ha nax la ya'be yich'ic ha', yan te ha'exe ya me awich'ic te Ch'ul Espíritu, te xchihe.

¹⁷ Ha yu'un teme ha nix Dios te hich la yac'ticlambe te mahtanil te bin ut'il te ho'otic te jch'uhunejtic te Cajwaltic Jesucristo, ¿mach'ahon a te ya jcom te Diose? xchi te Pedro.

¹⁸ C'alal hich la ya'iyic, mayuc bin la yalic yu'un, soc la yalbeyic yutsilal te Diose: ¡Ha nix hich Dios la ya'be suhtes yo'tanic scuenta cuxlejal te jyanlumetique! xchihic.

Te iglesia ta Antioquía

¹⁹ Te mach'atic laj puhquemic bahel ta scaj te uts'inel te hahch ta scuenta Esteban, ay c'ohtic ta Fenicia, Chipre soc Antioquía, mayuc mach'a yan la yalbeyic te lec yach'il c'op, ha nax te judíohetique.

²⁰ Pero ay mach'a talemic ta sq'uinal Chipre soc ta Cirene, c'alal ochic ta Antioquía la yalbeyic te griegohetic te lec yach'il c'op yu'un te Cajwaltic Jesús.

²¹ Joquimbilic yu'un te yu'el Cajwaltic, tsobol mach'atic la sch'uhunic soc la suhtes yo'tanic ta stojol te Cajwaltique.

²² Te iglesia ta Jerusalén la ya'iyic, ha yu'un la sticonic bahel ta Antioquía te Bernabé.

²³ C'alal c'oht tey a te Bernabé, tse'el yo'tan yu'un te c'alal la yil te yutsil yo'tan Dios; la stsitsticlan te junuc me yo'tan ya x'ayinic ta stojol te Cajwaltique.

²⁴ Buen lec yo'tan te Bernabé, ha nojel ta yo'tan te Ch'ul Espíritu soc ay bayel sch'uhunel yo'tan. Tsobol mach'atic tal ta stojol te Cajwaltique.

²⁵ Patil baht ta Tarso te Bernabé ta slehel te Saulo; c'alal la sta, la yic' tal ta Antioquía.

²⁶ Jun ha'bil la sjoquinic te iglesia, tsobol mach'atic la sp'ijubteslanic. Tey ta Antioquía nahil a'bot sbihilinic cristianohetic te jnopojeletique.

²⁷ Ha yorahil a, ay c'ohtic ta Antioquía jalwanejetic te talemic ta Jerusalén.

²⁸ La stehc'an sba te jtuhle, Agabo sbihil, a'bot sna' yu'un te Ch'ul Espíritu te ya xtal bayel wi'nal ta spahmal q'uinal. Ha c'oht ta pasel te c'alal ay ta ajwalil a te Claudio.

²⁹ Ha yu'un te jnopojeletic la snopic te ya sticombeyic scoltayel te yermanotac te nahinemic ta Judea, ha chican jayeb ay yu'un jujutuhl;

³⁰ hich la spasic, la sticombeyic bahel smahtanic te ancianohetic ta scuenta te Bernabé soc Saulo.