Hebreos 8 - Bible in Tzeltal Bachajón

Te Jesús Jc'asesej-c'op yu'un yach'il chapbil-c'op

¹ Yo'tic, te bin tulan sc'oblal te yacotcotic ta yalel, ha te ayix te muc'ul sacerdote cu'untic te c'oht shuhcan sba ta swa'el-c'ab ta smuc'ul-huctajib te Mach'a c'ax bayel yutsilal ta ch'ulchan.

² Ayix ta a'tel ta ch'ul awilal, ha te smelelil nahilpac' templo te pasbil yu'un Cajwaltic, ma ha'uc pasbil yu'un winiquetic.

³ Spisil te muc'ul sacerdotehetic tsahbilic yu'un ya ya'beyic mahtaniletic soc milbil mahtaniletic te Diose, ha scuentahil te la sc'an te ha nix hich ay bin la ya'be smahtanin Dios te Jesucristo.

⁴ Te li'uc ay ta bahlumilal, ma ba ay ta sacerdotehil te hichuque, como ay sacerdotehetic te ya'telinejic ya'beyel smahtan Dios hich te bin ut'il ya yal te Ley.

⁵ Te ya'telic ha seña soc ha yaxinal te bintic ay ta ch'ulchan, hich te bin ut'il a'bot sna' te Moisés c'alal hahch spas te nahilpac' templo, te hich halbot: Ilawil, pasa spisil hich te bin ut'il ay te seña la jca'bat awil ta wits, te xchihe.

⁶ Pero yo'tic c'ax lec xan te ya'tel yich'oj Jesús, hich te bin ut'il c'ax lec xan te chapbil-c'op te ha Jc'asesej-c'op yu'une, te la yich' aq'uel ta scuenta te bin yaloj Dios te ha c'ax lec xane.

⁷ Te yu'unuc mayuc bin jihnem yu'un te shahchibal chapbil-c'op, ma ba la yich' chapel te schebal te hichuque.

⁸ Hich la yal te Dios te c'alal la stij ta c'op te israeletique: Ya me sta yorahil, xchi te Cajwaltic, te ya jchap yach'il chapbil-c'op soc te na yu'un Israel soc yu'un Judá.

⁹ Ma hichuc te bin ut'il te chapbil-c'op la jchap soc te antiguo sme'static te c'alal la jnit loq'uel ta sc'abic ta sq'uinal Egipto. Como ma ba jun yo'tanic ta stojol te chapbil-c'op, ha yu'un la jquihquitayic hilel, xchi te Cajwaltique.

¹⁰ Ha yu'un hich ay te chapbil-c'op ya jpas soc te na yu'un Israel ta patil, xchi te Cajwaltic: Ya cac' ta spensaric te leyetic cu'un, ya jts'ihbabe ta yo'tanic; ho'on Dioson yu'unic ya xc'ohon, soc ha pueblo cu'un ya xc'ohtic.

¹¹ Mayuc mach'a ya snohptes te spat-xuhc, soc mayuc mach'a hich ya yalbe te yermano: Na'beya sba te Cajwaltic, te ya yute, como spisilic ya me sna'bonic jba, muc' biq'uitetic.

¹² Yu'un ya jpasbe perdón yu'un te bintic ma stojiluc ya spasic soc ma jaymehl ya jna'be xan te smulique, xchi te Diose.

¹³ Te bin ut'il la yal: Yach'il chapbil-c'op, te xchihe, yu'un nix lajix sc'oblal a te bin nahil chapbile; te bin lajix sc'oblal soc te ya xpoco'ub, nopol ya xch'ayix bahel.