Hebreos 5 - Bible in Tzeltal Bachajón

¹ Spisil te muc'ul sacerdotehetic tsahbilic ta yohlil winiquetic soc yich'oj ya'telic te ya xc'opoj yu'unic ta stojol Dios soc te ya ya'behic Dios mahtaniletic soc milbil mahtaniletic yu'un stojel mulil.

² Ya xhu' ya xcuhch yu'un te mach'atic ma sna'ic stsahtayel sbahic soc te mach'atic ya xhowiyic, como ha nix hich mayuc yip,

³ ha scuentahil te ya sc'an ya yac' milbil mahtaniletic yu'un stojel smul soc stojel te smul te pueblo.

⁴ Mayuc mach'a stuquel-o'tan nax ya yac' sba ta muc'ul sacerdotehil, ya sc'an ya x'ic'ot yu'un Dios, hich te bin ut'il ic'ot te Aarón.

⁵ Ha nix hich te Cristo, ma ba la sle yutsilal stuquel yu'un ya yotses sba ta muc'ul sacerdote, pero hich halbot yu'un Dios: Ha'at jnich'anat; nax to nax ayinat cu'un, xchi sc'oblal.

⁶ Soc hich te bin ut'il ya yal ta yan lugar: Ha'at sacerdotehat sbahtel q'uinal, hich te bin ut'il te Melquisedec, xchi.

⁷ Te c'alal ay ta bahlumilal ta scuxlejal a te Cristo, tulan awon soc oc' ta sc'oponel te Mach'a ya xhu' ya x'ac'to ta libre yu'un lajel, soc a'iybot sc'op ta scaj te peq'uel la yac' sba.

⁸ Aunque ha Nich'anil, tey la snop sch'uhunel mandar a ta scuenta te c'ax bayel swocol;

⁹ soc te c'alal ts'acal c'oht, ha J'ac'-colel c'oht scuenta sbahtel q'uinal yu'un te mach'atic ya sch'uhumbeyic smandar,

¹⁰ soc a'bot yich' ya'tel yu'un Dios ta muc'ul sacerdotehil hich te bin ut'il Melquisedec.

Tsitsel te manchuc ya sch'ay sch'uhunel co'tantic

¹¹ Ay to bayel bin ya jc'an ya calbecotic sc'oblal, pero wocol ta jambeyel sc'oblal como ma ba ya xnohp awu'unic ta ora.

¹² Ya sc'an te ha'uquex yac awa'iyiquix p'ijubteswanej te bin ut'il ayix ora te ach'uhunejique, pero ya sc'an te yac awich'ic xan p'ijubtesel a te bin ut'il ay te shahchibal ta nopel te sc'op Diose. Ya to xtuhun awu'unic chu'ul, ma ha'uc te tulan we'elil.

¹³ Spisil te mach'atic cuxulic to ta chu'ul ma sna'beyic scuentahil te nohptesel yu'un te bin lec ta pasel, como alal to.

¹⁴ Yan te mach'atic muq'uiquix ha ya xtuhun yu'unic te tulan we'elil, ha te mach'atic ta scuenta spasulanel la snopic stsahtayel te bintic lec soc te bintic ma lecuque.