Hebreos 4 - Bible in Tzeltal Bachajón

¹ Ha yu'un, te bin ut'il cuxul to te bin yaloj ta jamal, te ya xhu' ya x'ochotic te banti ay te cux-o'tanil yu'une, ac'a jtsahtay jbahtic te ma me ayuc mach'a ma ba ya sta sc'ohel.

² Como hich nix halot ca'iytic te lec yach'il c'op, hich te bin ut'il halbot ya'iyique; pero tojol c'oht te la ya'iyic, como ma ba la snuhp'in soc sch'uhunel yo'tanic te bin halbot ya'iyique.

³ Yan te jayebotic te jch'uhunejtiquix ya xhu' ya x'ochotic ta banti ay te cux-o'tanil, hich te bin ut'il yaloj te Diose: Ha yu'un la jcal ta jamal ta scuenta quilimba: Mayuc bin ora ya x'ochic ta banti ay te cux-o'tanil cu'une, xchi, aunque hu'emix ya'tel c'alal to ta shahchibal te bahlumilale,

⁴ como ay banti hich la yalbe sc'oblal te shuquebal c'ahc'al: Ta shuquebal c'ahc'al la scux yo'tan Dios yu'un spisil ya'tel, xchi.

⁵ Soc hich ya yal yan buelta: Ma x'ochic ta banti ay te cux-o'tanil cu'une, te xchihe.

⁶ Ha yu'un ya to sc'an te ay mach'atic ya x'ochic te banti ay te cux-o'tanil, yan te mach'atic nahil halbot ya'iyic te lequil c'op, ma ba ochic ta scaj te la sc'axuntayic mandar.

⁷ Ha yu'un Dios la slehbe yan sc'ahc'alel, ha'ix te: Yo'tic, xchi, te halbot sc'oblal yu'un David bayel ha'bil ta patil, te c'alal hich la yal: Teme yac awa'iybeyic sc'op yo'tic, ma me tulanuc xawac' awo'tanic, te xchihe.

⁸ Te ha'uc te Josué la yac'ticlambe cux-o'tanil te israeletic, te Dios ma ba la yalbe sc'oblal yan sc'ahc'alel te hichuque.

⁹ Ha yu'un ay to te cux-o'tanil yu'un te pueblo yu'un Dios,

¹⁰ como te mach'a ochemix ta cux-o'tanil ya scuxix yo'tan yu'un te ya'tel, hich te bin ut'il la scux yo'tan Dios yu'un te ya'tele.

¹¹ Ha yu'un ac'a me cac'tic fuersa te yacuc x'ochotic ta banti ay te cux-o'tanil, scuenta yu'un mayuc mach'a ya xyahl ta scuenta sc'axuntayel c'op hich te bin ut'il la spasique.

¹² Cuxul te sc'op Dios soc ay yu'el ya x'a'tej, c'ax hich ya xbojawan a te bin ut'il espada te scha'bunjehchel ay ye te ya sta c'ohel ta c'ubul banti ya sjat te ch'uhlelal soc te espíritu, ya sjat te sts'acomba baq'uet soc stanahul, ya stsahtay te jpensartic soc bintic ya sc'an ya spas te co'tantique.

¹³ Mayuc bin pasbil te ma ba ya x'ilot yu'un Dios; spisil jamal chican ta ilel ta sit te Mach'a ya xc'ohotic ta pasbeyel cuenta yu'une.

Ha muc'ul sacerdote te Jesús

¹⁴ Ha yu'un, te bin ut'il ay muc'ul sacerdote cu'untic te sohl bahel ta ch'ulchan, ha te Jesús te Snich'an Dios, ma me xquihquitaytic te bin jch'uhunejtique.

¹⁵ Como te muc'ul sacerdote cu'untic ma yu'unuc ma sna'botic yo'bolil jbahtic yu'un te mayuc quiptic, como hich nix la ya'iy tsajel ta spisil hich te bin ut'il te ho'otic, pero ma ba stahoj smul stuquel.

¹⁶ Ha yu'un junuc co'tantic ac'a nopojucotic bahel ta stojol te muc'ul-huctajibal yu'un Dios banti ay yutsil-o'tanil, scuenta yu'un ya jtahtic c'uxultayel soc yu'el te ya scoltayotic ta yorahil te jwocoltique.