Hebreos 3 - Bible in Tzeltal Bachajón

Toyol yu'un Moisés te Jesús

¹ Ha yu'un, quermanotac te ch'ultesbilex, te pajal ic'bilotic yu'un Dios, na'a me te Jesús, te jpuc-c'op soc muc'ul sacerdote, te ya caltic ta jamal te ha jch'uhunejtic,

² te jun yo'tan ta stojol te mach'a a'bot yich' ya'tel yu'un, hich te bin ut'il jun yo'tan te Moisés ta stojol spisil te na yu'un Dios.

³ Te Jesús c'ax hich ay ta ich'el ta muc' a te bin ut'il te Moisés, hich te bin ut'il c'ax hich ay ta ich'el ta muc' a te jpas-na te bin ut'il te nahe.

⁴ Como spisil nahetic ay mach'a pasot yu'un, pero ha Dios te la spas spisil bintic ay.

⁵ Te Moisés, te bin ut'il ha a'bat, jun yo'tan ay ta spisil te na yu'un Dios, soc la yal ta testigo-c'op te bin ya yich' halel ta patil.

⁶ Yan te Cristo, te bin ut'il ha nich'anil, jun yo'tan scuentahimbeyej te na yu'un Dios. Ho'otic te snahotic, teme stalel ay c'alal ta slajibal c'ahc'al te smuc'ul co'tantic soc te ya xtohy q'uinal ca'iytic yu'un te bin yacotic ta smahliyel.

Te cux-o'tanil yu'un te pueblo yu'un Dios

⁷ Ha yu'un, hich te bin ut'il ya yal te Ch'ul Espíritu: Teme yac awa'iybeyic sc'op yo'tic,

⁸ ma me tulanuc xawac' awo'tanic, hich te bin ut'il la stoy sbahic ta yorahil tsajel ta jochol taquin q'uinal,

⁹ te banti la stsajon yilic te antiguo ame'atatic, la spasonic ta prueba soc cha'winic (40) ha'bil la yilbonic te ca'tele.

¹⁰ Ha scuentahil te ilinon ta stojol te jcaj ts'umbalil ini, hich la jcal: Jc'axel howiyem yo'tanic, ma sna'beyic sba te behetic cu'un, xchihon.

¹¹ Ha yu'un la jcal ta jamal ta scuenta quilimba: Mayuc bin ora ya x'ochic ta banti ay te cux-o'tanil cu'une, xchi.

¹² Ha yu'un tsahtaya me abahic, quermanotac, te ma me ayuc mach'a ay chopol yo'tan te ma sch'uhun, te ya spit sba ta stojol te cuxul Dios.

¹³ Jujun c'ahc'al talel c'axel a'beya abahic yip awo'tanic, te c'alal yac to ta halel: Yo'tic, te xchihe, scuenta yu'un ma me ayuc mach'a ya xtulanub yo'tan ta scuenta lo'loyel yu'un mulil,

¹⁴ como jun c'ohemotic soc Cristo teme quich'ojtic c'alal ta slajibal c'ahc'al te smuc'ul co'tantic te ay cu'untic ta shahchibal.

¹⁵ Hich te bin ut'il la yich'ix halel: Teme yac awa'iybeyic sc'op yo'tic, ma me tulanuc xawac' awo'tanic, hich te bin ut'il la stoy sbahic, xchi.

¹⁶ ¿Mach'atic a te la ya'iyic soc te la stoy sbahic ta stojol? ¿Ma bal ha'uc spisil te mach'atic ic'otic loq'uel tal ta sq'uinal Egipto yu'un te Moisés?

¹⁷ Soc ¿mach'atic a te ilinem Dios ta stojolic cha'winic (40) ha'bil? ¿Ma bal ha'uc te mach'atic la sta smulic, te hil sbaq'uetalic ta jochol taquin q'uinal?

¹⁸ Soc ¿mach'atic a te jc'axel halbotic yu'un Dios te ma ba ya x'ochic ta cux-o'tanil yu'une? ¿Ma bal ha'uc te mach'atic la sc'axuntaybeyic te sc'ope?

¹⁹ Ha yu'un ya quiltic te ma ba hu' yochelic ta scaj te ma ba la sch'uhunique.