Hebreos 2 - Bible in Tzeltal Bachajón

Muc'ul colel

¹ Ha yu'un ya me sc'an te spisil co'tantic ya quich'tic ta cuenta te bintic ca'iyejtic, te manchuc ya xhowiyotic bahel.

² Como teme ay yip te c'op te halbil ta scuenta te ch'ul a'batetic, soc te a'botic stojil castigo spisil te mach'atic la sch'ayic soc la sc'axuntayic mandar,

³ ¿bin ut'il c'an ahnucotic loq'uel teme ma ba ya quich'tic ta cuenta te muc'ul colele? Te colel ini, te nahil halbot sc'oblal yu'un te Cajwaltic, la yalbotic te melel te mach'atic la ya'iyic,

⁴ soc ha nix Dios la yac' ta na'el te melel ta scuenta señahiletic, xchamet yo'tanic yu'un, jchahp a'teliletic, soc mahtaniletic yu'un te Ch'ul Espíritu te la spucticlan ha chican bin ut'il la sc'an yo'tan stuquel.

Te mach'a la spas te colel

⁵ Te Dios ma ha'uc la ya'be scuentahin ch'ul a'batetic te yach'il bahlumilal te talel yac, te yacotcotic ta yalbeyel sc'oblale.

⁶ Pero ay banti mach'a hich la yal: ¿Bin a te ants-winic yu'un te yac ana', te yal-snich'an ants-winiquetic te yac acanantay?

⁷ La apas jteb ma pajaluc soc ch'ul a'batetic, la awa'be scoronahin yutsilal soc ich'el ta muc'

⁸ soc la awac' spisil ta ye'tal yoc, xchi. Te bin ut'il la yac' spisil ta ye'tal yoc, mayuc bin la yihquitay te ma ba la ya'be scuentahin, aunque ma to ba ya quiltic te ay ta cuentahinel yu'un spisil bintic ay.

⁹ Pero ya quiltic te Jesús, te peq'uel xan ac'ot jtebuc yu'un te ch'ul a'batetic, te a'botix yutsilal soc ich'el ta muc' ta scaj te c'ax swocol ta lajel, scuenta yu'un ya ya'iy lajel yu'un jpisiltic ta scuenta yutsil yo'tan Dios.

¹⁰ Te Dios te spasoj soc te scuentahinej spisil bintic ay, ha stojil te la yac' te ts'acal c'oht ta scuenta swocol te mach'a la swehtesbe scolelic, te hich ya xhu' ya yic' bahel ta utsilal tsobol al-nich'anetic.

¹¹ Como te mach'a ya xch'ulteswan soc te mach'atic ya yich'ic ch'ultesel, junax Static; ha yu'un ma xq'uexaw te Jesús ta yalel te ha yermanotac,

¹² hich la yal: Ya calbe abihil te quermanotac; ya jc'ayojtaybat awutsilal ta yohlil mach'atic stsoboj sbahic, xchi.

¹³ Soc hich la yal xan: Ya cac' smuc'ulin co'tan te Diose, xchi. Soc hich la yal xan: Li' ayon soc te al-nich'anetic la ya'bon te Diose, xchi.

¹⁴ Te bin ut'il ch'ich'-baq'uet te al-nich'anetic, ha nix hich la yac' sba te Jesús scuenta yu'un, ta scuenta te laj stuquel, tey ya slajin a te mach'a scuentahinej te lajele, ha te pucuje,

¹⁵ soc tey ya yac' ta libre spisil mach'atic ayic ta mosohil ta spisil scuxlejalic ta scaj te ya xi'ic te lajele.

¹⁶ Jamal chican te ma ha'uc tal scoltay te ch'ul a'batetic, ha tal scoltay te sts'umbal Abraham.

¹⁷ Ha scuentahil te la sc'an te spisil pajal ay soc te yermanotac, scuenta yu'un muc'ul sacerdote ya xc'oht te ya xc'uxultaywan soc te jun yo'tan ta spasel te ya'tel Dios, yu'un ya stojbe smul te pueblo.

¹⁸ Te bin ut'il c'ax swocol yu'un te la ya'iy tsajel, hich ya xhu' yu'un scoltaybel mach'atic ayic ta tsajel.