Hebreos 13 - Bible in Tzeltal Bachajón

Bin ya sc'an ya spasic mach'atic sch'uhunejic Cristo

¹ Spisiluc me ora talel c'axel c'ux yac awa'iy abahic te bin ut'il awermanohix abahique.

² Ma me xch'ay ta awo'tanic te ya x'otseswanex ta anahic, como ay mach'atic hich la spasic te ma ba la sna'ic te la yic' ochel ta snahic ch'ul a'batetic.

³ Na'ahic me te mach'atic ayic ta chuquel, hichuc me ta awo'tanic te bin ut'il pajal ayex ta chuquel soc; soc na'ahic me te mach'atic ayic ta uts'inel, hichuc me xawa'iyic te bin ut'il pajal yac awich'belic uts'inele.

⁴ Apisilic ich'biluc me ta muc' awu'unic te nuhpunel, ma socuc mulil te yac awic' abahique. Ya me x'ich'otic ta c'op yu'un Dios te mach'atic ya ya'iyic chijil-o'tanil soc te ya ya'iyic antsiwej soc antsinel.

⁵ Ma me xbaht ta awo'tanic sbic'sitayel taq'uin, junuc me awo'tanic yu'un te bin ay awu'unic, como hich yaloj te Diose: Ma jaymehl ya jpihtesat; mayuc bin ora ya quihquitayat, xchi.

⁶ Ha yu'un jun co'tantic ya caltic: Ha jcoltaywanej cu'un te Cajwaltic; ma ba ya jxi' te bin ya xhu' ya spasbon te winique.

⁷ Na'ahic me te jcanan awu'unic, te la yalbeyex te sc'op Diose. Na'ahic me bin ut'il c'ohtic ta loq'uel yu'un te bin yilel te scuxlejalic, soc nopbeyahic te sch'uhunel yo'tanique.

⁸ Te Jesucristo stalel ay wojey, yo'tic soc sbahtel q'uinal.

⁹ Ma me xawac' slo'loyex te bintic yantic ay ta nopele. Ha lec te ya yipin co'tantic te yutsil yo'tan Dios, ma ha'uc te mandariletic scuenta we'elil, te mayuc bin la stahic a te mach'atic hich ya spasique.

¹⁰ Ay scajtajib milbil mahtanil cu'untic te ma xhu' ya xwe'ic tey a te mach'atic ya x'a'tejic ta Nahilpac' Templo.

¹¹ Como te muc'ul sacerdote ya yich' ochel ta Mero Ch'ul Awilal te sch'ich'el chambahlametic scuenta milbil mahtanil yu'un stojel mulil, pero te sbaq'uetal te chambahlametic ya yich'ic chiq'uel ta sti'il te campamento.

¹² Ha nix scuentahil a te Jesús c'ax swocol ta sti'il te pueblo scuenta yu'un ya sch'ultes te ants-winiquetic ta scuenta te sch'ich'ele.

¹³ Ha yu'un ac'a loc'ucotic bahel ta stahel ta sti'il te campamento, pajal ac'a cuhchuc cu'untic te p'ajel yu'une,

¹⁴ como mayuc pueblo cu'untic li'i te stalel ay, ha yac jlehbeltic te pueblo te talel yaque.

¹⁵ Ha yu'un ta scuenta Jesús spisiluc me ora ac'a calbetic yutsil sc'oblal te Diose, te ha milbil mahtanil cu'untic c'ohem, ha te jc'optic te ya yalbe ta jamal te sbihile.

¹⁶ Soc ma me xch'ay ta awo'tanic spasel te bin lec soc te talel c'axel yac acoltay abahic, como hich yilel milbil mahtaniletic ini te lec yo'tan Dios yu'une.

¹⁷ Ch'uhumbeyahic smandar te mach'atic scuentahinejex, ac'a abahic ta cuentahinel yu'unic, como hich ya scanantaybeyex ach'uhlelic te bin ut'il mach'atic ya yaq'uic cuenta te ya'telique. Hich me xapasic scuenta yu'un tse'el yo'tanic ya x'a'tejic, te ma x'aletuc yo'tanic awu'unic, como mayuc bin lec yac atahic yu'un.

¹⁸ C'opombotcotic Dios; jna'ojcotic te mayuc bin ya yalbotic te co'tancotic, yu'un ya jc'ancotic te lec spisil bintic ya jpascotique.

¹⁹ C'ax hich ya calbeyex wocol te yacuc ac'opombonic Dios scuenta yu'un ya xhu' ya suhton ta atojolic ta ora.

Bendición

²⁰ Te Dios yu'un lamal q'uinal, te ta scuenta te sch'ich'el te yach'il chapbil-c'op la scha'cuxajtes tal ta lajel te Cajwaltic Jesucristo, te muc'ul Jcanantaywanej yu'un te tuminchijetic,

²¹ ac'a scoltayex ta spasel spisil bintic lec scuenta yu'un yac apasic te bin ya sc'an yo'tan, soc ta scuenta Jesucristo ac'a a'tejuc ta awo'tanic ta spasel te bin lec yo'tan yu'une; ayuc me yutsilal te Cristo scuenta sbahtel q'uinal stuquel. Hichuc.

Slajibal patil-o'tanil

²² Quermanotac, ya calbeyex wocol te yacuc xcuhch awu'unic te c'op yu'un tsitsel, yu'un jteb nax la jts'ihbabeyex.

²³ Ya jc'an yac ana'ic te colix ta chuquel te quermanotic Timoteo; teme tal ta ora, ya xtal quilexcotic.

²⁴ Halbon xcoltanuc spisil te jcuentahinwanejetic awu'unic soc spisil te mach'atic ch'ultesbilique. La sticombeyex spatil awo'tanic te mach'atic talemic ta Italia.

²⁵ Ac'a sjoquinex ta apisilic te yutsil yo'tan Dios. Hichuc.