Hebreos 10 - Bible in Tzeltal Bachajón

¹ Como te Ley, te bin ut'il ha yaxinal te bintic lec te talel yac, te ma ha'uc mero smelelil te bintic aye, ma xhu' yu'un ya slecubtes te mach'atic ya xnopojic ta scuenta te milbil mahtanil ya yich' aq'uel ta jujun ha'bil.

² Te hichuque, ya xlaj ta aq'uel te mahtanil, como te mach'atic ya sch'uhuntayic, teme pocbiliquix, ma ba ya ya'iyiquix ta yo'tanic te ay smulique.

³ Pero te milbil mahtanil te ya yich' aq'uel jujun ha'bil ya ya'be sna'ic te muliletic,

⁴ como ma xhu' yu'un sch'ayel mulil te sch'ich'el torohetic soc tat tentsunetic.

⁵ Ha scuentahil hich la yal te Cristo te c'alal hul ta bahlumilal: Ma ba la ac'an milbil mahtanil soc yan mahtanil; ha la achahpambon jbaq'uetal.

⁶ Ma ba lec awo'tan yu'un chic'bil mahtaniletic soc te mahtaniletic yu'un stojel mulil.

⁷ Ha yu'un la jcal: Ilawil, talemon, Dios cu'un, yu'un ya jpasbat bin ya sc'an awo'tan, hich te bin ut'il ts'ihbabil jc'oblal ta balbil hun, xchi.

⁸ Te bin ut'il nahil la yal: Ma ba la ac'an soc ma ba lec awo'tan yu'un milbil mahtaniletic, yan mahtaniletic, soc mahtaniletic scuenta stojel mulil, (aunque ya yal ta mandariletic te hich ya sc'an aq'uele),

⁹ soc ta patil la yal: Ilawil, talemon, Dios cu'un, yu'un ya jpasbat te bin ya sc'an awo'tan, xchi, hich la sloq'ues te bin nahil ay, yu'un ya yich' hahchel te schebale.

¹⁰ Ta scuenta te hich la sc'an yo'tan te Jesucristo, la jquich'tic lecubtesel ta scuenta te jmehl nax la yac' ta milbil mahtanil te sbaq'uetal ta scuenta sbahtel q'uinal.

¹¹ Spisil te sacerdotehetic jujun c'ahc'al ya ya'telinic yac'ticlanel te milbil mahtaniletic te ma xhu' ya xch'ay mulil yu'une.

¹² Yan te Cristo jmehl nax la yac' sba scuenta milbil mahtanil yu'un muliletic, patil la shuhcan sba ta swa'el-c'ab te Diose.

¹³ Ta hich ora bahel yac ta smahliyel te ha scajtajib yoc ya xc'oht te scontratac,

¹⁴ como ta scuenta junax milbil mahtanil la slecubtes sbahtel q'uinal te mach'atic ch'ultesbilique.

¹⁵ Ha nix hich ya yalbotic ta testigo-c'op te Ch'ul Espíritu, como nahil la yal:

¹⁶ Ha ini te chapbil-c'op ya jpas soc te c'alal ya sta sc'ahc'alel, xchi te Cajwaltic: Ya ca'be ta yo'tanic te mandariletic cu'un, soc ya jts'ihbabe ta spensaric, xchi.

¹⁷ Soc hich la yal xan: Ma jaymehl ya jna'be xan te smulic soc te sc'axun-mandaric, xchi.

¹⁸ Ha yu'un te banti pasbilix perdón yu'unic, ma xtuhunix yan milbil mahtanil yu'un stojel mulil.

Tsitsel te junuc yo'tanic ta stojol Dios

¹⁹ Ha yu'un, quermanotac, jun co'tantic ya xhu' ya x'ochotic bahel ta Mero Ch'ul Awilal ta scuenta sch'ich'el te Jesucristo,

²⁰ ta scuenta te yach'il be te cuxul ay, te la sjambotic ochel ta tsahlul pac', ha te sbaq'uetale.

²¹ Soc ay muc'ul sacerdote cu'untic te scuentahinej te na yu'un Dios.

²² Ha yu'un jun co'tantic ac'a nohpojucotic bahel ta stojol Dios soc lec sch'uhunel co'tantic, pocbiluc me loq'uel spisil sbohlil co'tantic soc pocbiluc ta lequil ha' te jbaq'uetaltique.

²³ Ayuc me yip co'tantic spisil ora ta stojol te bin calojtic te yacotic ta smahliyel, ma me xchebetuc co'tantic, como ma xch'ay te bin yalojix te Diose.

²⁴ Soc ac'a jnoptic bin ut'il talel c'axel ya juc jbahtic ta c'uxultaywanej soc ta spasel lequil a'teliletic,

²⁵ ma me jquehchantic te ya jtsobilan jbahtic, hich te bin ut'il ay c'ahyemic ta spasel, talel c'axel ac'a jtsits jbahtic; soc c'axuc hich ay sc'oblal awu'unic a, te bin ut'il yac awilic te yac ta talel te yorahil ya xtal te Cajwaltique.

Tsitsel yu'un mach'a snopoj mulil

²⁶ Teme colojtic ya jlehulan jmultic te bin ut'il jna'ojtiquix te smelelil c'ope, mayuquix yan milbil mahtanil yu'un stojel te muliletic,

²⁷ ha xanix te castigo te xiweltic sba soc te c'ahc' te xpululet ta tihlel te ya slajinlan mach'atic scontrahinejic te Diose.

²⁸ Te mach'a ya sc'axuntaybe te Ley yu'un Moisés jc'axel ya x'ac'ot ta lajel ta scuenta cheb oxeb testigo.

²⁹ ¿Ma bal c'axemuc to xan hich castigo ya yich' a te mach'a ya sts'o'ts'o'tec' te Snich'an Dios, soc te chopol sc'oblal ya ya'iy te sch'ich'el te chapbil-c'op te yich'oj ch'ultesel a, soc te ya scontrac'optay te Espíritu yu'un yutsil-o'tanil?

³⁰ Como ya jna'betic sba te mach'a hich yaloj: Ho'on ay ta jcuenta spaquel c'abal, ho'on ya ca'be stoj, xchi, soc te hich la yal xan: Te Cajwaltic ya me yich' ta c'op te pueblo yu'une, te xchihe.

³¹ ¡Xiweltic sba teme ay mach'a ya x'ipaj ta sc'ab te cuxul Diose!

³² Pero na'ahic me te bin c'oht ta atojolic ta nahil to, te c'alal ochemexix ta sacal q'uinal a, te cuhch awu'unic awocol ta tsaltamba;

³³ ay la awich'ic ixta'c'optayel soc uts'inel ta comonsitil, soc ay la ajoquinic te mach'atic hich nix c'ax swocolic.

³⁴ Ha nix hich la ana'beyic yo'bolil sbahic te mach'atic chuculic, soc tse'el awo'tanic c'ax awocolic te la awich'ic pojbeyel abiluquic, como la ana'ic te c'ax hich yutsil a te bintic yac awich'ic te ma xlaje.

³⁵ Ha yu'un ma me xch'ay awu'unic te smuc'ul awo'tanic, te ay muc'ul mahtanil yu'une.

³⁶ Ya sc'an te ya xcuhch awu'unic, scuenta yu'un te c'alal apasojiquix te bin ya sc'an yo'tan te Dios, ya me awich'ic te bin yaloje.

³⁷ Como jteb xanix ya sc'an te ya xtal te Mach'a talel yac, ma ba halix.

³⁸ Te mach'a toj yo'tan ya xcuxaj ta scuenta sch'uhunel yo'tan; yan teme ya suht ta spat, ma ba lec co'tan yu'un, xchi.

³⁹ Pero te ho'otique, ma ho'ucotic te ya suhtotic ta jpatic yu'un ya xch'ayotic, ho'otic ay sch'uhunel co'tantic yu'un hich ya xcol jch'uhleltic.