Hageo 2 - Bible in Tzeltal Bachajón

Yutsilal te yach'il Templo

¹ Ta jun scha'winic (21) c'ahc'al ta shuquebal u, tal te sc'op Jehová ta scuenta te jalwanej Hageo, hich la yal:

² Halbeya te Zorobabel snich'an Salatiel, gobernador yu'un Judá, soc te Josué snich'an Josadac, te muc'ul sacerdote, soc te jayeb xan ants-winiquetic:

³ ¿Mach'a hilem ta awohlilic te yilbeyej yutsilal te templo ini ta nahil to? ¿Bin yilel yac awilic ta ora ini? ¿Ma bal hichuc yac awilic te mayuc sc'oblale?

⁴ Pero ayuc me yip awo'tan, Zorobabel, xchi te Jehová; soc ayuc me yip awo'tan, Josué snich'an Josadac, muc'ul sacerdotehat; ayuc me yip awo'tanic apisilic, ants-winiquetic ta q'uinal, xchi te Jehová. A'tejanic, como joquinejex, xchi te Jehová te scuentahinej spisil.

⁵ Hich te bin ut'il la jchahp jc'op ta atojolic te c'alal loq'uex tal ta Egipto, ya xtal ta awohlilic te espíritu cu'un, ma me xiwex.

⁶ Como hich yaloj te Jehová te scuentahinej spisil: Ma ba halix bahel ya me cac' nihcuc te ch'ulchan soc bahlumilal, te mar soc te lumq'uinale;

⁷ ya cac' nihcuc spisil te nacionetic; ya xtal te mach'a c'ambil yu'un spisil te nacionetic soc ya jnojes ta yutsilal te Na ini, xchi te Jehová te scuentahinej spisil.

⁸ Ho'on cu'un te plata soc ho'on cu'un te oro, xchi te Jehová te scuentahinej spisil.

⁹ Te yutsilal te schebal Na ini c'ax hich yutsilal ya xc'oht a te bin ut'il te Na ta nahil, xchi te Jehová te scuentahinej spisil; soc ya cac' lamal q'uinal li' ta lugar ini, xchi te Jehová te scuentahinej spisil.

Dios tulan la stsits te pueblo ma junuc yo'tan ta stojol

¹⁰ Ta chaneb scha'winic (24) c'ahc'al ta sbalunebal u, ta schebal ha'bil yochel ta ajwalil a te Darío, tal te sc'op Jehová ta scuenta te jalwanej Hageo, hich la yal:

¹¹ Hich yaloj te Jehová te scuentahinej spisil: Hich me yac ajoc'obe te sacerdotehetic sc'oblal te Ley:

¹² Teme ay mach'a ya spots bahel ch'ultesbil ti'bal ta sc'u', teme ya sta pan te sti'il sc'u', o te bin paybil, te vino, aceite, o biluc yan we'elil, ¿ch'ultesbil bal ya xc'oht? xchihat. La sjaq'uic te sacerdotehetic: Ma'uc, xchihic.

¹³ Hich la yal te Hageo: Teme ay mach'a bohloben sc'oblal ta scaj spiquel chamen baq'uet, teme ay ya spic biluc we'elil ini, ¿ya bal xbohlob sc'oblal yu'un? xchi. Ya xbohlob sc'oblal, xchihic te sacerdotehetique.

¹⁴ Hich la yal te Hageo: Hich ay te ants-winiquetic soc te pueblo ini, xchi te Jehová, soc ha nix hich spisil ya'tel te sc'abique: spisil mahtaniletic ya yaq'uic li'i bohloben sc'oblalic.

¹⁵ Ha yu'un nopahic ta lec ta awo'tanic yo'tic soc ta patil bahel. Te c'alal ma to ba awac'ojic a ton ta sba yan ton ta spasel te templo yu'un Jehová

¹⁶ ¿bin yilel acuxlejalic a? Teme ay mach'a tal ta banti busul jtahb efa sc'oblal, ha nax ay lajuneb; teme ay mach'a tal ta yawil ta pits'el ts'usub yu'un ya sloq'ues lajuneb yoxwinic (50) q'uib sc'oblal, ha nax jtahb (20) ya sta.

¹⁷ La jlajimbeyex ta scuenta q'uixin ic', stotol soc bat spisil ya'tel ac'abic, pero ma ba la asuhtes awo'tanic ta jtojol, xchi te Jehová.

¹⁸ Ha yu'un yo'tic soc ta patil bahel, c'alal ta chaneb scha'winic (24) c'ahc'al ta swaxaquebal u, nopa ta awo'tanic te bin ora la yich' pasel te yich'o-ip te templo yu'un Jehová. Nopa ta awo'tanic:

¹⁹ ¿Ay to bal sit awal-ts'unubil ta yawil? Ma to ba yac'oj sit te ts'usubil, higuera, granado o te olivo, pero yo'tic soc ta patil bahel ya ca'beyex bendición, xchi.

Bin halbot ta jamal yu'un Jehová te Zorobabel

²⁰ Tal te sc'op Jehová scuenta schebal buelta ta stojol Hageo, ta chaneb scha'winic (24) c'ahc'al ta u nix, hich la yal:

²¹ Hich xawalbe te Zorobabel, gobernador yu'un Judá: Ya cac' nihcuc te ch'ulchan soc te bahlumilale.

²² Ya jbuchbe te shuctajib ajwaliletic soc ya jlajimbe yipic te nacionetique; ya jbuchbe te carretahetic yu'un guerra soc te mach'atic mohemic tey a; te cawuhetic soc te mach'atic cajajtic a ya xlajic ta espada yu'un te yermanotaque.

²³ Ta hich ora, xchi te Jehová, ya quic'at, Zorobabel snich'an Salatiel, a'batat cu'un, xchi te Jehová, hich ya cac'at te bin ut'il jch'ocow scuenta sello, como ho'on la jtsahat, xchi te Jehová te scuentahinej spisil.