Habacuc 1 - Bible in Tzeltal Bachajón

Habacuc ya xc'opoj yu'un bin ma stojiluc ta pasel

¹ Te sc'op-jalwanej te a'bot yil te Habacuc ta nahalsitil.

² Jehová, ¿bin to ora te ma ba yac ajac'bon caw, te ya x'awonon ta atojol ta scaj uts'inel, te mayuc coltayel awu'une?

³ ¿Bin yu'un yac awa'bon quil te bin chopol, te yac awa'bon quil wocol? Ay ta jtojol jinel soc uts'inel; ay hach-c'op soc tsaltamba-c'op.

⁴ Ha yu'un mayuc yip te Ley, soc ma stojiluc ya xloc' te chahpanele; te mach'a chopol yo'tan ya sjoytay te mach'a toj yo'tan, hich ma stojiluc ya xc'oht te chahpanele.

Te caldeohetic ya ya'beyic castigo te Judá

⁵ Ilawilic ta yohlil te nacionetic, ilawil soc xiwanic, yu'un ay bin ya jpas ta aworahilic te ma ba yac ach'uhunic aunque ya xhalbotex sc'oblal.

⁶ Como ya jach te caldeohetic, jun nación te bayel ya x'uts'inwan soc ora ya suj sba, te ya xbehen ta sjamalil te q'uinal yu'un ya yu'untay q'uinaletic te ma yu'unuc.

⁷ Tulanic soc xiweltic sbahic, ha nix ya spasic te bin toj ta sc'opic soc te muc' sc'oblalique.

⁸ Te cawuhetic yu'unic c'ax hich ya x'ahnimajic a te bin ut'il c'an bo'olay choj, c'ax hich ya xti'awanic a te bin ut'il ha'mal ts'i'etic ta ahc'abal; ya x'ahnimajic bahel te jmoheletic ta cawu, namal ya xtalic, ya xwihlic talel hich te bin ut'il jxic te ora ya xwihl ta tsaquel.

⁹ Spisilic ya xtalic ta uts'inwanej, ya xnahilij bahel yu'unic te xiwele, soc ya stsobic jchuqueletic hich te bin ut'il hi'.

¹⁰ Ya slabanic ajwaliletic soc ya stse'layic te príncipaletique; ya stse'layic te ahnibal ts'ahquetic, ya sbusanic lum ta spat, hich ya yochintayic a.

¹¹ Patil ya xc'axic xan bahel hich te bin ut'il tulan ic'; ha smulic te ha dios c'ohem yu'unic te yipique.

Ya xc'opoj Habacuc

¹² ¿Ma bal ha'ucat ayat c'alal ta shahchibal, Jehová Dios cu'un, Ch'ul Diosat cu'un? Ma ba ya xchamotcotic. La atsa te caldeohetic yu'un ya xchahpanwanic, ha'at, Muc'ul Tonat, la awac' te ya yaq'uic castigo.

¹³ C'ax lec asit ta yilel te bin ma lecuc, ma xhu' yac awil te bin chopole; ¿bin yu'un hiche te yac awil te j'uts'inwanejetic, soc te ma xc'opojat c'alal te mach'atic chopol yo'tanic ya sjinic te mach'a c'ax hich toj xan a te bin ut'il ayique?

¹⁴ Hich c'ohem awu'un te ants-winiquetic te bin ut'il chayetic ta mar, hich te bin ut'il chanetic te mayuc ajwalil yu'unique.

¹⁵ Te caldeohetic ya sloq'uesic ta luquel spisilic, ya stsobic tal ta stsacojibal, ya stsobticlan ta stsaco-chay; hich ay yutsil yo'tanic soc tse'el yo'tanic yu'un.

¹⁶ Ha yu'un ya ya'be milbil mahtaniletic te stsacojibal soc ya schic'be pom te jtsaco-chay, como ha ta scuentahic te bayel bintic ay yu'un, soc buhts'an te swe'ele.

¹⁷ ¿Spisil bal ora ya scohcon te stsacojibal yu'un, soc te ma ba ya sna'be yo'bolil sbahic a ya slajinlan xan te nacionetique?