Génesis 48 - Bible in Tzeltal Bachajón

Jacob la ya'be bendición Efraín soc Manasés

¹ Ta patil te hich c'oht ta pasel, hich halbot te José: Ay ta chamel te atate, xchihic. Hich la yic' bahel te cheb snich'nab, ha te Manasés soc Efraín.

² Hich halbot ya'iy te Jacob: Tal yilat anich'an José, xchi. Te Israel la spas tulan, la shuhcan sba ta swayib,

³ hich la yalbe te José: Te Dios te spisil ya xhu' yu'un la yac' sba ta ilel ta jtojol ta Luz te ay ta sq'uinal Canaán, soc la ya'bon bendición,

⁴ soc hich la yalbon: Ya cac' xmuc'ubat soc ya cac' xp'ohlat, ya cac' te bayel ta chahp nación ya xc'ohat, soc ya ca'be te patil ats'umbal te q'uinal ini, ha yu'unic ya xc'oht spisil ora, xchi.

⁵ Te cheb anich'nab, ha te Efraín soc Manasés te ayinic ta sq'uinal Egipto te c'alal ma to xtal joquinat a ta Egipto, ha cu'un ya xc'ohtic, hich te bin ut'il cu'unic te Rubén soc Simeón.

⁶ Yan te mach'atic patil ya x'ayinic awu'un, ha awu'un ya xc'oht; ya me yich' sq'uinalic ta scuenta te sbanquiltac.

⁷ Te c'alal loc'on tal ta Padan-aram, cham ta be te Raquel ta sq'uinal Canaán, ta nopol Efrata; la jmuc hilel tey ta sbehlal Efrata, ha te Belén, xchi.

⁸ Te Israel la yil te cheb snich'nab te José, hich la sjoc'oy: ¿Mach'atic a ini? xchi.

⁹ Ha te jnich'nab te Dios la ya'bon li'i, xchi te José. Hich la yal te Israel: Ac'a nohpojicuc tal ta jtojol, ya ca'be bendición, xchi.

¹⁰ Te Israel ma ba lequix sit ta scaj te mamalix, ma ba la yilix q'uinal. Hich te José la yac' nohpojuc tal ta stojol, te Israel la yuts'ulan soc la smech'ticlan.

¹¹ Hich la yalbe te José: La jcal te ma ba ya quilbat xan asit, pero Dios la ya'bon quilbe sit ec te ats'umbale, xchi.

¹² Ha yu'un te José la sjits loq'uel te snich'nab ta sjol yacan te stat, la squejan sba.

¹³ La yic' tal schebalic, te Efraín la yac' ta swa'el, ha ta q'uexam c'oht yu'un te Israel; te Manasés la yac' ta sq'uexam, ha ta swa'el te Israel, la snopteslan talel ta stojol.

¹⁴ Hich te Israel la shach te swa'el-c'ab, la scajambe ta sjol Efraín te ihts'inal, te sq'uexam-c'ab la scajambe ta sjol te Manasés, la ya'be sjel sba te sc'ab, aunque ha ba-alal te Manasés.

¹⁵ La ya'be bendición te José, hich la yal: Te Dios, te ha ta stojol behenic te Abraham soc Isaac te tatiletic cu'un, ha te Dios te scanantayejon ta spisil jcuxlejal ha to c'alal ora,

¹⁶ ha te Ch'ul A'bat te la scoltayon loq'uel ta spisil te bintic chopol, ac'a ya'be bendición te queremetic ini. Ac'a yich'bonic hilel te jbihil soc te sbihil te Abraham soc Isaac te tatiletic cu'un, soc bayel ac'a p'ohlicuc ta bahlumilal, xchi.

¹⁷ Pero c'alal la yil te José te la scajambe swa'el-c'ab ta sjol Efraín, ma lecuc la ya'iy; ha yu'un la stsacbe te sc'ab te stat ay ta sjol te Efraín, yu'un ha c'an ya'be ta sjol Manasés.

¹⁸ Hich la yalbe te stat: Ma hichuc, jtat, yu'un ha ba-alal ini, ha xacajambe awa'el-c'ab ta sjol stuquel, xchi.

¹⁹ Pero ma ba la sc'an te state, hich la yalbe: Ya jna', jnich'an, ya jna'. Ha nix hich muc'ul pueblo ya xc'oht, soc ha nix hich muc' sc'oblal ya xc'oht; pero c'ax hich ya xc'oht a te yihts'ine, soc bayel ta chahp nacionetic ya xloc' a te sts'umbale, xchi.

²⁰ Ha nix yorahil a la ya'be bendición, hich la yal: Ta scuenta abihilic ac'a yac' bendición ta Israel, ac'a yalic: Dios ac'a spasbat ta atojol hich te bin ut'il Efraín soc Manasés, ac'a xchihuquic, xchi. Hich nahil la yac' te Efraín, patil te Manasés.

²¹ Te Israel hich la yalbe te José: Ya xwayix jbaq'uetal; pero ya me sjoquinex te Dios soc ya me yiq'uex suhtel bahel ta slumal te ame'atatique.

²² C'ax hich ay bin la jca'bat a te bin ut'il te abanquiltac, ha te bin la jpojbe te amorreohetic ta espada soc ta t'ihmalte' cu'un, xchi sc'oblal.