Génesis 35 - Bible in Tzeltal Bachajón

Dios la ya'be bendición Jacob ta Bet-el

¹ Dios hich la yalbe te Jacob: Hahchan, mohan bahel ta Bet-el, nahinan tey a. Pasbeya scajtajib ta chiq'uel smahtan te Dios te la stehc'an sba ta atojol te c'alal loc'at ta ahnel ta stojol te abanquil Esaú, xchi.

² Hich te Jacob la yalbe te mach'atic ay yu'un ta sna soc spisil te mach'atic sjoquinejic: Loq'uesahic te jyanlum diosetic te ay ta awohlilic, poca abahic soc jeltaya ac'u'ic.

³ Ya xmohotic bahel ta Bet-el, tey ya xc'oht jpasbe scajtajib ta chiq'uel smahtan a te Dios te la scoltayon te c'alal ayon ta wocol a soc te la sjoquinon ta banti behenon, xchi.

⁴ Hich la ya'beyic te Jacob spisil te yantic diosetic te yich'ojic soc te staq'uinal schiquinique. Te Jacob la smuc hilel ta lum ta ye'tal jihte' ta nopol Siquem.

⁵ C'alal hahchic ta behel, tal tulan xiwel yu'un Dios ta stojol te pueblohetic ta sjoyobalic, hich ma ba la snutsic te snich'nab Jacob.

⁶ Te Jacob soc spisil mach'atic sjoquinej, c'ohtic ta Luz, o te Bet-el te yan sbihil, te ay ta sq'uinal Canaán.

⁷ Tey c'oht spas scajtajib ta chiq'uel mahtanil a, El-bet-el sbihil c'oht yu'un te lugar, yu'un tey chicnaj Dios ta stojol a te c'alal loc' ta ahnel ta stojol te sbanquile.

⁸ Tey cham a te Débora, te jcanan yu'un Rebeca, la yich' muquel ta ye'tal jihte' ta nopol Bet-el; a'bot sbihilin Alón-bacut.

⁹ Te Dios la yac' sba ta ilel yan buelta ta stojol te Jacob te c'alal suhtemix tal ta Padan-aram a, soc la ya'be bendición.

¹⁰ Hich halbot yu'un te Diose: Jacob te abihile, ma hichuquix Jacob ya xhil, ha Israel ya xc'ohtix abihil, xchi. Hich Israel c'oht te sbihile.

¹¹ Soc halbot xan yu'un Dios: Ho'on Dioson te spisil ya xhu' cu'un: nich'najanic soc p'ohla abahic. Jun nación soc bayel ta chahp nacionetic ya xchicnaj ta acuenta, soc bayel ta tuhl ajwaliletic ya xloc' tal ta abaq'uetal.

¹² Te q'uinal la jca'be te Abraham soc Isaac, ha'at ya ca'bat soc ats'umbal ta patil bahel, xchi.

¹³ Hich te Dios la yihquitay hilel tey ta banti la sc'opon.

¹⁴ Te Jacob la stehc'an hilel ton ta banti c'oponot yu'un Dios. La smalbe hilel malbil mahtanil ta sba soc la smalbe aceite.

¹⁵ Te Jacob la ya'be sbihil Bet-el te lugar banti c'oponot yu'un Dios.

Cham Raquel

¹⁶ Patil loq'uic bahel ta Bet-el. C'alal nopol xc'ohtic ta Efrata a ayin yal te Raquel, pero ay bayel swocol yu'un.

¹⁷ Te c'alal bayel yac ta wocol a, halbot yu'un te jtam-alal: Ma xiwat, yu'un ayix yan querem awu'un, xchi.

¹⁸ C'alal nopol ya xloc' sch'uhlel a te Raquel (como cham stuquel), la ya'be sbihilin Benoni. Yan te stat la ya'be sbihilin Benjamín.

¹⁹ Hich cham te Raquel, la yich' muquel ta sbehlal Efrata, ha te Belén.

²⁰ Te Jacob la stehc'ambe hilel ton ta smuquenal, ha seña smuquenal te Raquel c'alal ora.

²¹ Loc' bahel tey a te Israel, c'oht spas snahilpac' ta sjehchelul bahel te Migdal-edar.

²² C'alal tey nahinem a te Israel, te Rubén way soc te Bilha te yan ants yic'oj te state. La ya'iy te Israel. Ay lahchaytuhl snich'nab te Jacob.

Te snich'nab Jacob

²³ Te yalatac te Lea: ha Rubén te sba snich'an te Jacob, soc Simeón, Leví, Judá, Isacar soc Zabulón.

²⁴ Te yalatac te Raquel: ha José soc Benjamín.

²⁵ Te yalatac te Bilha te scriada Raquel: ha Dan soc Neftalí.

²⁶ Te yalatac te Zilpa te scriada Lea: ha Gad soc Aser. Ha te snich'nab Jacob te ayinic ta Padan-aram.

Cham Isaac

²⁷ Te Jacob baht yil te Isaac te stat te ay ta Mamre, ta Quiriat-Arba, (ha te Hebrón), te banti nahinic te Abraham soc Isaac.

²⁸ Te Isaac cuxaj balunwinic (180) ha'bil.

²⁹ Hich quehchaj yich'bel ic' te Isaac, cham, la sjoquin ta muquenal te sme'stat, mamalix, bayel c'ahc'al cuxaj. Mucot yu'un Esaú soc Jacob te snich'nabe.