Génesis 26 - Bible in Tzeltal Bachajón

Isaac ta Gerar

¹ Tal wi'nal ta q'uinal, yanix wi'nal a te c'ax c'alal cuxul to a te Abraham. Ha yu'un te Isaac baht ta Gerar ta banti ay te Abimelec te ajwalil yu'un te filisteohetique.

² Te Jehová la yac' sba ta ilel ta stojol, hich la yalbe: Ma me xcohat bahel ta Egipto, nahinan ta q'uinal banti ya calbat.

³ Nahinan hich te bin ut'il jbehyom li' ta q'uinal ini. Ya joquinat soc ya ca'bat bendición, yu'un ya ca'bat aq'uinalin soc ats'umbal spisil te q'uinal ini, soc ya cac' c'ohtuc ta pasel te bin caloj ta jamal ta stojol te atat Abraham.

⁴ Ya cac' p'ohluc ats'umbal hich yipal te bin ut'il eq'uetic ta ch'ulchan, soc ya ca'be sq'uinalin ats'umbal spisil te q'uinal ini. Ta scuenta ats'umbal ya x'a'botic bendición spisil nacionetic ta bahlumilal,

⁵ te bin ut'il la ya'iybon jc'op te Abraham soc la sch'uhumbon jmandar, la sch'uhun spasel spisil bin la jcalbe, xchi.

⁶ Ha yu'un te Isaac nahin ta Gerar.

⁷ Te winiquetic tey a la sjoc'obeyic sc'oblal te yihname. La sjac' te Isaac: Ha quihts'in, xchi, como la xi' yalel te ha yihnam, yu'un la yal ta yo'tan te ya wan xmilot yu'un te winiquetic ta scaj te Rebeca, yu'un buen t'ujbil ants.

⁸ Te c'alal ayix bayel c'ahc'al te tey ay a, te Abimelec ajwalil yu'un te filisteohetic la yil ta ventana te Isaac yac ta smech'el te Rebeca te yihnam.

⁹ Ha yu'un te Abimelec la sticon ta iq'uel te Isaac, hich la yalbe: Melel ha awihnam te ants ini. ¿Bin yu'un: Quihts'in, xchihat? xchi. La sjac' te Isaac: Yu'un la jcal ta co'tan: Ya wan xlajon ta scuenta, xchi.

¹⁰ La yal te Abimelec: ¿Bin yu'un te hich la apasbotic? Jteb ma ba ay mach'a way soc awihnam, la awac' jta jmulcotic te hichuque, xchi.

¹¹ Ha yu'un te Abimelec hich la yalbe mandar spisil te pueblo: Teme ay mach'a ya yuts'in te winic ini o ha te yihnam, ya me xlaj, xchi.

¹² Te Isaac la sts'un sts'unub-yawal tey a; ha nix ta ha'bil la sc'ajbe ho'winic (100) buelta te site; a'bot bendición yu'un Jehová.

¹³ P'ohl sc'ulejal te Isaac, yantic yilel ta p'ohlel sc'ulejal, soc muc'ub sc'oblal ha to c'alal la sta bayel yip.

¹⁴ Ay bayel tuminchijetic, wacaxetic soc a'batetic yu'un; hahch ta ti'ti'o'tantayel yu'un te filisteohetique.

¹⁵ Spisil te pozohetic te la shotic te a'batetic yu'un te Abraham te stat Isaac te c'alal cuxul to a, te filisteohetic la sbut'iclambeyic, la snojeslambeyic ta lum.

¹⁶ Te Abimelec la yalbe te Isaac: Loc'an ta cohlilcotic, yu'un c'ax hichix awip a te bin ut'il te ho'otcotique, xchi.

¹⁷ Hich loc' tey a te Isaac, la stehc'an snahilpac' ta spamlej yu'un Gerar, tey nahin a.

¹⁸ Te Isaac la scha'hot xan te pozohetic te la yich' hotel ta yorahil te Abraham ha te stat, te la sbut'ticlanic te filisteohetic c'alal chamenix a te Abraham. Hich nix sbihil c'oht yu'un te bin ut'il nix sbihil a'bot yu'un te state.

¹⁹ Pero c'alal la shotic yan pozo ta spamlej soc la stahic cuxul sloq'uib-ha' te a'batetic yu'un Isaac,

²⁰ te jcanan-tuminchijetic ta Gerar la yut sbahic soc te jcanan-tuminchijetic yu'un Isaac, hich la yalic: Cu'uncotic te ha'e, xchihic. Ha scuentahil te Esek sbihil c'oht te pozo, como yutoj sbahic yu'un.

²¹ Patil la shotic yan pozo, pero ha nix hich hahch utamba yu'un, Sitna sbihil c'oht yu'un.

²² Loc' bahel tey a te Isaac, la spas yan pozo; mayuquix yutambahul c'oht stuquel, la ya'be sbihilin Rehobot, yu'un hich la yal: Jehová yac'oj te lec c'ohotiquix, ya xp'ohlix te jbiluctique, xchi.

²³ Loc' bahel tey a mo bahel ta Beerseba.

²⁴ Te Jehová tey la yac' sba ta ilel ta ahc'abal ta stojol, hich la yalbe: Ho'on Dioson yu'un te atat Abraham, ma me xiwat, yu'un joquinejat, ya ca'bat bendición, ya cac' p'ohluc ats'umbal ta scuenta bin ut'il c'ux ta co'tan te ca'bat Abraham, xchi.

²⁵ Ha yu'un te Isaac la spasbe scajtajib ta chiq'uel mahtanil soc la sc'opon te Jehová. Tey la stehc'an snahilpac' a, soc te a'batetic yu'un Isaac la shotic pozo.

²⁶ Te Abimelec loc' tal ta Gerar, baht ta banti ay te Isaac; tal soc jtuhl smohlol te Ahuzat sbihil, soc te Ficol, capitán yu'un te soldadohetic yu'une.

²⁷ Pero te Isaac la yalbe: ¿Bin yu'un talat ta jtojol, teme la awihlayonic soc la atenonic loq'uel tal ta awohlilic? xchi.

²⁸ Hich la sjaq'uic: Yu'un quilojcotic te sjoquinejat te Jehová; ha yu'un la jcalcotic: Ya sc'an te ay bin ya caltic ta jamal ta atojol soc ta jtojolcotic, xchihotcotic. Ac'a jchap jc'optic,

²⁹ ha te ma ba yac apasbotcotic bin chopol, hich te bin ut'il mayuc bin chopol la jpasbatcotic, te ha nax la jpasbatcotic te bin lec soc lamal q'uinal la jticonatcotic bahel. Ta ora ini a'botat bendición yu'un Jehová, xchihic.

³⁰ Hich te Isaac la schahpambe swe'el scuenta q'uin, hich we' uch'ic.

³¹ Ta sab hahchic soc ay bin jamal la yalbe sbahic. Te Isaac la yac'ticlan bahel, hich lamal yo'tanic a suhtic bahel.

³² Ha nix sc'ahc'alel a te tal te a'batetic yu'un Isaac, la yalbeyic sc'oblal te pozo te la shotic, hich la yalic: La jtahcotiquix ha', xchihic hulel.

³³ Te Isaac la ya'be sbihilin Seba. Ha scuentahil te Beerseba sbihil c'oht te pueblo c'alal ora ini.

³⁴ C'alal ay cha'winic (40) ya'bilal a te Esaú la yic' yihnamin Judit yantsil-nich'an Beeri te heteo-winic, soc Basemat yantsil-nich'an Elón te ha nix heteo-winic.

³⁵ Te Isaac soc Rebeca bayel a'botic mel-o'tan yu'un.