Génesis 23 - Bible in Tzeltal Bachajón

Cham te Sara

¹ Te Sara cuxaj huqueb shucwinic (127) ha'bil; hich ay te jayeb ha'bil cuxaje.

² Te Sara cham ta Quiriat-arba, (te Hebrón yan sbihil), te ay ta sq'uinal Canaán. Te Abraham tey la smel yo'tan soc tey la yoq'uetay a te Sara.

³ Te Abraham la stehc'an hahchel sba ta banti ay te chamen ants yu'un, baht sc'opon te snich'nab Het, hich la yalbe:

⁴ Ho'on jyanlumon soc jmelmonelon ta awohlilic. A'bon q'uinal yu'un muquenal, yu'un tey ya jmuc a te mach'a chamen cu'un, xchi.

⁵ Ha yu'un te snich'nab Het hich la sjac'beyic sc'op te Abraham:

⁶ Tatic, a'iya awa'iy te bin ya calbatcotic. Ha'at ich'bilat ta muc' cu'uncotic; muca te mach'a chamen awu'un ta banti mero lequil muquenal cu'uncotic. Mayuc mach'a ya yal te ma ba ya ca'batcotic amuquenal, ma ba ya jcomatcotic te yac amuc te mach'a chamen awu'un, xchihic.

⁷ Ha yu'un te Abraham la stehc'an hahchel sba soc la snijan sba ta stojol te yajwal te q'uinal, ha te snich'nab Het.

⁸ Hahch sc'opon, hich la yal: Teme yu'un yac awa'bon jmuc te mach'a chamen cu'un, a'iybon awa'iy hiche te jc'ope, c'opojanic cu'un ta stojol Efrón te snich'an Zohar,

⁹ te yacuc schombon te ch'en yu'un Macpela te ay ta sti'il te sq'uinale; te yacuc schombon ta mero stojol scuenta muquenal cu'un ta awohlilic, xchi.

¹⁰ Te Efrón te heteo-winic tey ay a ta yohlil te snich'nab Het, ha la sjac'be sc'op te Abraham ta stojol te snich'nab Het soc spisil te mach'atic yacalic ta ochel bahel ta yochibal te pueblo, hich la yal:

¹¹ Ma'uc, jtatic, a'iya me awa'iy te jc'ope; ya ca'bat te q'uinal soc te ch'en te tey ay a. Ta stojol spisil te jlumal ya ca'bat. Muca te mach'a chamen awu'une, xchi.

¹² Ha yu'un te Abraham la snijan sba ta stojol te yajwal te q'uinal,

¹³ soc la sjac'be sc'op te Efrón ta stojol te yajwal te q'uinal, hich la yal: Awocoluc, a'iya me awa'iy te bin ya cal. Ya ca'bat te stojol te q'uinale; ich'a, hich ya jmuc tey a te mach'a chamen cu'un, xchi.

¹⁴ La sjac' te Efrón:

¹⁵ Tatic, a'iya me awa'iy: jbahc' (400) ta sehp plata te stojol te q'uinale; pero ¿yu'un bal bayel sc'oblal ta jtojoltic? Muca tey a te mach'a chamen awu'un, xchi.

¹⁶ Te Abraham la schap soc te Efrón, la sp'is te jayeb taq'uin halbot yu'un ta stojol te snich'nab Het, ha te jbahc' (400) ta sehp plata hich te bin ut'il ay ta tuhunel yu'un te jchombajeletique.

¹⁷ Ha yu'un te sq'uinal Efrón te ay ta Macpela, ta stojol banti ya xloc' tal c'ahc'al yu'un Mamre, te q'uinal soc te ch'en tey ay a, soc spisil te'etic tey ayic a,

¹⁸ la yu'untay te Abraham ta stojol te snich'nab Het soc spisil te mach'atic yacalic ta ochel bahel ta yochibal te pueblo.

¹⁹ Patil te Abraham la smuc te Sara te yihnam ta ch'en ay ta sq'uinal Macpela te ay ta stojol banti ya xloc' tal c'ahc'al yu'un Mamre, (te Hebrón yan sbihil), te ay ta sq'uinal Canaán.

²⁰ Hich te q'uinal soc te ch'en tey ay a, te chombot yu'un te snich'nab Het, la yich' te Abraham yu'un muquenal.