Génesis 16 - Bible in Tzeltal Bachajón

Agar soc Ismael

¹ Te Sarai, te yihnam Abram, ma ba alaj; pero ay jtuhl scriada egipcia-ants, Agar sbihil.

² Ha yu'un te Sarai la yalbe te Abram: Awiloj te Jehová ma xyac' alajucon; ha yu'un awocoluc taha aba soc te jcriada, hich wan ay calatac ya jta ta scuenta, xchi. Te Abram la yich'be ta cuenta te sc'op te Sarai.

³ Ha yu'un te Sarai, te yihnam Abram, la yic' tal te Agar, te scriada egipcia-ants, la ya'be yic' te Abram te smamalale.

⁴ Hich te Abram la sta sba soc te Agar, hich hahch yal. Te c'alal la ya'iy te Agar te hahchemix yal, ma ba lequix ta sit te yajwale.

⁵ Ha yu'un te Sarai la yalbe te Abram: Ha'at ta acuenta te ay jwocol. Ho'on la jca'bat awic' te jcriada, pero te c'alal la ya'iy te hahchemix yal, ma ba leconix ta sit. Jehová ac'a schahpanotic jchebaltic, xchi.

⁶ Te Abram la sjac'be sc'op te Sarai: Ay ta ac'ab te acriada, ha chican bin yac ac'an yac apasbe, xchi. Ha yu'un te Sarai bayel hahch yuts'in, hich te Agar loc' ta ahnel ta stojol.

⁷ Te ch'ul a'bat yu'un Jehová la sta te Agar ta banti sloq'uib-ha' ta jochol taquin q'uinal, ha te sloq'uib-ha' ay ta sbehlal Shur.

⁸ Hich la yalbe: Agar, scriadahat Sarai, ¿banti talat soc banti ya xbahat? xchi. Yacon ta ahnel ta stojol te cajwal Sarai, xchi te Agar.

⁹ Hich halbot yu'un te ch'ul a'bat yu'un Jehová: Suhtan bahel ta stojol awajwal, ac'a xan aba ta cuentahinel yu'un, xchi.

¹⁰ Hich halbot xan yu'un te ch'ul a'bat yu'un Jehová: Hich ya jp'ohltesbat ats'umbal te ma xhu' ta ahtayel yu'un yipal, xchi.

¹¹ Soc halbot xan yu'un te ch'ul a'bat yu'un Jehová: Hahchemix awal, ya x'ayin atut querem-al; ya me awa'be sbihilin Ismael, yu'un ya'iyej te Jehová te ay awocole.

¹² Ha c'ahc'al winic ya xc'oht, ya me scontrahin spisilic, soc ya xcontrahinot yu'un spisilic, ma ba lamal q'uinal ya x'ayin ta stojol spisil te yermanotac, xchi sc'oblal.

¹³ Ha yu'un te Agar la ya'be sbihilin te Jehová te c'oponot yu'un: Ha'at Diosat te ya yilon, xchi, yu'un la yal: ¿Ma bal la jquil te Mach'a la yilon? xchi.

¹⁴ Ha yu'un la ya'be sbihil te pozo: Pozo yu'un te Mach'a Cuxul te ya yilon, xchi. Ay ta ohlil yu'un Cades soc Bered.

¹⁵ Te Agar la yalataybe snich'an te Abram. Te Abram la ya'be sbihilin Ismael te snich'an te ayin ta scuenta Agar.

¹⁶ Ay waqueb yo'winic (86) ya'bilal a te Abram c'alal Agar la yalatay te Ismael.