Génesis 13 - Bible in Tzeltal Bachajón

Abram soc Lot la yihquitay sbahic

¹ Hich loc' tal ta Egipto te Abram, toj bahel c'alal ta Neguev soc yihnam soc spisil bintic ay yu'un, soc te Lot.

² Te Abram ay bayel chambahlametic soc oro soc plata yu'un.

³ C'ax tal ta Neguev, c'unc'un behen bahel ta Bet-el, tey nix ta banti la stehc'an snahilpac' ta nahil to, ta ohlil yu'un Bet-el soc Hai,

⁴ tey ta banti la spas scajtajib ta chiq'uel mahtanil. Tey la sc'opon a te Jehová te Abram.

⁵ Ha nix hich te Lot, te sjoquinej te Abram, ay tuminchijetic, wacaxetic, soc nahilpaq'uetic yu'un.

⁶ Te q'uinale ma tic'uc ya xnahin schebalic a, yu'un bayel sbiluquic, ha yu'un ma ba hu' ya xnahinic ta junax lugar.

⁷ La yut sbahic te jcanan-chambahlametic yu'un Abram soc te jcanan-chambahlametic yu'un Lot. (Soc tey nix nahinemic a te cananeohetic soc te ferezeohetique.)

⁸ Ha yu'un te Abram la yalbe te Lot: Ma me jcontrahin jbahtic ni ha'uc te jcanan-chambahlametic cu'untic, como quermano jbahtic.

⁹ ¿Ma bal ayuc ta atojol spisil te q'uinale? Ya calbat wocol te yacuc awihquitayon hilel. Teme ya xbahat ta q'uexam, ho'on ya xbohon ta wa'el; teme ya xbahat ta wa'el, ho'on ya xbohon ta q'uexam, xchi.

¹⁰ Te Lot la shach sit, la yil spisil te spamlej yu'un Jordán te ay bayel ha'etic tey a, hich yilel te bin ut'il sts'unub-yawal Jehová, hich yilel te bin ut'il te sq'uinal Egipto ta stojol Zoar. Hich ay a te c'alal ma to ba sjinoj Jehová te Sodoma soc te Gomorra.

¹¹ Ha yu'un te Lot la stsa spisil te spamlej Jordán. Ha yu'un behen bahel ta stojol banti ya xloc' tal c'ahc'al; hich la yihquitay sbahic.

¹² Te Abram hil ta nahinel ta sq'uinal Canaán stuquel, yan te Lot c'oht nahinuc ta pueblohetic ta spamlej, la spasulan bahel snahilpac' ha to c'alal c'oht ta Sodoma.

¹³ Pero te mach'atic nahinemic ta Sodoma c'ax chopol yo'tanic, la spasic mero chopol muliletic ta stojol Jehová.

¹⁴ Te Jehová hich la yalbe te Abram te c'alal bahtix a te Lot: Toya asit, ila awil spisil te q'uinal ta ajoyobal, ta stojol norte, ta stojol sur, ta stojol banti ya xloc' tal c'ahc'al, soc ta stojol smahlib c'ahc'al.

¹⁵ Yu'un spisil te q'uinal te yac awile, ya ca'bat aq'uinalin soc ats'umbal sbahtel q'uinal.

¹⁶ Hich yipal ats'umbal ya xc'oht cu'un te bin ut'il ts'ubil lum. Teme ay mach'a ya xhu' ya yahtay te ts'ubil lum, ha nix hich ya xhu' ya yahtay te ats'umbale.

¹⁷ Hahchan, ocliya te q'uinal, bin yilel te snahtil soc te sjamalil, yu'un ha ya ca'bat aq'uinalin, xchi sc'oblal.

¹⁸ Hich te Abram la sjeltaybe yawil te snahilpac', c'oht ta nahinel ta banti jihte' yu'un Mamre, te ay ta Hebrón. Tey la spasbe scajtajib ta chiq'uel smahtan a te Jehová.