Génesis 1 - Bible in Tzeltal Bachajón

Dios la spas spisil bintic ay

¹ Ta shahchibal Dios la spas te ch'ulchan soc bahlumilal.

² Te bahlumilal ma chahpambiluc soc jochol; te yihc'al q'uinal ha smacoj te mero sc'ubulil ha', soc te espíritu yu'un Dios behen ta baba ha'.

³ La yal te Diose: Ac'a sacubuc q'uinal, xchi. Hich sacub q'uinal.

⁴ Dios la yil te lec te sacal q'uinale; cha'jehch la yac', jehch c'oht te sacal q'uinal, jehch c'oht te yihc'al q'uinale.

⁵ Dios la ya'be sbihil c'ahc'alel te sacal q'uinal, soc ahc'abal la ya'be sbihil te yihc'al q'uinale. Te yihc'ubel q'uinal soc te sacubel q'uinal, ha jun c'ahc'al.

⁶ Soc la yal te Diose: Ayuc sjamalil ta yohlil te ha', yu'un ya sjat sba te ha'etique, xchi.

⁷ Hich Dios la spasbe sjamalil te jehch la yac' te ha' te ay ta ye'tal te sjamalil, jehch la yac' te ha' te ay ta sba. Hich c'oht yu'un.

⁸ Dios la ya'be sbihil ch'ulchan te sjamalile. Te yihc'ubel q'uinal soc te sacubel q'uinal, ha schebal c'ahc'al.

⁹ Soc la yal te Diose: Ac'a syom sba te ha'etic ay ta ye'tal ch'ulchan, ac'a chicnajuc lumq'uinal, xchi. Hich c'oht yu'un.

¹⁰ Dios la ya'be sbihil lumq'uinal te q'uinal te taquijemixe. Te banti la stsob sba te ha'e, ‘maretic’ sbihil c'oht yu'un. Lec la yil te Diose.

¹¹ La yal te Diose: Ac'a coluc ta lumq'uinal yaxal ha'maletic, ha te bic'tal ha'maletic te ya yac' sbac' soc te'etic te ya yac' sit, chican bin yilel sit ya yac' te jujuchahpe, xchi. Hich c'oht yu'un.

¹² Hich col te yaxal ha'maletic ta lumq'uinal: ha te bic'tal ha'maletic te ya yac' sbac' te site, soc te te'etic te ya yac' sbac' te site, chican bin yilel sit ya yac' te jujuchahpe. Lec la yil te Diose.

¹³ Te yihc'ubel q'uinal soc te sacubel q'uinal, ha yoxebal c'ahc'al.

¹⁴ La yal te Diose: Ac'a chicnajuc bintic ya xtihl sc'ahc'al ta sjamalil ch'ulchan scuenta yu'un parte ya xc'oht a te c'ahc'alel soc parte ya xc'oht a te ahc'abal, te ha señahiletic ya xc'oht yu'un te ya sjel sba te q'uinal, soc te jujun c'ahc'al soc te jujun ha'bile.

¹⁵ Ac'a tihluquic ta sjamalil ch'ulchan yu'un ya sacubtes q'uinal ta bahlumilal, xchi. Hich c'oht yu'un.

¹⁶ Dios la spas te cheb muc'ul c'ahq'uetic, ha te muc'ul c'ahc' te ya scuentahin te c'ahc'alel, soc te tut c'ahc' te ya scuentahin te ahc'abal. Soc la spas te eq'uetique.

¹⁷ Dios la yac'ticlan ta sjamalil ch'ulchan scuenta yu'un ya sacubtes q'uinal ta bahlumilal,

¹⁸ soc yu'un ya scuentahin te c'ahc'alel soc te ahc'abal, soc yu'un ya sjel sba te sacal q'uinal soc te yihc'al q'uinale. Lec la yil te Diose.

¹⁹ Te yihc'ubel q'uinal soc te sacubel q'uinal, ha schanebal c'ahc'al.

²⁰ La yal te Diose: Ac'a chicnajuc bintic ya xcuxajic ta ha', soc mutetic te ya xwihlic ta sba te bahlumilal, ta yohlil te sjamalil te ch'ulchane, xchi. Hich c'oht yu'un.

²¹ Dios la spas muc'ul schanul ha' soc spisil te bintic cuxajtic, jujuchahp te ya xchicnaj ta ha', soc spisil ta chahp mutetic. Lec la yil te Diose.

²² Dios la yac'ticlambe bendición, hich la yal: Sitinanic soc p'ohla abahic, nojesahic te ha'etic ta maretic soc ac'a sp'ohl sbahic te mutetic ta bahlumilal, xchi.

²³ Te yihc'ubel q'uinal soc te sacubel q'uinal, ha yo'ebal c'ahc'al.

²⁴ La yal te Diose: Ac'a chicnajuc ta lumq'uinal spisil ta chahp chambahlametic: ha te alaq'uil chambahlametic, chanetic, soc ha'mal chambahlametic, ha chican bintic yilel, xchi. Hich c'oht yu'un.

²⁵ Dios la spas te chambahlametic, te alaq'uil chambahlametic soc spisil te bintic ya stas sbahic ta lumq'uinal, chican bintic yilel te jujuchahpe. Lec la yil te Diose.

²⁶ La yal te Diose: Ya jpastic ants-winic te ya jlop'tay jbahtic a, te hich yilel te bin ut'il ho'otique. Ha ya scuentahin spisil schayul ha'etic, te mutetic te ya xwihlic ta toyol soc te chambahlametic, spisil te lumq'uinal soc spisil bintic ya stas sbahic ta lumq'uinal, xchi.

²⁷ Hich Dios la spas te ants-winic, la slop'tay sba a, hich yilel te bin ut'il Dios la spas; winic soc ants la spas.

²⁸ Dios la yac'ticlambe bendición, hich la yalbe: Sitinan soc p'ohla abahic, nojesahic ta swohlol te bahlumilal, soc tuhunahic te q'uinale. Ajwalilat ya xc'ohat yu'un te schayul ha'etic, te mutetic te ya xwihlic ta toyol soc spisil te chambahlametic te ya xbehenic ta lumq'uinal, xchi.

²⁹ La yal te Diose: La jca'beyex spisil te bintic ya xcol ta lumq'uinal te ya yac' sbac', soc spisil te'etic ya sitin, ha me yac awe'elinic.

³⁰ Soc spisil te chambahlametic te ayic ta bahlumilal, spisil te ya stas sbahic ta lumq'uinal, soc spisil te mutetic ya xwihlic ta toyol, ha swe'elic ya xc'oht spisil te yaxal ha'maletique, xchi. Hich c'oht yu'un.

³¹ Dios la yil spisil te bintic la spas, mero lec c'oht. Te yihc'ubel q'uinal soc te sacubel q'uinal, ha swaquebal c'ahc'al.