Filipenses 2 - Bible in Tzeltal Bachajón

Pehc'aj soc tohytesbot sc'oblal Cristo

¹ Ha yu'un teme ay yip awo'tanic ta scuenta Cristo, teme ay smuc'ul awo'tanic yu'un te sc'uxul yo'tan, teme jun pajal awo'tanic soc te Espíritu, teme ay yutsil sc'uxul awo'tanique,

² ts'acaytesbonic te stse'elil co'tan yu'un te pajaluc awo'tanic, pajaluc c'ux yac awa'iy abahic, junuc nax ya x'ayinex soc junuc nax snopojibal awu'unic.

³ Ma me ayuc bin yac apasic ta scuenta te bin ya sc'an awo'tanic atuquel o ta scuenta toybahil; peq'ueluc xawac' abahic, hich me xap'is te toyol xan ay te yantic te bin ut'il te ha'ate.

⁴ Ma me atuqueluc nax yac ale awutsil alequil, ha me xalehic te ha'uc nix hich ay yutsil slequilic te yantique.

⁵ Hichuc me awo'tanic te bin ut'il yo'tan te Cristo Jesús:

⁶ Aunque pajal stalel soc Dios, ma ha'uc bayel sc'oblal ta yo'tan te pajal ay soc Dios,

⁷ la sloq'ues sba ta yo'tan, la yich'be stalel a'bat, pajal yilel soc ants-winiquetic c'oht.

⁸ Te c'alal hich ay te bin ut'il winic, la to xan spehc'an sba a, la sch'uhun mandar c'alal ta lajel, ha te lajel ta cruz.

⁹ Ha scuentahil te Dios la stohytesbe sc'oblal soc la ya'be sbihil te toyol ay yu'un spisil bihililetic,

¹⁰ scuenta yu'un ta sbihil Jesús ya me squejan sbahic spisil mach'atic ayic ta ch'ulchan, ta bahlumilal soc ta ye'tal bahlumilal,

¹¹ soc spisilic ya me yalic ta jamal te ha Ajwalil te Jesucristo, scuenta yutsil sc'oblal ya xc'oht te Jtatic Dios yu'une.

Luz c'ohemex yu'un bahlumilal

¹² Ha yu'un, ha'ex te c'uxex ta co'tan, hich te bin ut'il spisil ora la ach'uhunic mandar c'alal joquex to a, c'ax to xan me hich xapasic a te c'alal ma ba joquex; ta scuenta xiwel soc nihquel a'telinahic spasel bin pasel ya sc'an te bin ut'il colemexixe,

¹³ como ha nix te Dios te ya x'a'tej ta awo'tanic, te ya yac' te yac ac'anic soc te yac apasic te bin lec ya sc'an yo'tan stuquel.

¹⁴ Spisil te bintic yac apasic, ma me x'ochex wulajanel o hach-c'op,

¹⁵ scuenta yu'un mayuc bin ya sutotex ta c'op yu'un soc mayuc amulic, ha yal-snich'anex Dios te mayuc awa'baquil te ayex ta yohlil te caj ts'umbalil ini te chopol soc bohl, te hich ya xtihlex ta bahlumilal te bin ut'il eq'uetic ta yohlilic,

¹⁶ te c'alal yac atoybe sc'oblal te c'op scuenta cuxlejal; scuenta yu'un ta sc'ahc'alel Cristo ya xhu' ya jtoy jba yu'un te ma tojoluc ahnimajon soc ma tojoluc a'tejon.

¹⁷ Aunque ya yich' malel jcuxlejal hich te bin ut'il malbil mahtanil ta sba te milbil mahtanil soc ta sba te a'batinel yac awaq'uic ta scuenta sch'uhunel awo'tanic, tse'el co'tan yu'un soc pajal tse'el co'tantic ta jpisiltic.

¹⁸ Ha nix hich tse'eluc me awo'tanic soc pajaluc me tse'el co'tantic.

Timoteo soc Epafrodito

¹⁹ Teme hich ya sc'an te Cajwaltic Jesús, ya jticombeyex tal ta ora te Timoteo, scuenta yu'un hich me ya xmuc'ub co'tan teme la jca'iy bin ut'il ayex,

²⁰ como mayuc yan mach'a hich pajal co'tan soc, soc te melel ay ac'oblalic ta yo'tan.

²¹ Como spisilic ya slehic bin ya sc'an yo'tanic stuquelic, ma ha'uc te bin ya sc'an yo'tan te Cristo Jesús.

²² Pero ana'ojic bin ut'il ay te lec stalel te Timoteo, ha te la sjoquinon ta a'tel ta scuenta te lec yach'il c'op hich te bin ut'il jtuhl querem soc stat.

²³ Ha yu'un hich jnopoj te ha ya jticombeyex tal teme la jca'iy bin ut'il ya xc'ohone.

²⁴ Smuc'ulinej co'tan te Cajwaltic te ha nix hichon ya xtal quilex ta ora.

²⁵ Pero la jnop te ay sc'oblal te ya jticombeyex suhtel te quermano Epafrodito, te jmohlol ta a'tel soc jmohlol ta soldadohil, te ticombil awu'unic yu'un ya scoltayon.

²⁶ Mero hich yo'tan te ya xtal yilex ta apisilic, soc bayel la smel yo'tan yu'un te la awa'iyic te tsacot ta chamel.

²⁷ Melel nix a te tsacot ta chamel, jteb xanix ma ba cham, pero Dios c'uxultayot yu'un; ma stuqueluc nax, ha nix hichon scuenta yu'un ma ba c'ax bayel ya jmel co'tan yu'un.

²⁸ Ha yu'un bayel xan sc'oblal ya ca'iy te ya jticombeyex tal, scuenta yu'un te c'alal yac awilic yan buelta, tse'el awo'tanic yu'un, soc hich ma ba bayel ya jmelix co'tan yu'un.

²⁹ Soc stse'elil awo'tan xawiq'uic ta scuenta Cajwaltic; soc ich'ahic ta muc' te mach'atic pajal ay soc,

³⁰ como ta scuenta te ya'tel te Cristo jteb ma ba cham yu'un, c'an yac' scuxlejal ta shu'tesel te banti ma ba hu' awu'unic acoltaybelonique.