Filemón 1 - Bible in Tzeltal Bachajón

Spatil-o'tanil

¹ Pablo, te ayon ta chuquel ta scuenta Jesucristo, soc te quermanotic Timoteo, ta stojol Filemón, te c'uxat ta co'tan soc te jmohlol jbahtic ta a'tel,

² soc ta stojol te quermanatic Apia, soc Arquipo te jmohlol jbahcotic ta soldadohil soc te iglesia te ay ta anahe:

³ Ayuc ta atojolic te yutsil-o'tanil soc lamal q'uinal yu'un te Jtatic Dios soc te Cajwaltic Jesucristo.

Sc'uxul yo'tan soc sch'uhunel yo'tan Filemón

⁴ Spisil ora ya calbe wocol te Dios cu'un te c'alal ya jna'at ta stojol Dios,

⁵ yu'un ca'iybeyej sc'oblal te sc'uxul awo'tan soc te sch'uhunel awo'tan ta stojol te Cajwaltic Jesús soc ta stojol spisil te mach'atic ch'ultesbilique;

⁶ soc ya jc'ambe Dios te ha ta scuenta te jun ayotic ta sch'uhunel, yacuc ana' spisil te bintic lec ay cu'untic ta scuenta Cristo.

⁷ Bayel stse'elil co'tancotic soc smuc'ul co'tancotic yu'un te sc'uxul awo'tan, como ha'at ta acuenta, hermano, te yich'oj yip yo'tanic te mach'atic ch'ultesbilique.

Pablo ya xc'opoj yu'un Onésimo

⁸ Ha yu'un, aunque ya xhu' ya jpasat ta mandar ta scuenta Cristo yu'un spasel te bin lec ya sc'an pasele,

⁹ ya calbat wocol ta scuenta sc'uxul awo'tan, ho'on, Pablohon, te mamalonix soc te ayon ta chuquel ta ora ini ta scuenta te Jesucristo.

¹⁰ Ya jc'oponat yu'un te jnich'an Onésimo, te ha jnich'an c'oht te c'alal ayon ta chuquele.

¹¹ Ma ba tuhun awu'un ta nahil to, pero ta ora ini ya xtuhun cu'untic ta jchebaltic.

¹² Ha ya jticombatix suhtel ta atojol; ic'a ta atojol hichuc bin ut'il la awic'onix te ho'one.

¹³ Co'tanuc ya quic' joquin scuenta ajelol ya xc'oht te ya yac' sba ta a'batinel cu'un te bin ut'il ayon ta chuquel ta scuenta te lec yach'il c'ope.

¹⁴ Pero ma jc'an te hich ya jpas teme ma hichuc awo'tan, scuenta yu'un te coltayel awu'un ma sujeluc yac awa'iy, pero hich sc'anojel awo'tan.

¹⁵ Ha wan scuentahil te ay c'ahc'al loq'uem ta atojol, scuenta yu'un ha awu'un ya xhil spisil ora,

¹⁶ ma hichuquix te bin ut'il moso, c'axuquix hich sc'oblal a te bin ut'il moso, hich te bin ut'il awermano te c'ux ta awo'tan, te ha nix hich bayel c'ux ya ca'iy ta co'tan te ho'one, pero c'axuc to xan hich ya xc'oht ta awo'tan, te bin ut'il jtuhl winic soc te bin ut'il awermano ta stojol Cajwaltic.

¹⁷ Ha yu'un teme jmohlol jbahtic, ic'a ta atojol hichuc te bin ut'il ho'on.

¹⁸ Teme ay bin chopol la spasbat, o teme ay sbet awu'une, ho'on me xawa'bon jtoj.

¹⁹ Ho'on Pablohon la jts'ihbay ta jc'ab: Ho'on ya jtojbat (ma ha'uc ya jtahbat ta halel te ay abet cu'un te ha'ate).

²⁰ Hich, hermano, ayuc bin ya jta awu'un ta scuenta te Cajwaltic; muc'ubtesbon co'tan ta scuenta te Cajwaltique.

²¹ La jts'ihbabat yu'un sch'uhunej co'tan te yac ach'uhumbon jc'op, soc ya jna' te c'ax hich yac apas a te bin ut'il la jcalbate.

²² Soc chahpambon banti ya xc'ohon ta ohlanel ta ana, como sch'uhunej co'tan te ya x'ac'otonix bahel yu'un ya quilex, te bin ut'il yaquex ta sc'oponel Dios ta jcuenta.

Spatil yo'tan yu'un yantic

²³ Xcoltanucat laj yu'un te Epafras, te jmohlol ta chuquel ta scuenta te Cristo Jesús.

²⁴ Soc xcoltanucat laj yu'un te Marcos, Aristarco, Demas soc te Lucas, te jmohloltac ta a'tel.

²⁵ Te yutsil yo'tan te Cajwaltic Jesucristo ac'a sjoquin te espíritu awu'unic. Hichuc.