Ezequiel 5 - Bible in Tzeltal Bachajón

¹ Ha'at, snich'anat winic, tsaca jun cuchillo te mero ay ye, te pajal soc xilete, quits'a stsotsel ajol soc awisim a; patil ich'a jun balanza soc pasa ta ohlil te stsotsel ajole.

² C'alal ya sts'acay te joytayel ta guerra, chic'a ta yohlil te pueblo jun ta yoxebal te stsotsel ajol. Ich'a jun xan ta yoxebal, set'ticlana ta espada ta sjoyobal te pueblo. Te jun xan ta yoxebal puca bahel ta ic', ho'on ya jloq'ues te espada ta sna, ya jnuts bahel a.

³ Soc tsaca cha'oxlihc stsotsel ajol, chuca ta yoc te anahtil-c'u'.

⁴ Tsaca xan stsotsel ajol, otsesa ta c'ahc' yu'un tey ya xlajic ta c'ahq'uel a; tey ya xloc' tal c'ahc' a ta stojol spisil te sna Israel.

⁵ Hich yaloj te Jehová, te Ajwalil: Ha Jerusalén ini; la jcac' ta yohlil te nacionetic soc te yantic q'uinaletic ta sjoyobal.

⁶ Pero la stoy sbahic ta stojol te bintic halbil cu'un soc te mandariletic cu'une, c'ax hich schopolil a te bin ut'il te nacionetic soc te yantic pueblohetic ta sjoyobal; como la sp'ajbonic te bintic halbil cu'un soc te mandariletic cu'un, ma ba la st'unic.

⁷ Ha yu'un hich yaloj te Jehová: Ta scaj te c'ax hich atoyoj abahic a te bin ut'il te nacionetic ta ajoyobal, te ma ba la at'unic te mandariletic cu'un, ma ba la ach'uhunic spasel te mandariletic cu'un, ni ha'uc la at'unic bahel te leyetic yu'un te nacionetic te ayic ta ajoyobalique,

⁸ ha yu'un hich yaloj te Jehová, te Ajwalil: Ho'on ya jcontrahinat, hich, ho'onix; soc ya ca'bat castigo ta atojol ta scomon sit te nacionetique.

⁹ Ya jpas ta atojol te mayuc hich jpasoj soc mayuc bin ora ya jpas yan buelta, ta scaj spisil te bintic ilobtic sba awu'une.

¹⁰ Ha yu'un te me'iltatiletic ya me sti'ic te yal-snich'anic te ayic ta awohlil, soc te al-nich'anetic ya me sti'ic te sme'statique. Ya cac' castigo ta atojol, soc te mach'atic cuxul ya xhilic ya jpucticlan bahel ta ic'.

¹¹ Ha yu'un, cuxulon, xchi te Jehová, te Ajwalil, te bin ut'il la abohlobtesbonic sc'oblal te ch'ul awilal cu'un ta scuenta spisil te bintic ilobtic sba awu'un, ha nix hich ya me jlajinat; ma ba ya jpasbat perdón, ma ba ya jna'bat yo'bolil aba.

¹² Ya me xlaj jun ta yoxebal ta jmilawal-chamel soc ya me xchamic ta wi'nal ta awohlil; jun ta yoxebal ya xlaj ta espada ta ajoyobal; soc jun ta yoxebal ya jpuc bahel ta ic'; soc ya jloq'ues te espada ta sna, ya jnuts bahel a.

¹³ Hich ya xlaj te quilimba, ya cac' c'ohtuc ta stojolic te sc'ahc'al co'tan, hich ya xlahmaj a. Hich me ya sna'ic a te ho'on Jehovahon c'opojonix soc xut'et co'tan, c'alal ya jts'acaytes ta stojolic te quilimbahe.

¹⁴ Ya jc'atp'unat ta busul jinel soc ta labanel ta stojol te nacionetic te ayic ta ajoyobal, ta comon sitil spisil mach'atic ya xc'axic tey a.

¹⁵ Ya me awich' labanel, tse'layel, tulan nohptesel soc xiweltic sba ta stojol te nacionetic ta ajoyobal, te c'alal ya ca'bat castigo soc sc'ahc'al co'tan soc quilimba soc tulan tsitsel. Ho'on Jehovahon hich caloj.

¹⁶ C'alal ya jt'im bahel ta stojolic te chopol ya'tejibalul wi'nal te ya xlajinwan, ha te ya jticon bahel yu'un ya slajinat, ya cac' te ya xp'ohl wi'nal ta atojolic soc ya cac' te mayuc pan ta awohlilique.

¹⁷ Ya jticon bahel ta atojolic wi'nal soc ti'awal chambahlametic, mayuc awal-anich'nabic ya xhilex yu'unic; ya xc'ax ta awohlil jmilawal-chamel soc malel ch'ich', soc ya jticon bahel espada ta atojol. Ho'on Jehovahon calojix, xchi.