Ezequiel 4 - Bible in Tzeltal Bachajón

Halbil te ya yich' joytayel ta guerra Jerusalén

¹ Ha'at, snich'anat winic, tsaca jun adobe, ac'a ta atojol, pasbeya sloc'ombahil te Jerusalén tey a.

² Ac'a ta joytayel ta guerra, pasa a'tejibaletic yu'un guerra ta sjoyobal, busambeya smohibalul ta spat, pasa campamento ta sjoyobal, soc ac'a a'tejibaletic yu'un sjinel ts'ahc.

³ Soc tsaca jun pechel-taq'uin, ac'a scuenta ts'ahc pasbil ta taq'uin te ohlil ya xc'oht awu'un soc te pueblo; ac'a asit awelaw ta stojol. Hich joytaybil ta guerra ya xc'oht, hich yac ajoytay ta guerra. Ha me seña ya xc'oht ta stojol te sna Israel.

⁴ Te ha'ate ya me ats'ehan aba ta q'uexam soc ya me awac' ta aba te smul Israel. Te jayeb c'ahc'al ts'ehelat tey a ya me awich'be te smulique.

⁵ La ca'bat jun c'ahc'al scuenta jujun ha'bil te smulique: ha lajuneb sbalunlajunwinic (390) c'ahc'al; hich yac awich'be smul te sna Israel.

⁶ Te c'alal ya sts'acay awu'un, ya me acha'ts'ehan xan aba ta wa'el, ya me awich'be smul te sna Judá cha'winic (40) c'ahc'al, jujun c'ahc'al scuenta jujun ha'bil.

⁷ Ya me at'ojan asit ta stojol Jerusalén te joytaybil ta guerra, soc ta ac'ab te mayuc bin mucbil yu'un ya me awal sc'op-jalwanej ta scontrahinel.

⁸ Ilawil, ya jchucat ta lazo scuenta yu'un ma xhu' yac asutilan aba a ha to c'alal ya sts'acay te jayeb c'ahc'al yac ajoytay ta guerra.

⁹ Ich'a trigo soc cebada, haba soc lenteja, mijo soc avena; ac'a ta yawil, pasa apan a. Ha yac awe' ta lajuneb sbalunlajunwinic (390) c'ahc'al te ts'ehelat ta aq'uexam.

¹⁰ Te yalal te we'elil yac awe' jujun c'ahc'al ha jtahb siclo; p'isbil yorahil yac awe'.

¹¹ Soc p'isbil yac awuch' ha', jun ta swaquebal te hin; p'isbil yorahil yac awuch'.

¹² Ya me awe' pan pasbil ta cebada, ta'ajtesbil ta c'ahc' ta stsa' ants-winic; ta'ajtesa ta comon sitil, xchi.

¹³ La yal te Jehová: Hich te snich'nab Israel, ta yohlil te nacionetic te banti ya jpucticlan bahel, ya swe'ic we'elil te bohloben sc'oblal, xchi.

¹⁴ Hich la jcal: ¡Ay, Cajwal Jehová! ma ba bohloben sc'oblal te jcuxlejal; ta jqueremil c'alal ora ini mayuc bin ora jwe'oj chamen sbaq'uetal chambahlam o te butsticlambile, mayuc bin ora jwe'oj ti'bal te bohloben sc'oblal, xchihon.

¹⁵ Hich la sjac': Lec ay, ya cac' te ya xhu' yac atuhun stsa' wacax scuenta sjelol stsa' ants-winic yu'un yac ata'ajtes a te apane, xchi.

¹⁶ Patil hich la yalbon: Snich'anat winic, ya cac' te mayuc pan ta Jerusalén; licbil pan ya swe'ic soc swocolic, soc p'isbil ya yuch'ic ha' soc xiwel.

¹⁷ C'alal ya xlaj te pan soc te ha', talel c'axel me ya yil sbahic soc xiwel soc ya me xlajic bahel ta scaj smulic, xchi.