Ezequiel 2 - Bible in Tzeltal Bachajón

Ic'ot ta a'tel Ezequiel

¹ Hich la yalbon: Snich'anat winic, tehc'ana aba, ay bin ya calbat, xchi.

² C'alal la sc'oponon, och ta co'tan te espíritu, la yac' tehc'ajucon; la jca'iy te mach'a yac sc'opombelon.

³ Hich la yalbon: Snich'anat winic, ya jticonat bahel ta stojol te snich'nab Israel, ta stojol te toyba nación te stoyoj sba ta jtojole. Ha'ic soc te sme'static ta cajalcaj stoyoj sbahic ta jtojol c'alal ora.

⁴ Ya jticonat bahel ta stojol te mach'atic tulan sit yelawic soc tulan yo'tanic, hich me xawalbe ta tulan: Hich yaloj te Cajwaltic Jehová, xchihat.

⁵ Teme ya ya'iybat ac'op o teme ma ba ya ya'iybat ac'op, (como ha toyba pueblo), ya me sna'ic te ay jtuhl jalwanej ta yohlilic.

⁶ Pero ha'at snich'anat winic, ma xaxi' soc ma xaxi'be te sc'opique. Aunque ayat ta yohlil ch'ixiletic soc ch'ix, soc aunque nahinemat ta yohlil tsequetic, ma xaxi' te bin ya yalbat soc ma xiwat ta stojolic, como ha toyba pueblo.

⁷ Ya me awalbe ya'iyic te jc'ope, chican teme ya ya'iyic o teme ma sc'an ya ya'iyic, como mero stoyoj sbahic.

⁸ Pero ha'at, snich'anat winic, a'iya awa'iy ta lec te bin ya calbate; ma me xatoy aba hich te bin ut'il te pueblo te stoyoj sbahe; jama awe, we'an te bin ya ca'bat awe'e, xchi.

⁹ Hich la jquil jun c'abal te yac'oj talel ta jtojol, stsacoj jun balbil hun.

¹⁰ La slim ta jtojol, ts'ihbabil ta jehch ta jehch. Tey ts'ihbabil a te sc'op oq'uel, mel-o'tan soc wocoletic.