Éxodo 36 - Bible in Tzeltal Bachajón

¹ Ha yu'un te Bezaleel, Aholiab soc spisil mach'atic ay smahtanic yu'un spasel bintic t'ujbil ta pasel, te ha a'botic sp'ijil yo'tanic yu'un Jehová ta sna'el spasel spisil te bintic ya xtuhun ta ch'ul awilal, ha'ic ya spasic spisil te bin la yal ta mandar te Jehová, xchi te Moisés.

Moisés la scom te pueblo ta yaq'uel mahtaniletic

² Te Moisés la yic' tal te Bezaleel, Aholiab soc spisil te mach'atic ay sp'ijilic ta spasel te bintic t'ujbil ta pasel, te a'botic sp'ijil yo'tanic yu'un te Jehová, spisil te mach'atic tijbot yo'tanic yu'un ya xtal spasic te a'tel tey a.

³ A'bot ta sc'abic yu'un Moisés spisil te mahtaniletic la yich'ic tal te snich'nab Israel yu'un spasel te a'tel ta ch'ul awilal. Ta jujun sab jun yo'tanic la yich'ic tal mahtaniletic.

⁴ Ha yu'un spisil te mach'atic ay sp'ijilic te ayic ta a'tel ta ch'ul awilal la squehchanic hilel te ya'telic,

⁵ hich tal yalbeyic te Moisés: C'axix a te yac yac'belic te pueblo te bin ya xtuhun yu'un te a'tel te la yal ta mandar te Jehová te ya yich' pasele, xchihic.

⁶ Ha yu'un te Moisés la sticon bahel ta halel ta spisil te campamento: Ma me ayuquix winic soc ants te ay bin ya spasic xan scuenta mahtanil yu'un te ch'ul awilal, xchi. Hich la yich' comel te pueblo ta yaq'uel xan mahtaniletic,

⁷ como bayelix sobra te bintic ya xtuhun yu'un spasel spisil te a'tele.

Ya yich' pasel Nahilpac' Templo

⁸ Spisil te mach'atic ay sp'ijil yo'tanic ta yohlil te mach'atic ayic ta a'tel, la spasic lajunlihc pac' ta ts'otbil lino, ta yax, chi'in-yax soc tsajal estambre yu'un te Nahilpac' Templo; soc buen t'ujbil la sch'ahlic ta ts'isel ta sloc'omba querubinetic.

⁹ Te jujulihc pac' ha waxaqueb scha'winic (28) xuhc'ubil snahtil, soc chaneb xuhc'ubil sjamalil. Pajal sp'isol spisil te paq'uetique.

¹⁰ La ya'be stsacticlan sba ho'lihc, ha nix hich la ya'be stsacticlan sba te yan ho'lihc xane.

¹¹ La yac'ticlambe schiquin pasbil ta yaxal pac' ta sti'il te slajibal pac' ta sba chahpale, ha nix hich la spasbe te slajibal pac' ta scha'chahpale.

¹² La spasticlambe lajuneb yoxwinic (50) schiquin te sba chahpale, soc yan xan lajuneb yoxwinic (50) ta scha'chahpale. Nuhp'ulnuhp' la ya'be yil sba te schiquine.

¹³ Soc la spasic lajuneb yoxwinic (50) ganchohetic ta oro te la stsac sba ta scha'chahpalic a, hich junax c'oht te Nahilpac' Templo.

¹⁴ La sjal pac' ta stsotsel tentsun yu'un smuhquil te Nahilpac' Templo; buluchlihc la sjal.

¹⁵ Te jujulihc pac' ha lajuneb scha'winic (30) xuhc'ubil snahtil soc chaneb xuhc'ubil sjamalil. Junax sp'isol ta sbuluchebal.

¹⁶ La ya'be stsacticlan sba ho'lihc te paq'ue, ha nix hich te yan waclihc xane.

¹⁷ La spasbe lajuneb yoxwinic (50) schiquin ta sti'il te slajibal pac' ta sba chahpale; soc yan xan lajuneb yoxwinic (50) schiquin ta sti'il te slajibal pac' ta scha'chahpale.

¹⁸ Soc la spas lajuneb yoxwinic (50) ganchohetic ta bronce yu'un ya yich' tsaquel a te nahilpac', scuenta yu'un junax ya xc'oht a.

¹⁹ La spasbe smuhquil te nahilpac' ta snuhculel tat tuminchijetic te bombil ta tsaj, soc yan xan smuhquil ta sba te pasbil ta nuhculetic.

²⁰ Soc la spasbe te Nahilpac' Templo tablahetic ta acacia-te' te toj teq'uele.

²¹ Te jujun tabla lajuneb xuhc'ubil snahtil soc j'ohlil scheb xuhc'ubil sjamalil.

²² Te jujun tabla ay cheb slawuxte'el te ya stsac sba soc a te yane. Hich la spasticlambe spisil te tablahetic yu'un te Nahilpac' Templo.

²³ La spasbe jtahb (20) tablahetic ta stojol sur.

²⁴ Soc la spasbe cha'winic (40) scajtajib ta plata ta ye'tal te jtahb tablahetic; chebcheb scajtajib ta ye'tal te jujun tabla ta schebal slawuxte'ele.

²⁵ Ha nix hich ta jehch te Nahilpac' Templo, ta stojol norte, la spas jtahb (20) ta pehch tablahetic,

²⁶ soc cha'winic (40) scajtajib ta plata, chebcheb scajtajib ta ye'tal te jujun tabla.

²⁷ Ta spat te Nahilpac' Templo, ta stojol banti ya xmahl c'ahc'al, la spas wacpehch tablahetic.

²⁸ Soc ta jujun xuhc te Nahilpac' Templo ta spat la spasbe cha'pehch tabla.

²⁹ Cheb cheb la stsac sba ta ye'tal c'alal ta toyol te banti ay te shahchibal sch'ocowile; hich la schahpan te cheb tabla ta jujun xuhc.

³⁰ Ha yu'un ay waxaqueb tablahetic soc waclajuneb scajtajib ta plata; chebcheb scajtajib ta ye'tal te jujun tabla.

³¹ Soc la spasbe sc'atal-te'el ta acacia-te': ho'eb yu'un te tablahetic ta jehch te Nahilpac' Templo,

³² ho'eb ta yan jehch, soc ho'eb ta spat ta stojol banti ya xmahl c'ahc'al.

³³ La yac' te ya xc'oht ta jehch ta jehch te sc'atal-te'el te ay ta ohlil yu'un te tablahetique.

³⁴ La spots ta oro te tablahetic soc la spas ta oro te ch'ocowiletic te banti ya xc'ax te sc'atal-te'el; ha nix hich la spots ta oro te sc'atal-te'ele.

³⁵ Soc la spas te tsalul pac' ta yax, chi'in-yax soc tsajal estambre, soc ta ts'otbil lino; buen t'ujbil la sch'ahl ta ts'isel te querubinetic.

³⁶ La spasbe chaneb yoyal ta acacia-te' soc la spots ta oro; ha nix hich pasbil ta oro te ganchohetic yu'un, soc la yuhltesbe ta pasel chaneb scajtajib ta plata.

³⁷ Soc la spas pac' yu'un te yochibal te Nahilpac' Templo te pasbil ta yax, chi'in-yax soc tsajal estambre, soc ts'otbil lino; t'ujbil ch'albil ta ts'isel.

³⁸ La spasbe ho'eb yoyal soc sganchohil; la spotsbe ta oro te sni'il te oyetic soc te sc'atal-te'el, soc la spas ta bronce te ho'eb scajtajibe.