Éxodo 35 - Bible in Tzeltal Bachajón

Mandaril yu'un cux-o'tan

¹ Te Moisés la yic' tal spisil te pueblo yu'un te snich'nab Israel, hich la yalbe: Hich ay te bintic la yal ta mandar Jehová te ya sc'an ya yich' pasel:

² Waqueb c'ahc'al ay a'tel, yan ta shuquebal c'ahc'al ch'ultesbil me awu'unic, ha sc'ahc'alel cux-o'tan yu'un te Jehová; mach'ayuc te ya x'a'tej a, ya me yich' milel.

³ Ma me xanup' ac'ahq'uic ta anahic ta sc'ahc'alel cux-o'tan, xchi.

Mahtanil yu'un Nahilpac' Templo

⁴ Te Moisés hich la yalbe xan spisil te pueblo yu'un te snich'nab Israel: Hich ay te bin yaloj te Jehová:

⁵ Tsobahic tal ta awohlilic mahtanil yu'un Jehová; spisil te mach'a jun yo'tan ya sc'an ya yac', ac'a yich'beyic tal ta stojol Jehová: teme oro, plata, bronce,

⁶ yax, chi'in-yax soc tsajal estambre, lequil ts'otbil lino, stsotsel tentsun,

⁷ snuhculel stat tuminchij bombil ta tsaj, nuhculetic, acacia-te',

⁸ aceite yu'un te tsumbil c'ahc', te bintic sumet yic' yu'un te aceite yu'un ch'ultesel soc yu'un te pom te sumet yic',

⁹ ónice, soc tonetic te ya xtuhun ta efod soc ta bolsa pac' ya xc'oht ta stahn.

Bintic ya xtuhun ta spasel ta Nahilpac' Templo

¹⁰ Spisil te mach'atic ta awohlilic te ay sp'ijil yo'tanic ya me xtalic, ya me spasic spisil te bintic yaloj ta mandar te Jehová:

¹¹ ha te Nahilpac' Templo soc spac'al, smuhquil, sganchohetic, stablahul, sc'atal-te'el, yoyal soc scajtajib;

¹² te scaxahul te chapbil-c'op soc sq'uechojibal, te yawil stahel perdón, te tsalul pac';

¹³ te mesa soc sq'uechojibal soc spisil te bintic ya xtuhun tey a, te pan ac'bil ta stojol Jehová;

¹⁴ te scajtajib c'ahc' te ya sacubtes q'uinal soc te bintic ya xtuhun tey a, te c'ahq'uetic yu'un, soc te aceite yu'un te c'ahq'ue;

¹⁵ te scajtajib ta chiq'uel pom soc sq'uechojibal, te aceite yu'un ch'ultesel, te pom te sumet yic', te pac' yu'un te yochibal te Nahilpac' Templo;

¹⁶ te scajtajib scohtol chic'bil mahtanil, te bin jalbil ta bronce, te sq'uechojibal soc spisil te bintic ya xtuhun tey a, te yawil ha' soc scajtajib;

¹⁷ te paq'uetic yu'un te amac', te yoyaletic soc snactajibic, te pac' yu'un te yochibal te amac';

¹⁸ te ts'acticlambil yich'o-ip yu'un te Nahilpac' Templo, te ts'acticlambil yich'o-ip yu'un te amac' soc te lazohetic yu'un;

¹⁹ te c'u'uletic yu'un spasel a'tel ta ch'ul awilal, te ch'ul c'u'ul yu'un te sacerdote Aarón, soc te sc'u' spaq'uic te snich'nab scuenta ya'telic ta sacerdotehil, xchi.

La yich' tal mahtanil te pueblo

²⁰ Hich loq'uic bahel ta stojol Moisés spisil te pueblo yu'un te snich'nab Israel.

²¹ Spisil te mach'atic tijbot yo'tanic soc spisil te mach'atic la sc'an yo'tanic, la yich'beyic tal smahtan Jehová yu'un te ya'tel te Nahilpac' Templo yu'un tahojibal, yu'un spisil te a'tel ya yich' pasel tey a soc te ch'ul c'u'uletique.

²² Talic winiquetic soc antsetic, spisil mach'atic ay sc'anojel yo'tanic, la yich'ic tal cadenahetic, staq'uinal schiquinic, sch'ocowic, sch'ahlel snuc' sc'abic, soc spisil te bintic t'ujbil te pasbil ta oro; spisilic la ya'beyic smahtanin oro te Jehová.

²³ Spisil te mach'atic ay yu'un te yax, chi'in-yax soc tsajal estambre, ts'otbil lino, stsotsel tentsun, snuhculel stat tuminchij te bombil ta tsaj, o nuhculetic, la yich'ic tal.

²⁴ Spisil te mach'atic la yaq'uic plata o bronce scuenta mahtanil la yich'ic tal ta stojol Jehová. Spisil te mach'atic ay acacia-te' yu'unic la yich'ic tal yu'un te a'tele.

²⁵ Soc spisil te antsetic te ay sp'ijil yo'tanic la ya'iyic nahujel, soc la yich'ic tal te bin nahuybil yu'unic: ha te yax, chi'in-yax soc tsajal estambre, o ts'otbil lino.

²⁶ Spisil te antsetic te tijbot yo'tanic soc te ya sna'ic nahujel, la snahuyic stsotsel tentsun.

²⁷ Te príncipaletic la yich'ic tal ónice soc yantic t'ujbil tonetic te ya xtuhun yu'un te efod soc te bolsa pac' ya xc'oht ta stahn,

²⁸ soc la yich'ic tal te bintic sumet yic', aceite yu'un te c'ahq'uetic, aceite yu'un ch'ultesel, soc te pom te sumet yiq'ue.

²⁹ Spisil te snich'nab Israel, winiquetic soc antsetic, te la sc'an yo'tanic te ay bin ya yich'ic tal yu'un te a'tel te halbot yu'un Jehová te Moisés te ya yich' pasele, ta stuquel-o'tanic la yich'beyic tal smahtan te Jehová.

Iq'uel yu'un Bezaleel soc Aholiab

³⁰ Te Moisés hich la yalbe te snich'nab Israel: Ilawilic, te Jehová la stsa te Bezaleel snich'an Uri, snich'an Hur, sts'umbal Judá,

³¹ soc la snojesbeyix ta yo'tan te Espíritu yu'un Dios, soc sp'ijil yo'tan, sna'el bin ay ta na'el, soc sna'el spasel spisil bintic t'ujbil ay,

³² yu'un schahpanel bintic ay ta pasel, spasel a'tel ta oro, ta plata, soc bronce,

³³ yu'un sch'uhlel soc snahcanlanel t'ujbil tonetic, spasel te bin ya yich' pasel ta te', soc spasel biluc t'ujbil ta pasel.

³⁴ Soc a'botic smahtan yu'un p'ijubteswanej, soc ha nix hich te Aholiab snich'an Ahisamac, te sts'umbal Dan.

³⁵ Ha la snojesbe ta yo'tanic scuenta sna'el spasel spisil bin t'ujbil ay soc scuenta sp'isel, soc sch'ahlel ta ts'isel ta yax, chi'in-yax soc tsajal estambre, ta ts'otbil lino, soc sjalel; ya xhu' yu'unic spasel spisil a'tel soc schahpanel bintic ay ta pasel.