Éxodo 33 - Bible in Tzeltal Bachajón

Te Nahilpac' Templo yu'un tahojibal

¹ Te Jehová la yalbe te Moisés: Bahan, loc'an bahel soc te pueblo te la aloq'ues tal ta sq'uinal Egipto, bahan tey ta q'uinal te la jcalbe ta jamal te Abraham, Isaac soc Jacob: Ya ca'be te ats'umbal, te xchihone.

² Ya jticon bahel ta atojol ch'ul a'bat, soc ya jtenticlan loq'uel te cananeo, amorreo, heteo, ferezeo, heveo soc te jebuseo.

³ Bahanic tey ta q'uinal te banti ya x'oquin leche soc chab. Yan te ho'one ma ba ya joquinex bahel, teme repente ya jlajinex hilel ta be, como ha'ex pueblohex te tulan awo'tanic, xchi.

⁴ C'alal la ya'iyic te pueblo te bin ma lecuc ta a'iyel ini, la smel yo'tanic yu'un soc mayuc mach'a la sch'alix sbahic yu'un,

⁵ como te Jehová la yalbeyix te Moisés: Halbeya te snich'nab Israel: Te ha'ex pueblohex te mero tulan awo'tanic; te yacuc xtal joquinex jts'ihnuc, ya jlajinex te hichuque. Ha yu'un loq'uesahic te ach'ahlelic, scuenta yu'un ya jnop bin ya cutex, xchi.

⁶ Ha yorahil a te la sloq'ues sch'ahlelic te snich'nab Israel ta wits Horeb.

⁷ Te Moisés namal la yac' te Nahilpac' ta sti'il bahel te campamento; la ya'be sbihilin Nahilpac' Templo yu'un tahojibal. Mach'ayuc a te ya sle te Jehová, ya xbaht ta Nahilpac' Templo yu'un tahojibal te ay ta sti'il te campamento.

⁸ Te c'alal ya xloc' bahel ta Nahilpac' Templo te Moisés spisil te pueblo ya xhahchic, ya stehc'an sbahic ta sti'il snahilpaq'uic, ya st'ojan sitic ta yilel te Moisés ha to c'alal ya x'och bahel ta Nahilpac' Templo.

⁹ Te c'alal ya x'och bahel te Moisés, ya xco tal te bahlal tocal soc ya xc'oht ta yochibal te Nahilpac' Templo. Te Jehová ya xc'opoj soc te Moisés.

¹⁰ C'alal ya yilic te pueblo te ya stehc'an sba ta yochibal te Nahilpac' Templo te bahlal tocal, jujutuhl ya stehc'an sbahic ta sti'il te snahilpaq'uic soc ya sch'uhuntayic.

¹¹ Te Jehová ya snuhp'in sba ta c'op soc Moisés, hich te bin ut'il mach'a ya xc'opoj soc te smohlole. Patil te Moisés ya suht bahel ta campamento, yan te jcolel winic Josué snich'an Nun, te a'bat yu'un, ma ba ya yihquitay hilel te Nahilpac' Templo.

Te Moisés a'bot yil yutsilal Jehová

¹² Te Moisés la yalbe te Jehová: Ilawil, ha'at yac awalbon: Ic'a bahel te pueblo ini, xchihat, pero ma ba la awa'bon jna' mach'a a te yac awac' sjoquinon bahele. Pero awaloj: Ya jna'bat abihil, soc lec c'ohemat ta jtojol, xchihat.

¹³ Ha yu'un teme lec c'ohemon ta atojol, awocoluc, a'bon jna' te bin ay ta awo'tan, scuenta yu'un ya jna'bat aba soc te lecuc ya xc'ohon ta atojol. Soc na'a me te ha pueblo awu'un te pueblo ini, xchi.

¹⁴ Hich halbot yu'un Jehová: Ya joquinat bahel, soc ya ca'bat acux awo'tan, xchi.

¹⁵ Hich la sjac' te Moisés: Teme ma ba yac ajoquinotcotic bahel, ma me xaloq'uesotcotic bahel li'i.

¹⁶ ¿Bin ut'il ya xchicnaj teme lec c'ohemon ta atojol soc te pueblo awu'une? ¿Ma bal ha'uc ya xchicnaj yu'un te ha'at yac ajoquinon bahel, soc te bin ut'il te ho'on soc te pueblo awu'un parte ac'bilotcotic ta yohlil spisil te yantic pueblohetic ta swohlol bahlumilal? xchi.

¹⁷ Te Jehová la yalbe te Moisés: Ya jpas te bin la awal, te bin ut'il lec ac'oblal ta jtojol soc te ya jna'bat te abihile, xchi.

¹⁸ Ha yu'un hich la yal te Moisés: Awocoluc, a'bon quilbat a te awutsilal, xchi.

¹⁹ La sjac' te Jehová: Ya jc'asesbat ta atojol spisil te cutsilal, soc ya cal hilel ta atojol te jbihil, Jehová. Ho'on ya jc'uxultay te mach'a ya jc'an ya jc'uxultay, soc ya jna'be yo'bolil sba te mach'a ya jc'an ya jna'be yo'bolil sba.

²⁰ Pero ma xhu' yac awilbon te jsit quelaw, como mayuc mach'a ya xhu' ya yilon te cuxul ya xhil, xchi.

²¹ Soc la yal xan te Jehová: Ilawil, ay jun lugar nopol ta banti ayon. Yac atehc'an aba ta sba te ton,

²² te c'alal ya xc'ax bahel te cutsilal, ya cac'at ta banti hotol ochel te tone, ya jmacat ta jc'ab ha to teme c'axone.

²³ Patil ya jloq'ues te jc'ab, hich yac awilbon jpat; yan te jsit quelaw ma xhu' ta ilel stuquel, xchi.