Éxodo 31 - Bible in Tzeltal Bachajón

Iq'uel yu'un Bezaleel soc Aholiab

¹ Te Jehová la yalbe te Moisés:

² Ilawil, tsahbilix cu'un te Bezaleel snich'an Uri, te snich'an Hur, sts'umbal Judá,

³ soc la jnojesbe ta yo'tan te Espíritu yu'un Dios, soc sp'ijil yo'tan, snopojibal, sna'el bin ay ta na'el, soc sna'el spasel bintic t'ujbil,

⁴ scuenta yu'un ya sna' schahpanel bintic ay ta pasel, ya sna' a'tel ta oro, ta plata soc bronce,

⁵ ya sna' schahpanel t'ujbil tonetic soc ch'albil ta pasel te', soc spasel spisil ta chahp a'teliletic.

⁶ Soc la jca'be sjoquin ta a'tel te Aholiab snich'an Ahisamac, te sts'umbal Dan. Soc spisil te mach'atic ya sna'ic spasel a'tel la jca'beyix sp'ijil yo'tanic scuenta yu'un ya xhu' ya spasic spisil te bin la jcalbat ta mandar:

⁷ ha te Nahilpac' Templo yu'un tahojibal, te scaxahul Testigo-c'op, te yawil stahel perdón te ay ta sba, soc spisil te bintic ya xtuhun yu'un te Nahilpac' Templo;

⁸ te mesa soc te bintic ya xtuhun tey a, te scajtajib c'ahc' pasbil ta puro oro soc spisil bintic ya xtuhun tey a, te scajtajib ta chiq'uel pom,

⁹ te scajtajib scohtol chic'bil mahtanil soc spisil bintic ya xtuhun tey a, te yawil ha' soc te scajtajib,

¹⁰ te jalbil c'u'uletic, te ch'ul c'u'uletic yu'un te sacerdote Aarón, soc te c'u'uletic yu'un te snich'nab scuenta spasel ya'telic ta sacerdotehil,

¹¹ te aceite yu'un ch'ultesel, soc te pom te sumet yic' te ya xtuhun ta ch'ul awilal. Ya me spasic spisil hich te bin ut'il la jcalbat, xchi.

Sc'ahc'alel cux-o'tan

¹² Te Jehová la sc'opon xan te Moisés, hich la yalbe:

¹³ Ya me awalbe te snich'nab Israel: Ta mero melel ya me acanantayic te c'ahc'aletic yu'un cux-o'tan cu'un, como ha seña ya xc'oht ta jtojol soc ta atojolic soc te cajalcaj ats'umbalic, scuenta yu'un ya me ana'ic te ho'on Jehovahon te ya jch'ultesex.

¹⁴ Ya me acanantayic te sc'ahc'alel cux-o'tan, como ch'ultesbil ta acuentahic. Te mach'a ya sbohlobtesbe sc'oblal ya me xlaj; mach'ayuc a te ya spas biluc a'telil a, ya me yich' loq'uesel ta yohlil te pueblo yu'une.

¹⁵ Waqueb c'ahc'al ay a'tel, yan te shuquebal c'ahc'al ha sc'ahc'alel cux-o'tan te ch'ultesbil yu'un Jehová. Mach'ayuc a te ya x'a'tej ta sc'ahc'alel cux-o'tan ya me xlaj.

¹⁶ Ha yu'un te snich'nab Israel ya me scanantayic te sc'ahc'alel cux-o'tan, ya me spasic ta cajalcaj sts'umbalic scuenta chapbil-c'op te stalel ya xhil.

¹⁷ Sbahtel q'uinal ha me seña ta jtojol soc ta stojol te snich'nab Israel, como ta waqueb c'ahc'al te Jehová la spas ch'ulchan soc bahlumilal, soc ta shuquebal c'ahc'al la squehchan ya'tel soc la scux yo'tan, xchi.

¹⁸ Te c'alal laj yo'tan ta c'op soc Moisés ta wits Sinaí, la ya'be cha'pehch ton yu'un te Testigo-c'op, ha pehchel tonetic te la sts'ihbay ta yal sc'ab te Diose.