Éxodo 29 - Bible in Tzeltal Bachajón

Ya yich' ch'ultesel Aarón soc snich'nab

¹ Hich me yac apasbe yu'un ya yich'ic ch'ultesel, scuenta yu'un sacerdotehetic ya xc'ohtic cu'un: Tsaca jcoht jcolel toro soc cha'coht tat tuminchij te mayuc bin jihnem yu'unique,

² soc ich'a panetic te ma ba yich'oj levadura, pimil pan te ma ba yich'oj levadura te wots'bil soc aceite, soc jayal pan te ma ba yich'oj levadura te jaxbil ta aceite; ya me apasticlan ta lequil harina yu'un trigo.

³ Ya me awac' ta tut moch, tey yac awac' a scuenta mahtanil soc te jcolel toro soc te cha'coht tat tuminchij.

⁴ Ya me awic' bahel te Aarón soc snich'nab ta yochibal te Nahilpac' Templo yu'un tahojibal, ya me apocticlan ta ha'.

⁵ Ya me atsac te c'u'uletic, ya me awa'be slap te Aarón te muc'ul c'u'ul, te nahtil c'u'ul ay ta ye'tal te efod, te efod soc te bolsa pac' ya xc'oht ta stahn, soc ya me achuc ta schuhquil sch'uht te efod.

⁶ Ya me axojbe ta sjol te spixjol pac' soc ya me awac' ta spixjol pac' te ch'ul lehchel taquin.

⁷ Patil ya me atsac te aceite yu'un ch'ultesel, ya me amalbe ta sjol scuenta yich'el te ya'tele.

⁸ Soc ya me awac' te ya xnohpojic tal te snich'nab, ya me awa'be slapic te muc'ul c'u'uletique.

⁹ Ya me achucbe sch'uhtic te Aarón soc snich'nab, soc ya me axojticlambe ta sjolic te spixjol pac'; hich ay ya'telic ta sacerdotehil te ma xlaj sc'oblal. Hich me yac awa'be yich' ya'telic te Aarón soc te snich'nabe.

¹⁰ Patil ya me awic' tal te jcolel toro ta Nahilpac' Templo yu'un tahojibal, te Aarón soc te snich'nab ya me yac' sc'abic ta sjol te jcolel toro.

¹¹ Ya me amil te jcolel toro ta stojol Jehová, ta yochibal te Nahilpac' Templo yu'un tahojibal.

¹² Ya me awich'be te sch'ich'el te toro, ya me ajaxbe ta yal ac'ab te xulubiletic yu'un te scajtajib ta chiq'uel mahtanil. Soc te ch'ich' te hilem ya me amal spisil ta yoc te scajtajib ta chiq'uel mahtanil.

¹³ Soc ya me atsac spisil te sjuhp'el sbiquil, te sjuhp'el te sehcub, te cheb sriñon soc sjuhp'el, ya me achic' ta scajtajib ta chiq'uel mahtanil.

¹⁴ Yan te sbaq'uetal te toro, te snuhculel soc stsa' ya me achic' ta c'ahc' ta sti'il te campamento. Ha me mahtanil yu'un mulil.

¹⁵ Ha nix hich ya me atsac jcohtuc te tat tuminchij, te Aarón soc te snich'nab ya scajan sc'abic ta sjol te tat tuminchije.

¹⁶ Ya me amil te tat tuminchij soc ya me atsihtsimbe sch'ich'el ta sjoyobal te scajtajib ta chiq'uel mahtanil.

¹⁷ Ya me asesen te tat tuminchij, ya me apocbe te sbiquil soc yoc, soc ya me awa'be sjoquin te sesembil sbaq'uetal soc te sjole.

¹⁸ Ya me achic' scohtol te tat tuminchij ta scajtajib ta chiq'uel mahtanil; ha scohtol chic'bil mahtanil ta stojol Jehová te sumet yic', ha chic'bil mahtanil ta stojol Jehová.

¹⁹ Patil ya me atsac te yan tat tuminchij, te Aarón soc te snich'nab ya scajan sc'abic ta sjol te tat tuminchije.

²⁰ Ya me amil te tat tuminchij, ya me awa'be sch'ich'el ta sc'unil swa'el schiquinic te Aarón soc snich'nab, ta swa'el sme' sc'abic, soc ta swa'el sme' yoquic, soc ya me atsihtsimbe sch'ich'el ta sjoyobal te scajtajib ta chiq'uel mahtanil.

²¹ Te ch'ich' ay ta sba te scajtajib ta chiq'uel mahtanil, soc te aceite yu'un ch'ultesel, ya me atsihtsin a te Aarón soc sc'u' spac', soc te snich'nab soc sc'u' spaq'uic. Hich ch'ultesbil ya xc'oht soc te snich'nab soc te sc'u' spaq'uique.

²² Ya me awich'be sjuhp'el te tat tuminchij, soc sjuhp'el sne, te sjuhp'el ta sba sbiquil, sjuhp'el sehcub, schebal sriñon soc sjuhp'el, soc te swa'el cub, como ha tat tuminchij scuenta ch'ultesojibal.

²³ Ya me awich' jun muc'ul pan, jun pimil pan wots'bil soc aceite, soc jun jayal pan te ay ta tut moch yu'un te panetic ma ba yich'oj levadura te ac'bil ta stojol Jehová.

²⁴ Ya me awa'be spisil ta sc'ab Aarón soc ta sc'ab te snich'nab, ya me atuchilan scuenta tuchilambil mahtanil ta stojol Jehová.

²⁵ Patil ya me awich'be te bin ay ta sc'abic, pajal ya me achic' ta scajtajib ta chiq'uel mahtanil soc te scohtol chic'bil mahtanil, scuenta sumet yic' ta stojol Jehová. Ha mahtanil a'bot te Jehová ta scuenta c'ahc'.

²⁶ Ya me atsac te stahn te tat tuminchij scuenta sch'ultesel te Aarón, ya me atuchilan scuenta tuchilambil mahtanil yu'un Jehová; ha awu'un ya xc'oht.

²⁷ Parte xawac' te stahn te tat tuminchij te la yich' tuchilanel soc te scub te la yich' aq'uel scuenta sch'ultesel te Aarón soc te snich'nabe.

²⁸ Yu'un Aarón soc snich'nab ya xc'oht, ha mandaril te ya x'a'bot te snich'nab Israel te stalel ay, como ha mahtanil te la yich' tuchilanel. Ha mahtanil te ac'bil yu'un te snich'nab Israel scuenta lamal q'uinal ta stojol Jehová.

²⁹ Te ch'ul c'u'uletic yu'un Aarón ha ya xhil yu'un te sts'umbal, scuenta yu'un c'alal slapojic a ya yich'ic malel ta aceite scuenta yich'el ya'telic.

³⁰ Te snich'an te ya sjelolin ta sacerdotehil huqueb c'ahc'al ya slap te c'u'ul te c'alal ya xtal ta Nahilpac' Templo yu'un tahojibal yu'un ya x'a'tej ta ch'ul awilal.

³¹ Ya me atsac te tat tuminchij yu'un ch'ultesel, ya me apay te sbaq'uetal ta ch'ultesbil lugar.

³² Te Aarón soc snich'nab ya me swe'ic ta yochibal te Nahilpac' Templo yu'un tahojibal te tat tuminchij soc te pan te ay ta tut moch.

³³ Ya swe'ic te bintic tuhun yu'un stojel mulil c'alal la yich' ya'telic soc la yich'ic ch'ultesel. Pero ma me ayuc yan mach'a ya swe', como ch'ultesbil.

³⁴ Teme ay to hil yu'un pajel te ti'bal yu'un yich'el ya'telic, o te pan, ya me achic'; ma ba ya yich' we'el, como ch'ultesbil.

³⁵ Ya me apasbe te Aarón soc te snich'nab hich te bin ut'il spisil te bin la jcalbate. Huqueb c'ahc'al ya xc'ax awu'unic ta ya'beyel yich' ya'telic.

³⁶ Jujun c'ahc'al ya me awac' jcoht jcolel toro scuenta milbil mahtanil yu'un stojel mulil. Ya me alecubtes te scajtajib ta chiq'uel mahtanil ta scuenta yaq'uel mahtanil yu'un stojel mulil, soc ya me amalbe aceite scuenta ch'ultesel.

³⁷ Huqueb c'ahc'al ya me apasbe mahtanil yu'un stojel mulil yu'un te scajtajib ta chiq'uel mahtanil soc ya me ach'ultes, mero ch'ultesbil ya xc'oht; biluc a te ya sta te scajtajib ta chiq'uel mahtanil ch'ultesbil ya xc'oht.

Mahtanil scuenta jujun c'ahc'al

³⁸ Hich ay te bin yac awac' jujun c'ahc'al ta scajtajib ta chiq'uel mahtanil: cha'cha'coht tuminchij te ay jujun ya'bilal.

³⁹ Jcoht tuminchij yac awac' ta sab soc jcoht ta xtibiltay.

⁴⁰ Ya me awa'be sjoquin te jujucoht tuminchij cheb litro lequil harina capal soc jun litro aceite yu'un p'ebil olivahetic; soc jun litro vino scuenta malbil mahtanil.

⁴¹ Ta xtibiltay ya me awac' te yan tuminchij soc te mahtanil harina soc malbil mahtanil yu'un, hich te bin ut'il ta sab, scuenta sumet yic' mahtanil a'bot Jehová ta scuenta c'ahc'.

⁴² Ha te scohtol chic'bil mahtanil te ya me yaq'uic spisil ora ta cajalcaj bahel ats'umbalic ta yochibal te Nahilpac' Templo yu'un tahojibal, ta stojol Jehová, ta banti ya jta jbahtic yu'un ya jc'oponex.

⁴³ Tey ya jtsob jba soc a te snich'nab Israel; ch'ultesbil ya xc'oht te lugar ta scuenta te cutsilal.

⁴⁴ Ya jch'ultes te Nahilpac' Templo yu'un tahojibal soc te scajtajib ta chiq'uel mahtanil; soc ya jch'ultes Aarón soc te snich'nab scuenta yu'un ha sacerdotehetic ya xc'ohtic cu'un.

⁴⁵ Ya xnahinon ta yohlil te snich'nab Israel, soc ho'on Dioson yu'unic ya xc'ohon.

⁴⁶ Hich ya me sna'ic a te ho'on Jehovahon te Dioson yu'unic, te la jloq'ueslan tal ta sq'uinal Egipto yu'un ya xnahinon ta yohlilic. Ho'on Jehovahon te Dioson yu'unique.