Éxodo 25 - Bible in Tzeltal Bachajón

Mahtanil scuenta spasel te Nahilpac' Templo

¹ Te Jehová la yalbe te Moisés:

² Halbeya te snich'nab Israel te ac'a yich'bonic tal jmahtan. Spisil te mach'atic ta sc'anojel yo'tan ya yac', ya me awich'be te jmahtane.

³ Hich ay te mahtaniletic yac atsob: oro, plata, cobre,

⁴ yax, chi'in-yax soc tsajal estambre, soc t'ujbil lino, stsotsel tentsun,

⁵ snuhculel stat tuminchij bombil ta tsaj, nuhculetic, acacia-te',

⁶ aceite yu'un c'ahc', ha'maletic te sumet yic' te ya xtuhun yu'un te aceite yu'un ch'ultesel soc yu'un pom te sumet yic',

⁷ ónice tonetic, soc yan t'ujbil tonetic te ya xtuhun ta efod soc ta bolsa pac' ya xc'oht ta stahn.

⁸ Ac'a spasbonic ch'ul awilal, hich ya x'ayinon ta yohlilic.

⁹ Spisil te bin ya ca'bat awil, hich me xapas te Nahilpac' Templo soc spisil te bintic ya xtuhun tey a.

Scaxahul te chapbil-c'op

¹⁰ Ya me spasic scaxahul te chapbil-c'op ta acacia-te', j'ohlil yoxeb xuhc'ubil snahtil, j'ohlil scheb xuhc'ubil sjamalil, soc j'ohlil scheb xuhc'ubil stoyolil.

¹¹ Ya me apots ta puro oro ta yutil soc ta spat, soc ya me apasbe sch'ahlel ta pimil oro ta sjoyobal sti'il.

¹² Pasbeya chaneb sch'ocowil ta uhltesbil oro te yac awac' ta schanebal xuhc, chebcheb sch'ocowil ta jujujehch.

¹³ Pasbeya sq'uechojibal ta acacia-te', ya me apots ta oro.

¹⁴ Xija sohlel te sq'uechojibal ta sch'ocowil te ayic ta jujujehch te scaxahul te chapbil-c'op, yu'un ya yich' q'uechel bahel a.

¹⁵ Tey ya xhilic a te sq'uechojibal ta sch'ocowil te scaxahul te chapbil-c'op; ma ba ya yich'ic loq'uesel.

¹⁶ Ya me awotses ta scaxahul te chapbil-c'op te Testigo-c'op te ya ca'bate.

¹⁷ Ya me apas yawil stahel perdón ta puro oro, j'ohlil yoxeb xuhc'ubil snahtil soc j'ohlil scheb xuhc'ubil sjamalil.

¹⁸ Soc pasa cheb querubinetic ta oro ta jehch ta jehch te yawil stahel perdón, tembilic ta martillo.

¹⁹ Pasa jun querubín ta jujujehch; junax ta pasel soc te yawil stahel perdón ta jehch ta jehch.

²⁰ Ya me stoy mohel te xiq'uic te querubinetic ta yaxintesel te yawil stahel perdón; ya snuhp'usitay sbahic ta yilel te yawil stahel perdón.

²¹ Ya me awac' te yawil stahel perdón ta sba te scaxahul te chapbil-c'op soc ya me awotses ta yutil te Testigo-c'op te ya ca'bate.

²² Tey ya jta jbahtic a ta sba te yawil stahel perdón, ta yohlil te cheb querubinetic te ay ta sba te scaxahul Testigo-c'op, tey ya calbat a spisil te jmandar yu'un te snich'nab Israel.

Mesa yu'un pan ac'bil ta stojol Dios

²³ Soc ya me apas mesa ta acacia-te', cheb xuhc'ubil snahtil, xuhc'ubil sjamalil, soc j'ohlil scheb xuhc'ubil stoyolil.

²⁴ Ya me apots ta puro oro soc ya me apasbe sch'ahlel ta oro ta sjoyobal sti'il.

²⁵ Ya me atsehlambe ta sjoyobal sti'il jayal tabla te jtahn c'abal sjamalil, soc pasbeya sch'ahlel ta oro ta sjoyobal.

²⁶ Pasbeya chaneb sch'ocowil ta oro, a'beya ta jujun xuhc ta banti ay te chaneb yoque.

²⁷ Tey ta ye'tal te jayal tabla ya xc'oht te ch'ocowiletic te banti ya x'och te sq'uechojibal te ya yich' q'uechel bahel a.

²⁸ Pasa te sq'uechojibal ta acacia-te' soc ya me apots ta oro; ha ya yich' q'uechel bahel a te mesa.

²⁹ Soc pasbeya platohetic, cucharahetic, oxometic, soc muc'ul tazahetic te ya xtuhun yu'un malbil mahtaniletic; ya me apasticlan ta puro oro.

³⁰ Ya me awac' ta mesa spisil ora te pan ac'bil ta jtojole.

Scajtajib c'ahc' pasbil ta oro

³¹ Soc ya me apas scajtajib c'ahc' ta puro oro, tembil ta martillo; junax ta pasel te yoc, ste'el, svasohil, swolnich, soc snich.

³² Ya me xloc' waqueb sc'ab ta ste'el, ox-oxeb ta jujujehch.

³³ Ta jch'ix sc'ab ay oxeb yawil te hich yilel te bin ut'il snich almendro soc swolnich soc snich; ta yan sc'ab ay oxeb yawil te hich yilel te bin ut'il snich almendro soc swolnich soc snich; hich ta hich ta jujuch'ix sc'ab te ya xloc' ta ste'el.

³⁴ Ta ste'el te scajtajib c'ahc' ay chaneb yawil te hich yilel te bin ut'il snich almendro soc swolnich soc snich.

³⁵ Ay jun swolnich ta ye'tal ta banti ya xloc' te cheb sc'ab, hich ta hich ta jujuchej te swaquebal te sc'abc'abe.

³⁶ Te swolnich soc te sc'abc'ab junax pasbil ta puro oro tembil ta martillo.

³⁷ Soc pasbeya huqueb yawil c'ahq'uetic te yac atsunticlan yu'un ya sacubtes bahel q'uinal a.

³⁸ Te stenazahil yu'un sloq'uesbeyel sc'ahq'uemal smechahil soc te platohetic yu'un ya me yich' pasel ta puro oro.

³⁹ Ta jun talento puro oro yac apas te scajtajib c'ahc' soc spisil te bintic ya xtuhun yu'une.

⁴⁰ Hich me xapas te bin ut'il la jca'bat awil ta wits.