Éxodo 20 - Bible in Tzeltal Bachajón

Te lajuneb mandariletic

¹ Dios la yal spisil te c'opetic ini:

² Ho'on Jehovahon, te Dioson awu'un, te la jloq'uesat tal ta sq'uinal Egipto ta banti nahinat ta mosohil.

³ Ma me ayuc yantic diosetic awu'un ta jtojol.

⁴ Ma me xapasbe sloc'ombahil o biluc a te pajal yilel soc te bintic ay ta ch'ulchan, ta bahlumilal o ta ha'etic ta ye'tal bahlumilal.

⁵ Ma me xaquejan aba ta stojolic soc ma me xawich' ta muc', como ho'on Jehovahon te Dioson awu'un, xut'et co'tan, ya ca'be castigo yu'un smul sme'static te yal-snich'nabic ta yoxcajal soc ta schancajal te mach'atic ya yil-o'tantayonic,

⁶ pero ya jc'uxultay bayel ta mil te mach'atic c'uxon ta yo'tanic soc te ya sch'uhunic spasel te mandariletic cu'une.

⁷ Ma me xatojoltabe ta halel sbihil te Jehová te Dios awu'un, como te Jehová ma ba ya yal te mayuc smul te mach'a ya stojoltabe ta halel te sbihile.

⁸ Na'a me te sc'ahc'alel cux-o'tan yu'un yac ach'ultes.

⁹ Waqueb c'ahc'al ya x'a'tejat soc yac apas spisil awa'tel,

¹⁰ yan te shuquebal c'ahc'al ha me cux-o'tan yu'un Jehová te Dios awu'une; ma me x'a'tejat a, ha'at, aquerem, awantsil-nich'an, awa'bat, acriada, achanabahlam, o te jyanlum te ay ta awohlil.

¹¹ Como ta waqueb c'ahc'al te Jehová la spas te ch'ulchan soc bahlumilal, te mar soc spisil te bintic ay tey a, soc la scux yo'tan ta shuquebal c'ahc'al; ha yu'un te Jehová la ya'be bendición te sc'ahc'alel cux-o'tan soc la sch'ultes.

¹² Ich'a ta muc' atat soc anan, scuenta yu'un naht ya xc'oht aworahil ta q'uinal te ya ya'bat te Jehová te Dios awu'une.

¹³ Ma me xawa'iy milaw.

¹⁴ Ma me xawa'iy antsiwej; ma me xawac' aba ta antsinel.

¹⁵ Ma me xawa'iy elec'.

¹⁶ Ma me xawal te bin ma meleluc ta stojol apat-axuhc.

¹⁷ Ma me xbic'taj awo'tan yu'un te sna apat-axuhc: ma me xbic'taj awo'tan yu'un yihnam, ya'bat, scriada, j'a'tel-wacax, burro, o biluc ay yu'un te apat-axuhc, xchi.

Te xiwel yu'un te pueblo

¹⁸ Spisil te pueblo yac ya'iybelic st'ohmel te chahwuc soc te tsantsehwaletic, te yoq'uel te xulubil soc te wits yac ta loq'uel sch'ahilel. C'alal hich la yilic nihquic yu'un soc namal la yac' sbahic.

¹⁹ Ha yu'un hich la yalbeyic te Moisés: Ha'at yac ac'oponotcotic, ya me ca'iycotic; pero ma me ha'uc ya sc'oponotcotic te Diose, scuenta yu'un ma ba ya xlajotcotic a, xchihic.

²⁰ Te Moisés hich la yalbe te pueblo: Ma xiwex. Ha tal ya'iybeyex awo'tanic te Diose, scuenta yu'un ma sch'ay te xiwel yu'un ta atojolic soc te ma ba yac ale amulic a, xchi.

²¹ Te pueblo namal la yac' sbahic, c'alal te Moisés nohpoj bahel ta yihc'al q'uinal banti ay te Diose.

²² Te Jehová la yalbe te Moisés: Hich me xawalbe te snich'nab Israel: La awiliquix te la jc'oponex tal c'alal ta ch'ulchan.

²³ Ma me xapasic diosetic ta jtojol te pasticlambil ta oro o ta plata.

²⁴ Ya me apasbon ta puro lum te scajtajib ta chiq'uel mahtanil, tey yac awac' a te scohtol chic'bil mahtaniletic, te mahtaniletic scuenta lamal q'uinal, te tuminchijetic soc wacaxetic awu'unique. Ta spisil lugar banti ya cac' te sna'ojibal te jbihile, tey ya xtalon ta atojol soc tey ya ca'bat bendición a.

²⁵ Teme yac apasbon scajtajib ta chiq'uel mahtanil ta ton, ma me xapas ta walubil tonetic, yu'un teme yac awahluy soc a'tejibal, yac abohlobtesbe sc'oblal.

²⁶ Soc ma me xmohat ta cajalcaj ta scajtajib ta chiq'uel mahtanil cu'un, scuenta yu'un ma ba ya xchicnaj tey a te banti ma ba macal te abaq'uetale.