Éxodo 18 - Bible in Tzeltal Bachajón

Jetro tal yula'tay Moisés

¹ Te Jetro, te sacerdote yu'un Madián soc ha snihal-mamal Moisés, la ya'iy spisil te bintic pasbot yu'un Dios te Moisés soc Israel te pueblo yu'un, soc te bin ut'il Jehová la sloq'ues tal Israel ta Egipto.

² Te Jetro te snihal-mamal Moisés, la yic' ochel ta sna te Séfora te yihnam Moisés te c'alal ticonot bahel yu'un Moisés

³ soc te cheb yalatac: Gersón sbihil te jtuhle, yu'un la yal te Moisés: Jbehyemon ta yan q'uinal, xchi;

⁴ Eliezer sbihil te yane, yu'un la yal: Te Dios yu'un te jtat la scoltayon soc la yac'on ta libre ta espada yu'un faraón, xchi.

⁵ Te Jetro te snihal-mamal Moisés, soc te snich'nab soc te yihnam Moisés, talic ta banti ay Moisés ta jochol taquin q'uinal te banti spasoj scampamento ta nopol wits yu'un Dios.

⁶ La sticon bahel c'op ta stojol Moisés: Ho'on te Jetro te anihalmamal, tal quilat soc te awihnam soc te cheb yalatac, xchi.

⁷ Te Moisés baht sta tal te snihal-mamal, la snijan sba ta stojol soc la yuhts'uy. La sjoc'obe sbahic bin yilelic, soc ochic bahel ta nahilpac'.

⁸ Te Moisés la yalbe ya'iy te snihal-mamal spisil te bintic la spas Jehová ta stojol faraón soc te egipciohetic scuenta sc'uxultayel te Israel, soc spisil te swocolic te c'oht ta pasel ta be soc bin ut'il coltayotic yu'un Jehová.

⁹ Te Jetro mero tse'el yo'tan yu'un te bin lec la spas Jehová ta stojol Israel, te la scoltay loq'uel ta sc'ab te egipciohetique.

¹⁰ Hich la yal te Jetro: Bayel me yutsil sc'oblal te Jehová te la scoltayex loq'uel tal ta sc'ab te egipciohetic soc ta sc'ab faraón, te la yac' ta libre te pueblo ta sc'ab te egipciohetique.

¹¹ Yo'tic la jna'ix te c'ax hich muc' a te Jehová te bin ut'il spisil te diosetic, te hich la spasbe te mach'atic la yuts'inic te Israel ta scuenta stoybahilic, xchi.

¹² Te Jetro te snihal-mamal Moisés la ya'be scohtol chic'bil mahtaniletic soc milbil mahtaniletic te Diose. Te Aarón soc spisil te mamaletic yu'un Israel tal sjoquinic ta we'el te snihal-mamal Moisés ta stojol te Diose.

Moisés la sle juecetic

¹³ Ta yan c'ahc'al te Moisés la shuhcan sba ta schahpanel te ants-winiquetic. Teq'uelic ta stojol Moisés ta sab c'alal ta tibiltic.

¹⁴ C'alal la yil te snihal-mamal Moisés spisil te bin yac ta spasbeyel te pueblo, hich la yal: ¿Bin a te yacat ta spasel soc te pueblo? ¿Bin yu'un te atuquel huculat ta schahpanel, soc spisil te pueblo tec'ajtic ta atojol ta sab c'alal ta tibiltic? xchi.

¹⁵ Te Moisés hich la sjac'be te snihal-mamal: Como ya xtalic ta jtojol yu'un ay bin ya sjoc'obeyic te Diose.

¹⁶ Te c'alal ay c'opetic yu'unic, ya xtalic ta jtojol; ya jchahpan ta schebalic soc ya calbe ya'iyic te bin ya yal te mandariletic yu'un te Diose, xchi.

¹⁷ Ha yu'un te snihal-mamal Moisés hich la yal: Ma lecuc te bin yac apas.

¹⁸ Ya xluhbat yu'un soc te pueblo te sjoquinejat; como te a'tel c'ax al yac awa'iy, ma xhu' awu'un spasel ta atuquel.

¹⁹ A'iya awa'iy yo'tic te bin ya calbat, ay bin ya ca'bat ana', soc ya me sjoquinat te Diose. Ha'at yac atehc'an aba ta c'op ta stojol Dios ta scuenta te pueblo, soc ha'at yac awalbe Dios te c'opetic yu'unique.

²⁰ A'beya snopic te mandariletic, soc a'beya sna'ic banti behil ya sc'an ya xbehenic soc te bin ya sc'an ya spasic.

²¹ Soc tsaha winiquetic ta yohlil te pueblo te toj yo'tanic, te xi'ojic te Diose, ha winiquetic te smelelil ya xc'opojic, te ya yihlayic te bin ma stojiluc ta tahel; a'beya ta stojol te pueblo scuenta jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50) soc yu'un lajuntuhl (10).

²² Ha'ic ac'a schahpanic te pueblo ta spisil ora te banti ma ba tulan sc'oblal. Yan te banti tulan te c'ope, ya yich'ic tal ta atojol. Hich ya xpehc'aj yalal a te ihcatsil ay ta acuenta, ha'ic ya scoltayat ta spasel te a'tele.

²³ Teme hich yac apas, soc teme hich ya spasat ta mandar te Diose, yac acoltay aba a, soc spisil te pueblo ini lamal q'uinal ya ya'iyic te ya suhtic bahel ta snahic, xchi.

²⁴ Te Moisés la yich'be ta cuenta te sc'op te snihal-mamal, la spas spisil te bin halbot yu'une.

²⁵ La stsa ta yohlil spisil Israel winiquetic te toj yo'tanique. La ya'be ta stojol te pueblo scuenta jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50), soc yu'un lajuntuhl (10).

²⁶ Ha'ic la ya'iyic chahpanwanej ta spisil ora te banti ma ba tulan sc'oblal. Yan te banti chuhcul te c'op, la yich'ic tal ta stojol Moisés.

²⁷ Patil te Moisés la spatbe bahel yo'tan te snihal-mamal, hich baht ta slumal.