Éxodo 17 - Bible in Tzeltal Bachajón

Loc' ha' ta ton

¹ Spisil te pueblo yu'un te snich'nab Israel loq'uic bahel ta jochol taquin q'uinal Sin, c'unc'un behenic bahel hich te bin ut'il te smandar Jehová, c'oht spas scampamentohic ta Refidim, pero mayuc ha' ya yuch'ic tey a.

² Te pueblo hahch stijic ta c'op te Moisés, hich la yalic: ¡A'botcotic ha' yu'un ya cuch'cotic! la yutic. ¿Bin yu'un yac atijonic ta c'op? ¿Bin yu'un yac awilbeyic yo'tan te Jehová? xchi te Moisés.

³ Te snich'nab Israel ay taquinti'il la ya'iyic tey a, hich hahch stijic ta c'op te Moisés, hich la yalbeyic: ¿Bin yu'un la aloq'uesotcotic tal ta Egipto yu'un yac amilotcotic ta taquinti'il soc cal-jnich'ancotic soc te jchambahlamcotic? la yutic.

⁴ Ha yu'un te Moisés la yawtay te Jehová, hich la yal: ¿Bin ya jpas soc te pueblo ini? Jteb xanix ya sc'an ma ba ya sch'ojonic ta ton, xchi.

⁵ Te Jehová la yalbe te Moisés: C'axan bahel ta stojol te pueblo soc ic'a bahel sjoquinat cha'oxtuhl te mamaletic yu'un Israel, soc ich'a bahel te anahbate' te la amaj a te muc'ul-ha'.

⁶ Tey ya jtehc'an jba ta atojol ta muc'ul ton ta wits Horeb. Ya me amaj te ton, ya xloc' tal ha' tey a te ya yuch' te pueblo, xchi. Hich la spas te Moisés ta stojol te mamaletic yu'un Israel.

⁷ La ya'be sbihilin Masah soc Meriba te lugar, yu'un tey la yut sbahic a te snich'nab Israel soc la yilbeyic yo'tan te Jehová c'alal la yalic: ¿Ay bal ta cohliltic te Jehová, o ma'uc? te xchihique.

La ya'beyic guerra Amalec

⁸ Te Amalec tal ya'be guerra te Israel ta Refidim.

⁹ Te Moisés la yalbe te Josué: Tsaha winiquetic, bahan a'beya guerra te Amalec. Pajel ho'on ya jtehc'an jba ta ba tsehl soc ya jtsacbe te snahbate' te Diose, xchi.

¹⁰ Te Josué hich la spas te bin ut'il halbot yu'un te Moisés, la ya'be guerra te Amalec. Te Moisés, Aarón soc Hur mohic bahel ta ba tsehl.

¹¹ C'alal ya stoy sc'ab te Moisés, ya xhu' yu'un guerra te Israel; pero te c'alal ya scohtes sc'ab, ya xhu' yu'un te Amalec.

¹² Ya xluhb sc'ab te Moisés, ha yu'un la yich'ic tal ton, la ya'beyic shuhcan sba tey a; te Aarón soc te Hur la stsacbeyic sc'ab, tuhlultuhl ta jujujehch. Hich la yich' yip sc'ab a ha to c'alal mahl c'ahc'al.

¹³ Hich te Josué la stsal ta espada te Amalec soc te pueblo yu'une.

¹⁴ Te Jehová la yalbe te Moisés: Ts'ihbaya ta hun scuenta sna'ojibal, soc halbeya te Josué te ho'on ya jtup'be spisil sna'ojibal te Amalec ta ye'tal ch'ulchan, xchi.

¹⁵ Te Moisés la spasbe scajtajib smahtan Dios, la ya'be sbihilin: Jehová-nisi,

¹⁶ yu'un hich la yal: Te bin ut'il la shach sc'ab ta scontrahinel te smuc'ul huctajib Jehová, te Jehová ya ya'be guerra te Amalec ta cajalcaj sts'umbal bahel, xchi.