Éxodo 14 - Bible in Tzeltal Bachajón

C'axic ta Mar Rojo

¹ Te Jehová la sc'opon te Moisés, hich la yalbe:

² Halbeya te snich'nab Israel te ac'a yaq'uic buelta soc ac'a spas scampamentohic ta stojol Pi-hahirot, ta ohlil yu'un Migdol soc te mar, ta stojol Baal-Zefón. Ya me apas acampamentohic ta ti'mar, te snuhp'usitayej sba soc Baal-Zefón.

³ Como te faraón hich me ya yalbe sc'oblal te snich'nab Israel: Ma xtojobic ta behel ta q'uinal, macbilic yu'un te jochol taquin q'uinal, xchi.

⁴ Ya jtulanubtesbe yo'tan te faraón yu'un ya snutsex. Ya xtohy jc'oblal ta scuenta faraón soc spisil te soldadohetic yu'un, soc ya me sna'ic te egipciohetic te ho'on Jehovahon, xchi. Hich la spasic.

⁵ Te c'alal halbot te ajwalil yu'un Egipto te loq'uiquix ta ahnel te pueblo israel, yanij yo'tan te faraón soc te a'batetic yu'un ta stojolic, hich la yalic: ¿Bin yu'un hich la jpastic te la jcac'tic loq'uel te Israel, te hich ma ba ya yac' sbahic ta a'batinel cu'untic? xchihic.

⁶ Ha yu'un te faraón la yac' ta chahpanel scarreta soc la yic' bahel te soldadohetic yu'une.

⁷ La yic' bahel lajunwinic scha'bahc' (600) tsahbil carretahetic, soc spisil te carretahetic yu'un Egipto soc te capitanetic yu'unique.

⁸ Te Jehová la stulanubtesbe yo'tan te faraón, ajwalil yu'un Egipto, hich la snuts bahel te snich'nab Israel. Pero te snich'nab Israel mayuc xiwel ta yo'tanic a yaquic ta loq'uel bahel.

⁹ Te egipciohetic la snutsic bahel ta cawuhetic soc carretahetic yu'un faraón, te mach'atic cajajtic ta cawu, soc spisil te soldadohetic yu'une. C'oht stahic ta scampamentohic ta ti'mar, nopol ta Pi-hahirot, ta stojol Baal-Zefón.

¹⁰ C'alal nopol ay te faraón, la shach sitic te snich'nab Israel, la yilic te yac ta talel ta spatic te egipciohetique. Ha yu'un bayel xiw yo'tanic yu'un soc tulan la yawtayic te Jehová.

¹¹ La yalbeyic te Moisés: ¿Yu'un bal mayuc muquenaletic ta Egipto te la aloq'uesotcotic tal yu'un ya xlajotcotic ta jochol taquin q'uinal? ¿Bin yu'un hich la apasbotcotic te la aloq'uesotcotic tal ta Egipto?

¹² ¿Ma bal hichuc la jcalbatcotic ta Egipto: Ac'a cac' jbahcotic ta a'batinel yu'un te egipciohetic, ma bal xchihucotic? Yu'un ha lec xan a te ayotcotic ta mosohil yu'un te egipciohetic te ya xlajotcotic ta jochol taquin q'uinal, la yutic.

¹³ Te Moisés hich la yalbe te pueblo: Ma xiwex, ayuc me yip awo'tanic, ya me awilic te colel te ya ya'botic yo'tic te Jehová; como te egipciohetic te yac awilique mayuc bin ora yac awilic xan.

¹⁴ Te Jehová ya me yac' guerra ta acuentahic, yan te ha'exe lamal me awo'tanic, xchi.

¹⁵ Ha yu'un te Jehová la yalbe te Moisés: ¿Bin yu'un yac awawtaybelon? Halbeya te snich'nab Israel te ac'a behenicuc.

¹⁶ Te ha'ate toya mohel anahbate', toya ac'ab ta stojol te mar, ac'a sjam sba te ha'e, hich taquin slumil a ya sohlic bahel te snich'nab Israel ta yohlil mar.

¹⁷ Ya jtulanubtesbe yo'tanic te egipciohetic yu'un ya snutsex; hich ya jtohytes jc'oblal ta scuenta faraón soc spisil te soldadohetic, te carretahetic soc cawuhetic yu'un.

¹⁸ Te egipciohetic ya me sna'ic te ho'on Jehovahon te c'alal ya jtohytes jc'oblal ta scuenta faraón soc te carretahetic soc te mach'atic cajajtic ta cawu, xchi.

¹⁹ Te ch'ul a'bat yu'un Dios te nahilij bahel ta stojol te campamento yu'un Israel, loc' bahel, baht ta spatic; ha nix hich te bahlal tocal te nahilij bahel ta stojolic, loc' bahel, baht yac' sba ta spatic,

²⁰ ha baht ta ohlil yu'un te campamento yu'un Egipto soc te campamento yu'un Israel. Ha tocal soc yihc'al q'uinal c'oht ta stojol te egipciohetic, soc la sacubtes q'uinal ta ahc'abal ta stojol Israel, hich ma ba la sta sbahic schebalic ta sjunal ahc'abal.

²¹ Te Moisés la stoy sc'ab ta stojol te mar, te Jehová la yac' tal tulan ic' sjunal ahc'abal ta stojol banti ya xloc' tal c'ahc'al; hich la sjam sba te ha' soc taquij te slumile.

²² Ha yu'un te snich'nab Israel taquin slumil a c'axic bahel ta yohlil mar. Hich c'oht te ha' te bin ut'il ts'ahc ta wa'el soc ta q'uexam.

²³ Te egipciohetic la snutsic ochel c'alal ta yohlil mar, spisil te cawuhetic soc te mach'atic cajajtic a, soc te carretahetic yu'un faraón.

²⁴ Te c'alal ma to sacub q'uinal a, te Jehová la yil c'alal ta bahlal c'ahc' soc tocal te soldadohetic yu'un te egipciohetic, la yac' howiyuc sjolic,

²⁵ soc la sloq'uesbe yoc te carretahetic yu'unic, hich wocol behenic bahel. Ha yu'un hich la yalic te egipciohetic: Ahnucotic suhtel ta stojol te Israel, como te Jehová ya ya'be querra te egipciohetic ta scuentahic, xchihic.

²⁶ Te Jehová hich la yalbe te Moisés: Toya ac'ab ta stojol te mar scuenta yu'un ya sut te ha' ta sba te egipciohetic, te carretahetic, soc te cawuhetic yu'unique, xchi.

²⁷ Ha yu'un te Moisés la stoy sc'ab ta stojol te mar. C'alal sacub tal q'uinal suht te ha' hich te bin ut'il ay ta nahil to. Te egipciohetic yaquic ta ahnel a tahotic yu'un te mar; hich te Jehová la slajin te egipciohetic ta yohlil te mar.

²⁸ Suht te ha', la smul hilel te carretahetic, cawuhetic soc spisil te soldadohetic yu'un faraón te ochic bahel ta mar ta spatic; mayuc jtuhluc hil.

²⁹ Yan stuquel te snich'nab Israel, taquin slumil a sohlic bahel ta yohlil mar. Hich c'oht te ha' te bin ut'il ts'ahc ta swa'elic soc ta sq'uexamic.

³⁰ Ta hich ora te Jehová la scoltay loq'uel te Israel ta sc'ab te egipciohetique. Te Israel la yil te chamen egipciohetic ta sti'il te mar.

³¹ C'alal la yil te Israel te bin muc' la spas te Jehová ta scontrahinel te egipciohetic, la xi'ic te Jehová, la sch'uhunic te Jehová soc te Moisés, te ya'bate.