Éxodo 13 - Bible in Tzeltal Bachajón

Aq'uel ta stojol Dios ba-alaletic

¹ Te Jehová la sc'opon te Moisés, hich la yalbe:

² A'bonic ta jtojol spisil te ba-alal queremetic. Ta yohlil te snich'nab Israel, spisil te ba-alal queremetic ho'on cu'un, ha nix hich te sba-quelmal chambahlametic, xchi.

³ Te Moisés hich la yalbe te pueblo: Na'ahic me te c'ahc'al ini, ha te bin ora loq'uex tal ta Egipto te banti ayex ta mosohil, como te Jehová la sloq'uesex tal ta scuenta smuc'ul yu'el sc'ab; ha yu'un ma me xawe'ic te bin yich'oj levadura.

⁴ Ya xloq'uex bahel yo'tic te u Abib.

⁵ Te c'alal Jehová ya yiq'uex ochel ta sq'uinal te cananeo, heteo, amorreo, heveo soc te jebuseohetic, ha te q'uinal te jc'axel yalbeyej ta jamal te antiguo ame'atatic te ya ya'beyex, ha te q'uinal te banti ya x'oquin leche soc chab, ya me apasic te q'uin ta u ini.

⁶ Huqueb c'ahc'al yac awe'ic pan te ma ba yich'oj levadura; ta shuquebal c'ahc'al ha me q'uin ta stojol Jehová.

⁷ Huqueb c'ahc'al yac awe'ic pan ma ba yich'oj levadura, soc ma me xchicnaj ta awohlilic te bin yich'oj levadura, soc ma me ayuc levadura ta spahmal te aq'uinale.

⁸ Ta yorahil te q'uin hich me yac awalbeyic te awal-anich'anic: Hich ya yich' pasel ta scaj te bin la spasbon te Jehová te c'alal la sloq'ueson tal ta Egipto, xchihan me.

⁹ Te q'uin hich ac'a c'ohtuc awu'un te bin ut'il jun seña ta ac'ab soc sna'ojibal ta ati'ba, scuenta yu'un yac awalulan te ley yu'un Jehová; como ta scuenta yu'el sc'ab la sloq'uesat tal ta Egipto te Jehová.

¹⁰ Ha yu'un ya me apasulan bahel ta jujun ha'bil ta mero sc'ahc'alel.

¹¹ C'alal ya yic'at ochel te Jehová ta sq'uinal te cananeohetic, hich te bin ut'il jc'axel yalbeyejat ta jamal soc te antiguo ame'atatic, te c'alal la ya'batix ta ac'ab te sq'uinale,

¹² ya me awa'be te Jehová spisil te ba-alal queremetic; soc ha nix hich spisil te sba-quelmal te achanabahlamic, ha me yu'un Jehová.

¹³ Spisil te sba-al burro ya me ajel ta alal tuminchij. Teme ma ba yac ajeltay, ya me awac'be snuc'. Ha nix hich ya me awa'be sjelolin te aba-nich'anique.

¹⁴ Te c'alal ya sjoc'obat te anich'an: ¿Bin scuentahil ini? teme xchihe, hich me xawalbe: Te Jehová, ta scuenta yu'el sc'ab la sloq'uesotic tal ta Egipto te banti ayotic ta mosohil;

¹⁵ soc te c'alal tulanub yo'tan te faraón te ma ba la yac'otic loq'uel, te Jehová la yac' ta milel spisil te ba-alaletic ta sq'uinal Egipto, ha te ba-alal querem yu'un ants-winiquetic soc sba-quelmal chambahlametic. Ha scuentahil te ya ca'be milbil smahtanin Jehová te sba-quelmal te chambahlam soc te ya ca'be sjelol te jba-nich'an, xchihat.

¹⁶ Ha me seña ya xc'oht awu'unic ta ac'ab soc ha sna'ojibal ta ati'ba te bin ut'il Jehová la sloq'uesotic bahel ta Egipto ta scuenta yu'el sc'ab, xchi te Moisés.

Bahlal tocal soc c'ahc'

¹⁷ Te c'alal faraón la yaq'uix loq'uel te pueblo, te Dios ma ba la yic'ticlan bahel ta sbehlal te sq'uinal filisteohetic, te ha nopol stuquel. Yu'un hich la yal te Diose: Ya wan xchebaj yo'tanic te c'alal ya yilic guerra, hich ya suhtic bahel ta Egipto, xchi.

¹⁸ Pero la ya'be sjoyic bahel ta sbehlal jochol taquin q'uinal ta stojol bahel Mar Rojo. Te snich'nab Israel loq'uic bahel ta Egipto chapalic soc ya'tejibic yu'un guerra.

¹⁹ Te Moisés la yich'be bahel te sbaquel José, te hich la yac' ta halel ta jamal te snich'nab Israel: Ya me xtal scoltayex te Diose, ta hich ora ya me awich'bonic bahel te jbaquel, te xchihe.

²⁰ Loq'uic bahel ta Sucot, c'oht spas scampamentohic ta Etam ta sti'il te jochol taquin q'uinal.

²¹ Te Jehová ha nahilij bahel yu'unic ta c'ahc'alel ta scuenta bahlal tocal yu'un ya stojobtes bahel ta be a, soc ta ahc'abal ta bahlal c'ahc' yu'un la ya'be sacal q'uinal scuenta yu'un hich hu' yu'unic behel ta c'ahc'alel soc ta ahc'abal.

²² Mayuc bin ora loc' bahel ta stojol te pueblo te bahlal tocal ta c'ahc'alel soc te bahlal c'ahc' ta ahc'abal.